Disko Linep kiffartuussinissamut isumaqatigiissutai Avannaata Kommunianit Namminersorlutik Oqartussanut saaffiginnissutigineqartut
Avannaata Kommuniata Disko Linep kiffartuussinissamik isumaqatigiissutai pillugit erseqqissaasoqarnissaa piumasaraa, Namminersorlutillu Oqartussanut erseqqissaasoqarnissaa pillugu saaffiginnilluni. Disko Line “marlunnik sammiveqarluni”, tassa kiffartuussinissamik isumaqatigiissuteqarluni takornarianillu angallassisarluni, ingerlatsinini nalunaarutigereeraalu saaffiginninneq pivoq.
Assi: Arne Mølgaard
Namminersorlutik Oqartussat Disko Linep kiffartuussinissamut isumaqatigiissutai nalilersussagaat Avannaata Kommuniata kissaatigaa. Avannaata Kommunia tusagassiuutinut nalunaarummi taama ilisimatitsivoq.
Disko Linep, Namminersorlutik Oqartussanut kiffartuussinissamik isumaqatigiissuteqarnermik saniatigut, takornarianik angallassisarnertik Avannaata Kommunianut nassuiaatigereeraalu tamanna pivoq.
Avannaata Kommuniani borgmesterip Lars Erik Gabrielsenip (S) pissutsit maanna atuuttut eqqarsaatigalugit tamatut ingerlariuseqarneq naleqqutinngitsutut isigaa.
- Isumaqatigiissutip piumasaqaataasa ersarissuunissaat nutarterneqarnissaallu kissaatigaarput. Pisortanit tapiiffigineqarnermik malitseqartunik isumaqatigiissutit naligiinngitsumik unammilleqatigiinnernik pilersitsinnginnissaat qulakkiissallugu pingaaruteqarpoq. Takornariartitsinermi angallassinermillu suliaqartut tamarmik ammasumik tunngavilersuuteqartumillu oqallinnermut peqataasariaqarput, periarfissanillu amerlanerusunik pilersitsinermik malitseqartariaqarluni, Lars Erik Gabrielsen (S) oqarpoq.
Ilaasut pisariaqartitaat salliutinneqassasut
Taama oqariartuuteqarnera Disko Linep nalunaarutaanut kingullermut tunngassuteqarpoq. Ingerlatseqatigiiffiup isumaqatigiissut ukiut tallimat matuma siorna atsiorneqartoq innersuussutigaa. Kommunimili angallassinissamik pisariaqartitsineq annertusiartortillugu ingerlatseqatigiiffik pisussaaffimminik naammassinnissasoq Avannaata Kommuniani borgmesteri isumaqarpoq.
- Takornariaqartitsinermi angallassisarnermillu suliaqartut tamarmik toqqammaveqarluartumik ineriartortitsinissamut tapertaallutik peqataasarnissaat pisariaqartipparput. Aatsaat suleqatigiinnikkut ersarissumillu siunnerfeqarnikkut pitsaanerusunik aaqqiissutissanik pilersitsisinnaalissaagut – taamatullu takornarialerisoqartarnikkut najukkani inuiaqatigiinnut piorsaaneq qulakkeersinnaassallutigu, Lars Erik Gabrielsen oqarpoq.
