Nuuk Imerup illorsua Nuummi umiarsualiviup eqqaaniittoq Blue Waterip pisiareqqammerpaa. Illu maanna iluarsaanneqassaaq, tamakkiisumillu 100 millionit koruunit sinnerlugit aningaasaliiffigineqassaaq.
Nunani tamalaani assartuinermik suliffeqarfiup oqaluttuarisaanerani aningaasaliinerit annersaasa ilagaat.
Nuuk Imerup illorsua Nuummi umiarsualiviup eqqaaniittoq Blue Waterip pisiareqqammerpaa. Illu maanna iluarsaanneqassaaq, tamakkiisumillu 100 millionit koruunit sinnerlugit aningaasaliiffigineqassaaq.
Nunani tamalaani assartuinermik suliffeqarfiup oqaluttuarisaanerani aningaasaliinerit annersaasa ilagaat.
Nuuk Imerup pisiarineratigut illut 10.000 kvadratmeterit sinnerlugit angitigisut Blue Waterip pigilerpai, taakkulu suliffeqarfiup Kalaallit Nunaanni ingerlatsineranut qitiulissapput.
- Kalaallit Nunaanni niuernerup ineriartornissaa upperilluinnarparput – minnerunngitsumik mittarfiit nutaat ammarpata. Ineriartorneq tamanna peqataaffigiumavarput. Taamaattumik Kalaallit Nunaanni inissisimaffitta nukittorsarnissaanut koruunit millionillit aningaasaliissutigaavut, Ole Ulriksen, Blue Waterimi North Atlanticimi pisortap tullia, oqarpoq.
Aningaasaliinerpassuit - Nuuk Imeq pisiarigatsigu ukiuni kingullerni aningaasaliisarnivut ilalerpavut, siornami Ilulissani allaffik nutaaq umiarsualiviullu illutaa atoqqaarfissiortikkatsigit, siornalu Aarhusimi umiarsualiviup illutaa 6.000 kvadratmeterisut angitigisoq 25 millionit koruuninik akeqartoq naammassivarput. Talittarfiup Royal Arctic Linep Eimskipillu usilersorfiusup eqqaani illu nutaaq inissisimavoq.
Siorna Blue Water Ilulissani allaffeqarfimmik nutaamik umiarsualiviullu illutaanik atoqqaartitsivoq.
Assiliisoq: Blue Water
- Aarhusimi Nuummilu aningaasaliisoqarnera pissutigalugu Danmarkip Kalaallit Nunaatalu akornanni assartukkat amerliartuinnartut suliarineqarsinnaalerput, Ole Ulriksen oqarpoq.
Nuuk Imeq pingaarnertut ingerlatitseqqiisutut atorneqassaaq, aammali quersuarnik akunnittarfiliortoqarnissaa pilersaarutaavoq, kalaallit suliffeqarfiisa kingoraartissanut nioqqutissanullu atorsinnaasaannik.
- Assersuutigalugu kilisaatileqatigiiffiit poortuutinut toqqorsiveqarsinnaapput, taakkualu sukkasuumik kilisaammut Kalaallit Nunaanni umiarsualivimmiittumut nassiunneqarsinnaapput – Danmarkimit nassiunneqaqqaartariaqanngikkaluarlutik. Tamanna pissutigalugu kalaallit suliffeqarfiutaat nunani tamalaani unammillersinnaanerulissapput, Ole Ulriksen nassuiaavoq.
Aalisakkanik nutaanik avammut niuerneq - Nuuk Imerup illutaani nillataartitsiviit aamma pilersinneqarnissaat naatsorsuutigaarput. Saattuanik uumasunik nipisaallu suaanik avammut tunisaqartarneq annertuumik peqataaffigisimavarput, Nuummilu mittarfik ukiaru ammarpat aalisakkanik tunisassiat nutaat avammut tunineqartartut amerleriarujussuarnissaat naatsorsuutigaarput, Ole Ulriksen oqarpoq.
Blue Water Shipping 1980-ikkunniilli Kalaallit Nunaanni niuernermik ingerlatsivoq, ullumikkullu Kalaallit Nunaanni assartuinermik ingerlatsisut annersaraat.
- Qaqortumi, Nuummi, Sisimiuni, Aasianni Ilulissanilu immikkoortortaqarfeqarpugut, nunatsinnilu illoqarfinni allani tamani tuniniaasoqarluta. Blue Water Greenlandimi 100-t missaannik sulisoqarpugut, Lars Vajse, Blue Water Greenlandimi nunami pisortaq, oqarpoq.
- Kalaallit Nunaannit Kalaallit Nunaannullu nassiussinermik tutsuiginartumik aaqqiissutissanik anguniagaqarnitsinnut Nuummi alliliineq tapersersuissaaq. Inissaqarnerulerneq pissutigalugu nassiussat amerlanerusut tiguneqarsinnaapput, sukkanerusumik tunniunneqarsinnaallutik sullitavullu sinnerlugit nassiussat amerlanerusut toqqorsivimmiitinneqarsinnaallutik.
Nuuk Imerup pisiarineratigut illut 10.000 kvadratmeterit sinnerlugit angitigisut Blue Waterip pigilerpai.
Assiliisoq: Blue Water
- Illumik illoqarfimmiorpassuit atassuteqarfigingaagaannik pisiarinninnerput Blue Waterip Kalaallit Nunaanni suliniuteqartuarneranut ersiutaavoq. Nuuk Imeq oqaluttuarisaanermut tunngalluinnarpoq, kingornussarlu Blue Waterimi nutaamik siunertaqarluta ingerlateqqissinnaagatsigu ataqqinaataavoq.
Allanngortiterineq nutarterinerlu Blue Waterip Nuuk Imeq oktobarip aallaqqaataani tigussavaa, tamatumalu kingorna atortorissaarutit nutaamik atulernissaannut piareersarlugit allanngortiterineq nutarterinerillu annertuut aallartissapput. Nutarterineq naammassineqalerpat pisortatigoortumik atoqqaartitsinermi sullitanut niuernikkullu atassuteqaatinut kaffillernissaq kaagillernissarlu Blue Waterimi pilersaarusiorneqarpoq.
Blue Water Shipping A/S tassaavoq assartuinermik aammalu assartuinermut tunngatillugu sullilluarnissaq siunertaralugu aaqqissuussinermik qallunaat ingerlatsiviat Esbjergimi qullersaqarfeqartoq, 1972-imi Kurt Skovimit pilersinneqartoq. 2023-mi kaaviiaartitat 9 milliardit koruuniupput, nunarsuarlu tamakkerlugu 2.500-nit amerlanerusunik sulisoqarpoq.
Blue Water Shipping 2007-ip tungaanut Kurt Skov pisortaralugu piginnittut suliffeqarfigiutigaat. Ullumikkut Shipping Skov-fondenimit sulisullu aningaasaateqarfiannit Blue Water pigineqarpoq. Kurt Skov suli suliffeqarfiup siulersuisuini ilaasortaavoq.
