Critical Metals Corp pillugu paasissutissanik katersuilereerpugut

Australiamiut suliffeqarfiutaat Tanbreez, Kujataani Killavaat Alannguanni aatsitassanik qaqutigoortunik piiaanissamut akuersissutaateqartoq, pisiaralugu alloriarneq siulleq maannakkut ingerlassimallugu Australiamiut-amerikamiut suliffeqarfiutaat Critical Metals Corp. juulip 23-ani tusagassiuutinut nalunaarummi allappoq.

Kalaallit Nunaannut tikeraarneq

Critical Metals Corp.-ip pisortaa siulittaasualu Tony Sage Kalaallit Nunaanneeqqammerpoq, tassani Tanbreezimi pisortaq Greg Barnes peqatigalugu akuersissuteqarfiusoq takuniarneqarpoq taavalu Inuussutissarsiornermullu, Niuernermut, Aatsitassanut, Inatsisinik Atuutsitsinermut Naligiissitaanermullu Naalakkersuisoq Naaja H. Nathanielsen (IA) ataatsimeeqatigalugu.

- Ingerlatsinerup siulliup iluatsilluartumik naammassineqarnera Tanbreezip pisiarineqarnerani alloriarneruvoq pingaarutilik. Tanbreezip pisiarineratigut Critical Metals Corp.-ip nunani killerni aatsitassanik qaqutigoortunik piumasaqarneq annertusiartortoq matussuserniarlugu aatsitassanik qaqutigoortunik tutsuiginartumik siunissaq ungasinnerusoq eqqarsaatigalugu pilersuisutut inissinnissaanut alloriarneruvoq pingaarutilik, Tony Sage tikeraarnermini oqarpoq. Piumasaqaatit naammassineqassasut

Pisinissamut piumasaqaatit ilaat tassaavoq Critical Metals Corp.-ip ukiuni marlunni tulliuttuni misissuinermut 10 millionit dollarit, 70 millionit koruuningajaat, aningaasaliissutigissagaat Taamaalilluni Tanbreezimi aktianik piginneqataassutsini 92,5 procentinut qaffassallugit.

Suliffeqarfiup akuersissummik qinnuteqaruni imaluunniit akuersissutaatilinnik piginnittunngussaguni piumasaqaatit aalajangersimasut naammassisariaqarpai:

”Akuersissutinik qinnuteqartoqartillugu aamma toqqaannartumik toqqaannanngitsumilluunniit akuersissutaatilimmik piginneqataalertoqartillugu malittarisassat atuupput. Tanbreezimi, maanna 50 procentit ataallugit piginneqataaffigineqartoq, suli tamanna angunngilarput, aatsitassanut inatsisinillu atuutsitsinermut naalakkersuisoqarfik Sermitsiamut ilisimatitsivoq.

Aalajangiisinnaassutsit assersuutigalugu Critical Metals Corp.-imut tunniunneqarnerani Aatsitassanut inatsit atuuttoq naapertorlugu akuersissummik piumasaqarfiussasoq ilisimaaralugu Tanbreezip naalakkersuisoqarfimmut ilisimatitsissutigigaa Naalakkersuisoqarfik nangilluni allappoq.

Niuernermik peqquserluttuliornermut akiligassaq

Aatsitassarsiornermut inatsimmi immikkoortut marluk suliffeqarfimmut Critical Metals Corp.-imut naammassiuminaassinnaapput. Avatangiisinik illersuiniaqatigiiffiup NOAH-p oqaaseqartartua oqarpoq.

– Paasiuminaatsippara naalakkersuisoqarfiup Killavaat Alannguanni piiaanissamut pisinnaatitaaffiit Critical Metals Corp.-imut tunniunneqarnissaat qanoq akuerisinnaaneraa, Niels Henrik Hooge oqarpoq. Taassuma European Lithium, Critical Metals Corp.-imi aktiat 83 procentiinik piginnittoq – aamma Critical Metals Corp.-imi aqutsisut assigingajakkaat – ukiut pingasut matuma siorna aningaasanik peqquserluuteqarsimasutut 1,2 milliont koruuninik (160.000 euronik) akiligassinneqarsimasoq tikkuarpaa. Tamanna Østrigimi aningaasanik peqquserluuteqarnermut nakkutilliisoqarfimmit FMA Österreichimit aalajangerneqarpoq.

Aatsitassanut inatsimmi piumasaqaatit naammassineqanngillat

Aatsitassanut tunngasunik suliaqarneq pillugu inatsimmi paragraf 67-imi ima allassimavoq: ”Pisinnaatitsissummik pigisaqartoq, inuit pisinnaatitsissummik pigisaqartumi piginnittut imaluunniit aalajangiisuusumik sunniuteqartut aamma inuit pisinnaatitsissummik pigisaqartup aqutsisuiniittut, ilanngullugit siulersuisut, pisortaatitat, nakkutilliinermut siunnersuisooqatigiit imaluunniit aqutsisuni oqartussat assigisaat, ukiut 4-t kingulliit iluanni eqqartuunneqarsimassanngillat imaluunniit akiliisitsinermut akuersisimassanatik (akuersaarlutik) imaluunniit allatut pillarneqarsimassanatik imaluunniit pineqaatissinneqarsimassanatik: Akiliilluni peqquserlutsitsineq, peqquserlunneq imaluunniit niuernikkut isumaqatigiilluni suliaqarneq, pinerluttut, ajortumeeriniarluni ingerlataqarnernut atatillugu ajortumeeriniarluni iliuuseqarnerit imaluunniit pinerluttuliorluni iliuuseqarnerit, Aningaasanik pinerlunnikkut aningaasarsiarineqartunik malunnarunnaarsaaneq imaluunniit ajortumeerinianut aningaasalersuineq, meeqqanik sulisoqarneq imaluunniit inunnik niuerutiginninneq. 

– Naalakkersuisoqarfilli soorunami ukiut sisamat qaangiunnissaata tungaanut ukiumik ataatsimik utaqqisinnaavoq, Niels Henrik Hooge oqarpoq, taassumalu oqaatigaa Tanbreezip aamma Critical Metals Corp.-ip Kalaallit Nunaanni inatsisit ilisimalluanngikkaat pisup takutikkaa.

Aatsitassanut inatsisinillu atuutsitsinermut naalakkersuisoqarfiusimasumi pisortap erseqqissarpaa paragraf 66-ip aamma paragraf 67-ip siunertarigaat aatsitassarsioqatigiiffiit pisariaqartumik piginnaaneqassasut, soorluttaaq paragrafit taakkua nunap sianiilliortunik aningaasaliisoqarnissaanut qulakkeerinnittuusut.

”Paasissutissanik katersuiniarluta aallartereerpugut, Tanbreez aalajangiisuusumik sunniuteqarsinnaatitaanermik tunniussinissamik qinnuteqassagaluarpat paasissutissanik tunngavissaqarluta,” naalakkersuisoqarfimmi pisortaq Jørgen Hammeken-Holm Sermitsiamut allappoq.