Atlantikoq qulaallugu angalasunut ajorseriaat annertooq

Nuummi Atlantikoq qulaallugu timmisartunut mittarfimmit nutaamit angalasut, Københavnimit EU tamakkerlugu mittarfinnut allanut timmisartoqqinnissaminni pisattaminnik tunniusseqqittariaqartassapput. 

Greenland Airportsip pisarissersuummik tassannga ilaasussatik pisarissersunnginnissaannik neriorsorsimagaluarpai: 

– Securitymi sulisuvut pikkorissut sisamanngornermi ulloq 28. november ammarutta ilaasunut nunanut allanukartussanut tamanut One-Stop-Security (OSS)-mik pisariitsumik sullissinissamut piareersimapput, taama mittarfinnik sullissisut nittartakkami quppernerminni allapput. 

(Isumannaallisaanermut periutsit EU-mit akuerineqartut, nunani EU-p avataani atorneqartut, nunat taakku EU-p One-Stop-Securitymik piumasaqaataanik akuersinerini. Ilaasut, nassatat usillu nunanut EU-mi ilaasortanut tikittut mittarfimmut EU-p iluaniittumut allamut ingerlaqqinnissamut aammaarlutik isumannaallisaanikkut misissoqqinneqannginnissaat akuersissutip kingunera. Aamma faktaboxi takuuk, aaqqiss.). 

Nuummi Atlantikoq qulaallugu mittarfimmi nutaami isumannaallisaanikkut atortorissaarutit atulerneranni kinguaattoorutit, Nuummi mittarfiup EU-mik misissorneqarnissanut piareersimannginnera kinguneraa, tamanna septembarip aallartinnerani pisussatut pilersaarutigineqaraluarpoq. 

Danmarkimi Trafikstyrelsip Nuummi Atlantikoq qulaallugu mittarfiup misissorneqarnissaata kinguartinneqarnissaa EU-Kommissionimut innersuussutigisimallugu Sermitsiamut uppernarsarpaa. 

– Mittarfiup piumasaqaatinik annertuunik mittarfiit One-Stop-Security-mut ilaatinneqartunut atuuttunik naammassinninnera EU-Kommissionip (Generaldirektoratet for Mobilitet og Transport) misissorsinnaagaa, EU-mik misissuinerup siunertarigaa, Trafikstyrelsi Sermitsiamut allakkatigut akissummini allappoq. 

– Nuummit Atlantikoq qulaallugu angalasunut kinguaattoorneq qanoq kinguneqassava? – Nuummi mittarfiup OSS-mik tikiffittut akuerineqarnissaata tungaanut, angalasut assersuutigalugu Københavnimit OSS-mik tikiffinnut allanut ingerlaqqittussat pisattaminnik tunniusseqqittariaqassasut, Trafikstyrelsen paasissutissiivoq. Nuuk OSS-imik tikiffittut akuerineqarpat, Nuummi OSS-eqarfiup iluani angalasut ullumikkut Kangerlussuarmit angalasunit nalunnginneqartut assinginik angalasinnaalissapput. 

– Qaqugu EU-p misissuinera pisinnaassava? 

– OSS-mik akuersinissamik suliaq pillugu Greenland Airports qanimut ingerlaavartumik oqaloqatigaarput, Trafikstyrelsi paasissutissiivoq. 

Piffissamut pilersaarut nutaaq 

EU-milli misissuinissamut piffissamut pilersaarutip nutaap, Nuummi mittarfiup OSS-itut akuersiaarnissamut pisariaqartunik isumannaallisaanikkut periutsinik atuutilertitsiffiunissaa apeqqutaavoq. EU-Kommissionip sisamanngornermi ulloq 28. november sioqqullugu Nuummi Atlantikoq qulaallugu timmisartuussineq siulleq sioqqullugu misissuisinnaanera piviusorsiortuunngitsoq, Trafikstyrelsi naliliivoq. 

– Misissuinissaq maannakkuugallartoq kinguartinneqassasoq EU-Kommissionimut inassutigaarput, siunissamilu EU-p misissuinera aatsaat 28. november kingorna pisinnaasoq ilimagaarput, Trafikstyrelsi paasissutissiivoq. EU-mi qinersisartut juunimi EU-Parlamentimik nutaamik qinersipput, juulillu 18-ni EU-kommissionip maannamut siulittaasorisaa tyskeq Ursula von der Leyen ukiunut tallimanut tullernut qinerneqarpoq. Ursula von der Leyenip kommissioni nutaaq katitissavaa, tamannali ajornakusoortuullunilu amerlanertigut piffissamik annertuumik atuiffiusarpoq. Taamaammat qaqugu Nuummut misissuiartortoqassanersoq nalunarpoq.

Tamatumalu tungaanut Nuummit Atlantikoq qulaallugu timmisartunut mittarfimmit angalasut, EU-mi mittarfimmut allamut ingerlaqqittussat Københavnimi pisattaminnik tunniusseqqittariaqartassapput, tassani qallunaat nunaanni mittarfinnut ilaasussat aamma. 

Kangerlussuarmi sullissineq annikillissaaq 

Nunatsinni timmisartuussisartoq Air Greenland takornariartitsivillu namminersortunit pigineqartoq Albatros Arctic Circle piffissami 17. marts – 16. oktober 2025 Københavnimit Kangerlussuarmut timmisartunik aqqummik nutaamik 62-eriarluni aallartussamik ammaassapput (Sermitsiaq nr. 30, qupp. 23-mi allaaserineqarpoq). EU-mit akuersissuteqannginneq aamma Kangerlussuarmit Atlantikoq qulaallugu angalasunut, Nuummi mittarfiup ammarneqarnerata kingorna nunap immikkoortuani mittarfittut annikillineqartumi, aamma sunniuteqassaaq. Kangerlussuaq maanna Security niveau 1 (One-Stop-Security) ingerlanneqarpoq, ullorli 1. januar 2025 aallarnerfigalugu mittarfik Security niveau 2-tut ingerlalissaaq. 

– Kangerlussuarmit nunarsuup sinnerani mittarfinnut tamanut ilaasutut suli ingerlasoqarsinnaanera tamatuma kingunerissagaa Greenland Airports paasissutissiivoq, taamaattoq ingerlaqqittussatut angalasoqarsinnaanani. Ilaasutut mittarfimmit tikiffigisamit ingerlaqqissaagaanni taava pisattat tunniuteqqinneqartariaqarput taamatullu securitykooqqaarluni ingerlaqqittoqarsinnaalluni. Narsarsuarmi Ilulissanilu taamaaliortoqartarpoq, tamannalu maanna aamma EU-mik akuersissutip tunniunneqarnissaata tungaanut Nuummi Atlantikoq qulaallugu timmisartortunut atuutissaaq.

EU-Kommissionip angallannermut ataqatigiissaarisuisa tikeraarnissaasa taamaatiinnarneqarneranut suna pissutaanersoq Sermitsiap Greenland Airport A/S-imut apeqqutigigaluarpaa. Tikeraartussat One-Step-Security OSS-imik isumannaallisaanermut atortulerneqarneranik akuersissuteqartussaaniaraluarput, akuersissullu Nuummi mittarfissuup sisamanngornermi novembarip 28-ani atoqqaarfissiornissaa sioqqullugu pissarsiariniarneqartussaagaluarluni.

Saaffiginnissut aviisip naammassineqarnerani suli akineqanngilaq.

aaqq.