Ukraine pillugu isumaqatigiinniarnerni Mette F. Europap nipaatut inissikkusunngilaq

Minitseriuneq Mette Frederiksen (S) Ukrainemi sakkuaakkunnaarallarnissamik eqqissinissamillu isumaqatigiinniartoqassagaluarpat “Europap nipaatut” inissinnissaminik anguniagaqanngilaq.

Københavnip universitetiani sisamanngornermi aaqqissuussinermut atatillugu ministeriuneq taama oqarpoq.

- Naagga, Europap nipaanut ilaagunarpunga. Kisianni ingerlatagut (europamiut, aaqq.) sulinermi tassani qitiussapput, aaqqissuussami ingerlatsisumut Rasmus Tantholdtimut, TV 2-mi tusagassiortumit aperineqarluni taama oqarpoq.

Ukrainep præsidentia Volodymyr Zelenskyj peqatigalugu taanna apersorneqarpoq.

Eqqissinissaq anguniarlugu sulinermi Europap qanoq peqataatinneqarnissaa Europami nunanit maanna oqallisigineqarpoq.

Aallartitat Ukrainemiit, Ruslandimiit aamma USA-meersut De Forenede Arabiske Emiraterimi marlunngornermi ullaap tungaani isumaqatigiinniarlutik nerrivimmut issaapput.

Zelenskyj naapertorlugu Ukrainemut sillimaniarnermi qulakkeerinninnissaq ilaatigut eqqartortussaavaat.

Ministeriuneq naapertorlugu Europap qanoq ililluni isumaqatigiinniarnerni peqataalernissaa, nalagaaffiit naalakkersuisullu siulittaasuisa sapaatit akunnerani uani Dublinimi ataatsimeersuarnerminni naapikkunik eqqartortussaaavaat.

- Unnugu eqqartussavaput aamma kingusinnerusukkut Dublinimi, Mette Frederiksen oqarpoq.

Mette Frederiksen aamma Volodymyr Zelenskyjip nunani avannarlerni naalagaaffiit siuttui aamma naalalkkersuisuisa siulittaasui marlunngornermi unnukkut Marienborgimi naapissavaat.

Sakkuaakkunnaarallarnissamik eqqissinissamillu isumaqatigiinniarnermi Europap peqataanissaa Zelenskyjip tapersersorpaa. Aammali oqaatigaa suliassaq oqimaatsuusoq, Europa nunarpassuaqarmat tamarmillu assigiinngitsunik soqutigisaqarlutik.

- Europap aalajangissavaa, kina Europa sinnerlugu aallartinneqassanersoq. Europamik sinniisussamik qinersinissamut piffissanngorpoq, Zelenskyj oqarpoq.

Kangiani qiterlermi eqqissinissamik isumaqatigiinniarnerit ingerlaneranni, EU-p Ukrainemik tapersersuinera aamma EU-mi ajornakusoortumik eqqartorneqassaaq.

335 milliardit koruuninik akiligassaqarnissaa naatsorsuutigineqarpoq. Ukrainep sorsunnermut aappaagumut aningaasaliissutaata pingasunut avillugit marlorarterutaanik matussuserneqartussanik.

EU kommissionip neriutigaa pingajorarterutaat kingulleq suleqataasunit nunanit tamalaaneersunit allanit tapiiffigineqarumaartoq.

RITZAU