Bilitsinik tuniniaaneq ingerlalluartoq

Aarhusimi angalatitsivik Ruby Rejser ukioq manna juunimi Aalborgip Nuullu akornanni timmisartuussinermik toqqaannartumik nutaamik ammaaniarluni siorna aggustip 21-ani nalunaarmat uissuummissutaavoq.

Taamaalilluni Ruby Rejser siullersaalluni Danmarkip Kalaallillu Nunaata akornanni timmisartornikkut Air Greenlandip 2002-mili kisermaassissutut inissisimaneranut unammillerpoq.

Nuummi mittarfik nutaaq siorna novembarip 28-ani ammarmat naalagaaffiup immikkoortuini marlunni timmisartuussinermi unammillernissaq naatsorsuutigineqareerpoq – taamaalillunilu niuernermik ingerlatsisut takornariallu pisarioqisumik arlalinnit uiarterinertut isigineqartumit Kangerlussuakkooqqaaratik toqqaannartumik illoqarfiit pingaarnersaannut timmisartornissaminnut periarfissaqalerput.

Air Greenland suleqatigalugu

Air Greenland aamma Ruby Rejser aqqut nutaaq ammarneqarmalli codesharemik suleqatigiinnissamik isumaqatigiissuteqarput – suleqatigiinnissarlu salliutillugu unammillerneq puigorneqarallarpoq.

Air Greenland aamma Aalborgip Nuullu akornanni toqqaannartumik timmisartuussisarnissamik pilersaaruteqarpoq. Codesharemik suleqatigiinnissaq siorna oktobarimi suaarutigineqarmat pilersaarut taanna taamaatinneqarpoq. Ingerlatseqatigiiffiit marluullutik unammillernatik Jyllandip avannaata Kalaallillu Nunaata akornanni ineriartornermik pilersitsinissaq suleqatigiinikkut anguniarpaat – taamaalillunilu Air Greenlandip nunap iluani angallassinerani ilaasut amerlanerulissapput. 

– Taamaaliorneq iluatsittussatut isikkoqarpoq, bilitsinimmi tuniniaaneq pilersaarutit malillugit ingerlavoq, Ruby Rejserimi pisortaq Morten Meyer oqaluttuarpoq.

– Kalaallit Nunaata tamanit nalinginnaasumik angalanissaminnut akissaqartunit tikikkuminarnerunissaa kissaatigisimavarput, ilaatigut angalanernik aaqqissukkanik tuniniaaneq sullissinitta qiterimmagu ilaatigullu aamma Hurtigrutenimut Danmarkimi tuniniaasuugatta.

– Takuarput inissarpassuit siulliit angalanissanut annertuunut akisuunullu tunngasut, taakkunani ilaasut Nuummut Ilulissanullu angalassapput. Nuummut angalanerit ullunik pingasunik sisamanilluunniit sivisussusillit – minnerunngitsumillu timmisartornissamut billetsit akikitsut najugaqarnissamik ilaqanngitsut aatsaat maannakkut iluamik tunisaalerput.

– Allanut angallassinernit misilittakkatsinnut assingulluinnarput, taakkunani angalanissat akisuut sivisunerillu siulliullutik pisiarineqartarmata.

 Suleqatigiinneq pitsaasoq

–Tuniniaanermut tunngatillugu Air Greenland, nunap iluani angallassinermik ingerlatsisoq suleqatigilluarparput, aammattaaq ingerlatseqatigiiffiup Ilulissani akunnittarfia Hotel Arctic takornarianut angalaartunut atorparput, Morten Meyer oqarpoq.

– Ruby Rejserip Air Greenlandillu codesharemik suleqatigiinnerat pitsaanerusinnaanngitsoq nuannaarutigeqigippullu ­qularutissaanngilaq.

– Aallaqqaammut Danmarkip Kalaallillu Nunaata akornanni angalanissamik soqutiginninneq annertunerpaavoq, maannali Nuummiit Aalborgimut timmisartuussinissat soqutigineqarnerujartortut malugisinnaavarput. Kalaalerpassuit Jyllandip avannaani ilaqutaqarput – Danmarkimilu ilatuttat ilaasa akikitsumik tikeraarnissaannut periarfissatsialaavoq.

Timmisartukkut assartugarpassuit

Ruby Rejserip timmisartoq Boeing 737-800 Danmarkimi timmisartuutileqatigiinnit Airsevenimeersoq timmisartuussinerminni atussavaat. Juunip 12-aniit septembarip aallaqqaataanut sapaatit akunneranut marloriarluni timmisartuussisassasoq pilersaarutaavoq. Jyllandip avannaata Nuullu akornanni timmisartuussinerit katillugit 24-iussapput. Timmisartoq ilaasunut 189-inut inissaqarlunilu ilaasut qassiunersut apeqqutaalluni saniatigut timmisartuussinermi ataatsimi 2-3 tonsinut assartukkanut inissaqarpoq.

– Kalaallit Nunaannut assartugassanut inissat ulikkaareersut oqaatigineqarsinnaavoq, Morten Meyer oqaluttuarpoq. 

Ruby Rejser assartuinissanik tuniniaanermi Blue Water Shippingimik isumaqatigiissuteqareerpoq.

Suliffeqarfik maanna Nuummiit Jyllandip avannaanut assartuinissamik sullitassarsiorpoq.

– Ilaatigut Royal Greenland, Unik Seafood, Polar Seafood allallu Nuummiit aalisakkanik qaqerlaanik assartuinissamut naatsorsuutigineqarsinnaapput. Aalisakkat qaqerlaat, qaleruallit suaallu Danmarkimut assartugaanerusarput, Blue Waterimi Atlantikup avannaani niuernermi pisortap tullia Ole Bøgh Ulriksen oqaluttuarpoq.

Umiarsuarnut takornariartaatinut pilersuineq 

Avannamut timmisartuussinermi Arctic Importip Aalborgimiit Nuummut assartukkanut inissat 50 procentiinik pissarsereersimavoq.  

– Tassaanerupput inuussutissat timmisartukkut nassiussat. Aasamut umiarsuarnik takornariartaatinik tikittoqartalernissaanut isumaqatigiissusiorsiorpugut, tassanilu naatsorsuutigaarput assartukkanut inissat atorneqassasut – ilaatigut tunisassianut nutaanut, naatitanut paarnanullu, Arctic Importimi pisortaq Thomas Hjort oqarpoq.

– Assartuinermut atatillugu Aalborgip Nuullu akornanni timmisartuussineq aallarfissat, naammassisinnaasat akillu peqqutigalugit pilerinartupilussuussaaq, saniatiguttaaq Aalborg pisariitsumik mittarfeqarmat nioqqutissat timmisartumut usilersornissaat pisariippoq.

Aalborgip Nuullu akornanni timmisartuussiffik nutaaq sivisuumik amigaataasimasoq ilaatigut Jyllandip avannaani inuussutissarsiortut sunniiniarlutik sulilluarnerup kinguneraa.

Niuernikkut attaviliisoq

Aalborgip Nuullu akornanni toqqaannartumik timmisartuussisoqartalernera Arctic Importimit Thomas Hjortittaaq naammagisimaarpaa. Arctic Import Aalborgimi qullersaqarfeqarpoq – suliffeqarfiullu sullitaasa annersaasa ilaat Aalborgip mittarfianiippoq.

– Timmisartuussiffik nutaaq niuernitsinni niuerfitta akornanni suli annertunermik attaviliiivoq, angalanissamut piffissaq annertuumik sivikillilluni. Aasaanerani Aalborg aqqusaarlugu toqqaannartumik Nuummut, Islandimi Keflavikimut Savalimmiunilu Vágarimut aqquteqarpoq. Taakkunani pingasunik niuerfeqaratta tamanna suliffeqarfitsinnut immikkuullarilluinnartumik periarfissiivoq, Thomas Hjort oqarpoq.

– 2025-mi piffissap timmisartuussiffiusup sivikinnera ilungersunartutuaavoq, 2026-mili pitsaanerussasoq neriuutigalugulu naatsorsuutigaarput.

Thomas Hjortip kissaatigisaatut ingerlasoqassanersoq Morten Meyerip suli akisinnaanngilaa.

– Timmisartuussiffik naammassippat takujumaarparput, angalatitsivimmi pisortaq oqarpoq.