Aningaasaliisartut saqqummiineranni kisitsisit paatsuunganartut

”Kisitsisit kukkulluinnarput, ilisarisinnaanngilluinnarpakka. Immaqa ukiualuit ingerlanerini kisitsisit katitat?”

Sermitsiap Energy Transition Mineralsip Kuannersuarni suliniut pillugu saqqummiussaa, januaarip 16-ani 2025-mi saqqummersoq, pillugu Aatsitassanut Naalakkersuisoqarfimmi pisortaq Jørgen Hammeken-Holm taama allappoq.

Allaaserisamilu tassani ingerlatseqatigiiffiup aningaasanik australiamiut aningaasaataanni 9,37 millionit dollarsinik (42 millionit koruunit missaanniittut) aningaasaliissuteqarnerulersimanera tunngavigineqarpoq. Aningaasaliisartunut saqqummiussineq aamma Australiami børsip pisortatigoortumik nittartagaani takuneqarsinnaavoq: www.asx.com.au

Kisitsisit Jørgen Hammeken-Holmip ilisarisimanngisai tassaapput Energy Transition Minerals naapertorlugu Kalaallit Nunaanni aatsitassarsiorfiit 250-iusut aamma 700-nik ujaasinissamut akuersissutinik tunniussisoqarsimasoq. 

Nalunaarutigineqartumit aallussakinneruneq 

Aatsitassarsiornermut oqartussaasut naatsorsuisimanerat naapertorlugu misissuinissamut akuersissutit 83-iinnaat, misissueqqaarnissamut akuersissutit 13-iinnaat piiaanermullu akuersissutit arfiniliinnaat tunniunneqarsimapput — katillugit 102-iullutik.

Akuersissutit ingerlatseqatigiiffinnut assigiinngitsunut 47-nut agguataarneqarput, Energy Transition Mineralsip aningaasaliisunut saqqummiussamini kisitsisaataanit ikinnerujussuullutik. Taamaalilluni Kalaallit Nunaanni aatsitassarsiorneq saqqummiussamiit aallunnikinneruvoq. Aammattaaq suliffeqarfiit pingasut, Lumina Sustainable Materiale (anorthosit), Greenland Ruby (rubinit safirillu) aamma Amaroq Minerals (kuulti), maannakkut aatsitassarsiornerarlugit suliffeqarfiup allassimasaa ilumoortuunngilaq.

Greenland Ruby 2024-mi aggustimi akiliisinnaajunnaarami septembarimi akiliisinnaajunnaartutut nalunaarutigineqarpoq. Lumina Sustainable Materialsip 2021-miilli ilisimatusarnermut atugassat annikitsuinnarmik avammut tunisarpai. Amaroq Minerals aamma sulianut aalajangersimasunut aalajangersimasumik piffissalikkamik akuersissuteqarpoq, mannalu tikillugu kuultimik kipparissuliamik ataasiinnarmik sanasimavoq, taannalu 2024-mi novembarimi tusagassiortunut takutippaat.

Ujaasinissamut akuersissuteqarsinnaatitaasoq

Energy Transition Mineralsip saqqummiussaani ingerlatseqatigiiffik inatsit naapertorlugu piiaanissamut akuersissummik pisinnaatitaasoq, aamma Kalaallit Nunaanni naalakkersuisut piiaanissamut akuersissummik ujaasinissamut akuersissummik piginnittumut piumasaqaatinik naammassinnissimasumut itigartitsisinnaanngitsut nangilluni allassimavoq. Ingerlatseqatigiiffillu ujaasinissamut akuersissummi aamma aatsitassanut inatsimmi piumasaqaatinik tamanik naammassinnissimasoq, uranimut inatsit akuersissutigineqarmat allakkiamut qaqortumut akissuteqarnissamut piareersimasimalluni.

“Kalaallit Nunaanni naalakkersuisut piiaanissamut akuersissummik qinnuteqaat itigartillugu piiaanissamut akuersissummik suliarinninnermik unitsitsipput,” taamaammallu ingerlatseqatigiiffiup piiaanissamut akuersissummik tunineqarnissamut inatsisitigut pisinnaatitaaffini eqqartuussivikkut isumaqatigiissitsiniarnermillu aalajangiusimaniarsarilerpaa.” 

Naalakkersuisut allatut isumaqarput

 Energy Transitionip aningaasaliisunut saqqummiussinermini oqaaserisai selskabip eqqartuussivikkut eqqartuussinertigullu oqaaserisimasaanut naapertuuttut, Naalakkersuisullu allatut isumaqartut Aatsitassanut naalakkersuisoqarfimmi inatsisileritooq Bo Simmelsgaard Ingerlatseqatigiiffiup aningaasaliisunut saqqummiussinerani paasissutissanut innersuussilluni allappoq. ”Piiaanissamut akuersissummik tunniussinermi Naalakkersuisut tassunga atatillugu naliliisinnaatitaallutik aalajangiinerminni tunngavigigaat isumaqarpugut. Naalakkersuisut taamatut isummernerminnut peqqutigisaat tunngavilersuutaallu isumaqatigiissitsiniartarfimmut eqqartuussivinnullu akissuteqaatini allassimasuni takuneqarsinnaapput”, Bo Simmelsgaard allappoq, Naalakkersuisunullu naammagittaalliuutinut akissuteqaammi immikkoortut 60-72 innersuussutigai, tassani allassimammat Energy Transition Minerals/Greenland Minerals kingornatigut piiaanissamut akuersissummik, uranimik piiaanissamut tunngassuteqartumik, tunineqarnissamut pisinnaatitaaffeqarsimanngitsoq – imaluunniit pisinnaatitaaffimmik taamaattumik pisinnaatitaaffeqarsimanissamik tunngavissaqarluartumik naatsorsuuteqarsinnaatitaasimanngitsoq.

„Ingerlatseqatigiiffiup Naalakkersuisut piffissap ingerlanerani uranimik piiaanissamut akuersissummik tunniussinissaat neriuutigalugu ujaasinissamut akuersissummik pissarsisimanera ima paasisariaqanngilaq ingerlatseqatigiiffik maanna piiaanissamut akuersissummik pisinnaatitaasoq.“ Aamma ingerlatseqatigiiffiup „piiaanissamut akuersissummik tunineqannginnissaa nalorninartuujuaannartoq“ naammagittaalliuummi allassimavoq.

Paatsuunganartoq 

Aalborgip Ilisimatusarfiani aningaasaqarnermut tunngasunik ilisimatuup Per Nikolaj Bukhip aningaasaliisunut saqqummiussaq aamma misissorsimavaa, isumaqarami tamanna paatsunganarsinnaasoq. – Saqqummiussaq kisiat eqqarsaatigigaanni, Kalaallit Nunaanni aatsitassarsiorneq tamarmi piviusumiit ineriartorluarsimanerullunilu ingerlalluartoq isumaqartoqarsinnaavoq. Aappassaanik, ingerlatseqatigiiffik Kuannersuarni pisuussutinik atuisinnaasoq isumaqalertoqarsinnaavoq. Sermitsiap kisitsisit paasissutissallu aningaasaliisunut saqqummiussami atorneqartut pillugit oqaaseqaqqusilluni Energy Transition Mineralsip nunatsinni pisortaa Svend Hardenberg attaveqarfiginiaraluarpaa, kisianni aaqqissuisoqarfiup piffissarititaa nallertinnagu akinngilaq.