Arssarnerit tuniniarneqarnerat sivitsortoq

Danmarkimi sanaartornermik suliaqartut annersaasa tulliat, MT Højgaard Holding A/S, ukiumi qaammataani qulingiluani siullerni Danmarkimi isertitaqarluarnerulersimavoq. 

MT Højgaard taamaalilluni Danmarkimi ingerlalluarpoq.

Suliffeqarfissuulli innaallagisserinermik suliffeqarfik amigartooruteqarfiusoq Arssarnerit A/S, Nuummi Samuel Kleinschmidtsvej 9-mi qullersaqarfilik, pisisumut tunissallugu suli iluatsinngilaa.

Suliffeqarfiup nuna tamakkerlugu kiffartuussillunilu teknikkimik suliaqartartup Nuummi immikkoortortaata tuninissaa siunertaavoq. Kingorna Arssarnerit sinnera tunineqartussaassaaq.

Suliffeqarfik 2024-mi kvartalit pingajuanni naatsorsuutit pillugit Københavnimi Fondsbørsenimut nalunaarummi allappoq. Sinnera suunersoq suliffeqarfissuarmit ilisimatitsissutigineqanngilaq.

MT Højgaardip Kalaallit Nunaanni aallussai tuniniagai juulimiit septembarimut 32 million koruuninik amigartoorutaapput.

MT Højgaard Holdingip pisortaanera Rasmus Untidt oqaaseqarnianngilaq. Børsenimut nalunaarummi qanoq allaqqasoqarnersoq oqaluttuariumanngilaa.

- Ajoraluartumik kvartalimut naatsorsuutini allassimasuniit sukumiinerusunik oqaaseqarsinnaanngilanga, suliffeqarfissuup pisortaa Rasmus Untidt Sermitsiamut mailikkut allappoq.

MT Højgaard Holdingip Arssarnerit tuniniarlugu 2022-mi oktobarimili aalajangerpoq, ukioq mannalu tuniniarneqassasoq kingusinnerusukkut oqaatigineqarpoq.

- Arssarnerit pillugit arlalinnik saaffiginnittoqarlunilu soqutiginnittoqarpoq. Oqaloqatiginnippugut. Arssarnerilli pillugit kikkut oqaloqatiginerivut sukumiisumik oqaatigiumanngilara, Rasmus Untidt ukioq manna apriilimi Sermitsiamut oqarpoq.

Arssarnerit pisortaanerattaaq Torben Nielsen sooq tuniniaanerup taama sivisutiginera pillugu oqaaseqarusunngilaq.

Suliffeqarfittut nersornaaserneqartartoq

Arssarnerit sanaartornermik suliaqartuni tusaamaneqarluarsimavoq, ukiorpassuarnilu kalaallinit suliffeqarfiattut nersornaaserneqartarsimalluni, suliffeqarfiulli MT Højgaard Grønlandip ilaatut, pingaartumik 2022-23-mi aningaasatigut ajornartorsiulersimavoq. Tamanna ingammik sanaartornermut isumaqatigiissutini annertuuni arlalinni annaasaqangaarsimanermik pissuteqarpoq.

Danmarkimi sanaartornermik ingerlatsisut annersaasa tulliata MT Højgaard Holdingip nunani tamalaani ingerlatsinini MT Højgaard International, ilaatigut Arssarnerit sanaartornermillu ingerlatsivik MT Højgaard Grønland, amigartooruteqangaarsimasoq, tuniniarlugit 2022-mi oktobarimi aalajangerpoq.

MT Højgaard Grønland aamma Arssarnerit ukiuni kingullerni ajornartorsiungaarsimasut sanaartornermik suliaqartuni uissuummissutigineqarpoq. Ingerlatseqatigiiffiit taakkua marluk 2023-mi akileraarutit ilanngaatigereerlugit katillugit 218 millionit koruuninik amigartooruteqarput.

Aningaasanik annaasaqartoqarneranut suliniutit pingasut pissutaanerpaapput, tassa Nuummi mittarfiliorneq kiisalu Nuummi Qaqortumilu kollegianik sanaartorneq. Minnerunngitsumillu MT Højgaard Grønland mittarfiliornermi aatsaat taama annaasaqartigaaq.

Arssarnerit ullumikkut 130-nik sulisulik sulilluarnerpaaffimmini 100-t missaannik sulisoqarnerusimavoq.

MT Højgaard Holdingip Portugalimi/Afrikami Savalimmiunilu tuniniaanermi kingorna qaammatini kingullerni Kalaallit Nunaanni aallussaminik naammassinninnissaq ukkatarisimavaa.

Sanaartornermik ingerlatsivissuup MT Højgaard Grønlandip, piginneqatigiiffiup, tuninissaa taamaatiinnarpaa. Suliffeqarfissuulli containerit ineqarfiutini pingasut 15 millionit koruunilerlugit Kommuneqarfik Sermersuumut tunivai. Taakku siusinnerusukkut MT Højgaard Grønlandip sulisuinit atorneqarsimapput.

Containerit 121-nik initaqarput, kommunaldirektørilu Ole Jakobsen naapertorlugu Nuummi Tasiilamilu angerlarsimaffeqanngitsunut utaqqiisaasumik initassatut neqeroorutigineqassapput.

Kalaallit Nunaanni matussasoq

MT Højgaardip Kalaallit Nunaanni sanaartugaasa kingulliit, Nuummi mittarfittaap illutai, sanaartortitsisumut Kalaallit Airportsimut ukioq manna kvartalit pingajuanni tunniunneqarput.

Mittarfiliornermi immikkut suliat naammassineqareerpata suliffeqarfissuup sanaartornermik suliaqarnini unitsissavaa, Kalaallit Nunaannilu pigisat minnerit kingulliit tuniniarneqassasut piginneqatigiiffiup 2024-mi kvartalit pingajuanni naatsorsuutaanut atatillugu børsimut nalunaarummi tamanna atuarneqarsinnaavoq.

MT Højgaardip aamma Qinngorput suliffissuaqarfittaani illorsuaq 1.000 kvadratmeterit missaannik angissusilik, siornatigut MT Højgaard Grønlandip betonilianik sanaartorfigisimasani, tuniniarsaraa.

Taamaammat Arssarnerit tunineqareerpat sinnerilu atorunnaarsinneqareerpata MT Højgaard Holding Kalaallit Nunaanni matussaaq. Sanaartornermik ingerlatsisut nunani tamalaani aallussinerit atorunnaarsinneqarnerata kingorna Danmarkimi aallussineq iluanaarnartoq salliutilissavaat.

MT Højgaard Holdingip ukioq manna kaaviiaartitai 10,5 milliarder koruunit missaanniissasut naatsorsuutigineqarpoq, tamannalu 7 procentimik siuariarneruvoq. Sanaartortitseqatigiiffissuaq ingerlatsinermit 440-460 million koruuninik isertitaqarniarluni naatsorsuuteqarpoq, tamannalu 13-18 procentimik siuariarneruvoq.