Assartuussinermik suliaqartumik ingerlatseqatigiiffik Nuuk Imerup illuutaanik pisiortorpoq
Blue Water Shippingip Nuuk Imeq maanna atorunnaarsimasoq pisiaraa.
Blue Water overtager Nuuk Imeq-bygningerne til oktober, hvorefter de skal gennem en ombygning og renovering med henblik på, at bygningerne nu skal bruges til logistik- og lagervirksomhed.
Foto: Leiff Josefsen
Assartuussinermik suliaqartumik ingerlatseqatigiiffik Blue Water aningaasarpassuarnik atuivoq 100 millionit koruunillu sinnerlugit aningaasaliissuteqarluni, illut Nuuk Imerup pigisimasai pisiarigamigit.
Tamanna assartuussinermik suliaqartumik ingerlatseqatigiiffiup nittartakkamini ilisimatitsissutigaa.
Blue Waterip oqaluttuarisaanerani aningaasaliinerit annersaasa ilagaat, ingerlatseqatigiiffillu naapertorlugu tamanna pingaarutilimmik alloriarneruvoq, Nuummilu assartuinermut toqqorsivinnillu nutaanik periarfissaqalersitsisuulluni, allassimavoq:
- Kalaallit Nunaannit Kalaallit Nunaannullu nassiussinermik tutsuiginartumik aaqqiissutissanik anguniagaqarnitsinnut Nuummi alliliineq tapersersuissaaq. Inissaqarnerulerneq pissutigalugu nassiussat amerlanerusut tiguneqarsinnaapput, sukkanerusumik tunniunneqarsinnaallutik aamma sullitavut sinnerlugit nassiussat amerlanerusut toqqorsivimmiitinneqarsinnaallutik, Lars Vajse, Blue Water Greenlandimi nunami pisortaq nassuiaavoq.
Sumiiffinni arlalinni alliliinissaq neriuutigigaa
Illut oqaluttuarisaanermut tunngasut nutaamik siunertaqarlutik ingerlateqqinneqarsinnaanerat ataqqinaataasoq, Kalaallit Nunaannilu sumiiffinni allani alliliinissaq neriuutigineqartoq Blue Water allappoq:
- Blue Waterip aningaasaliinera nunap immikkoortuani periarfissanik upperinninneranut aamma Kalaallit Nunaata alliartorneranik ineriartornissaanillu tapersersuerusussuseqarneranut kiisalu atortulersuutit nutaat qanittukkut Kalaallit Nunaanni piviusunngorumaartut piareersimaffigilluarnissaannut uppernarsaataavoq.
- Tamanna pissutigalugu siorna Ilulissani allaffimmik nutaamik umiarsualivimmillu nutaamik sanaartornerit naammassivagut. Neriuppugut piffissap ingerlanerani illoqarfinni allani sinniisoqarfigisatsinni assingusunik suliniuteqarsinnaalissalluta, Ole Ulriksen, Blue Waterimi VP North Atlantic oqarpoq.
Blue Water ullumikkut Kalaallit Nunaanni tallimani allaffeqarfeqarluni Nuuk Imeq oktobarip aallaqqaataani tigussavaa, tamatumalu kingorna annertuumik nutarterisoqarlunilu iluarsaassisoqassaaq.
