DMC Nordic Nuummi takornariaqarneq nunallu aningaasaqarnera sammisaralugit allaffimmik ammaavoq

DMC Nordic – Destination Management Company Nordic-imik taaguuteqartoq – suliffeqarfik ilaatigut Danmarkimi, Sverigemi, Norgemi Estlandimilu qulingiluanik allaffeqartoq, maanna Nuummi allaffeqalerpoq. 

– Nunani allaffiit tamarmik immikkut ingerlariuseqarput.

- Kalaallit Nunaanni allaffik nammineerluni ingerlassaaq, maannakkorpiarlu aallartilaarluta (oktobari 2024) umiarsuarnik takornariartaatinik takornariartitsisarneq tamakkiisumik suliarivarput, Kalaallit Nunaanni pisortaq Magnus Biilmann Trolle, Nuummi allaffimmi nutaami maannakkut pingasunik aalajangersimasunik sulisulimmi, marlunnillu suliffimmik misiliisulimmi allaffeqartoq, nassuiaavoq.

DMC Nordic Grønland takornarianut, soorlu akisuumik angalasunut imaluunniit MICE-mik (niuernermik, ataatsimeersuarnermik pisussanillu) takornarianut, kingusinnerusukkut takornariartitsisalerniarpoq.

Angalatitsiviit aningaasarsiornissaat qulakkeerniaraat 

Nuummi sulisut tassaapput nunami pisortaq Magnus Biilmann Trolle, ingerlatsinermut ataqatigiissaarisut Maria Lyberth aamma Aviaaja Lynge Petersen kiisalu suliffimmik misiliisut Ivaana Egede aamma Frederik Frederiksen. 

Taakkua suliassaanni pingaarnerpaaq tassaavoq umiarsuaq takornariartaat Kalaallit Nunaanni sumiiffimmut aalajangersimasumut tikikkaangat angallassineq. Najukkani takornariartitsisunut attaveqarnissaq misigisassanillu tuniniaanissaq suliarissavaat.

– Suliassatta pingaarnersaat tassaavoq kalaallit angallassisartut sullinnissaat sapinngisamillu aningaasarsiornerpaanissaat qulakkiissallugu – aamma peqataarusuttut, kisianni suli peqataanngitsut, periarfissaqarnissaat qulakkeerneqassaaq, Magnus Biilmann Trolle nassuiaavoq.

Pulaartut isumannaatsumik tikiffittarnissaat apuuttarnissaallu kisimi eqqarsaatigineqassanngilaq. Peqataaffigisaminnik, ilinniarfigisaminnik Kalaallit Nunaatalu kulturianut pinngortitaanullu attaveqalersitsisussamik misigisassaqartinneqartariaqarput. 

Assersuutigalugu Qeqertarsuarmi umiarsuarnut takornariartaatinut nalunaaquttap akunnera ataaseq kalattoornermik sungiusaaneq tunivaat, tassanilu DMC Nordic isertitamik marloriaatinngortinnerinut ikiuuppoq.

- Kalaallit Nunaanni takornariartitsinermi takornariartitsinermi akigitinneqartut qaffasinnerulernissaat qunugineqartartoq maluginiarparput, kisianni ilimagisatsinnit naleqarnerungaarpugut. Siunnersuisarnermik suliaqartoqarpoq 

– Namminneq naleqassutsiminnik paasinninnissaannut akinillu naleqquttunik nassaarnissaannut ikiortarpagut, Magnus Trolle oqarpoq. Ingerlatsinermut ataqatigiissaarisoq Maria Lyberth ilassuteqarpoq:

- Nukiit atortagaat – soorlu qitinnermut – akilerneqarluartariaqarput. Aningaasarsiorluartariaqarput. Tikeraat isiginnaaginnarnissaat kissaatiginngilarput, 

– sammisaqarnermi peqataasariaqarput kalattoorlu “Maniitsuliarluta aallaratta” ilinniartariaqarlugu – tamanna misigisaqarneruvoq, taanna oqarpoq.

DMC Nordic-ip takornariartitsinermi nioqqutissat piujuartitsisuussasut, akilersinnaassuseqartuussasut tikeraanullu nunaqavissunullu isumaqartuussasut pingaartippaa. 

Tamatuma saniatigut umiarsuaatileqatigiiffiit kiffartuussinissamik piumasaqaataat ilisimasaqarfigisariaqarpaat 

– assersuutigalugu franskisut oqaluttut neriartorniassammata, katersugaasivinnut pulaarniassammata imaluunniit akunnittarfimmut iserniassammata franskisut oqaluttunik takornarianut ilitsersuisartunik sulilersitsisoqartariaqarpoq.

3. septembari — pissutsit allanngorfiat 

DMC Nordicip Nuummi sulisui septembarip pingajuani pingaarutilimmik suliassaqarput. Ullormi tassani maannamut suliassamik annersaannik suliaqartussanngorput: umiarsuarmi takornariartaammi ilaasut 378-it paarlaannissaaq, taakku timmisartumik attartorsimapput. Tamatuma saniatigut ilaasut 378-it timmisartumik tikikkunik toqqaannartumik umiarsuarmut ikiartussapput.

Pisut qaavatigut ullormi tassani umiarsuaq takornariartaat alla Nuup umiarsualivianiissaaq — ataaseq 670-inik ilaasoqartussaq. Illoqarfiup bussii tamarmik takornariarpassuarnik illoqarfimmi angallassissapput.

Aammattaaq Hotel Hans Egedemi ataatsimeersuartoqassaaq, tassanilu Katuap isaariaa kisiat pinnagu illoqarfimmi sumi tamaani inissat tamarmik inniminnerneqarsimapput. Tamakku tamaasa ilanngukkaanni DMC ataqatigiissaarinikkut misilittarluarneqassaaq.

– Aallaqqaammut uippallissaagut! Magnus Biilmann Trolle oqarpoq, suleqatinilu illaqatigitillugit. Pilersaarusiortariaqarput allatullu pisoqaratarsinnaaneranut aamma pilersaarusiussallutik, aamma bussit marluk saniatigut biilinik attartortariaqarput.

– Septembarip pingajuat ullut tamaasa oqaluuserisarparput. Paarlaatsitsisussaavugut, tassani inuit 378-it missaanniittut umiarsuarmut ikiartortussaapput, takornariallu 378-it nalunaaquttap akunneri tallimat iluanni umiarsuarmit angerlamut timmisartuunneqartussaapput, Magnus, Nuummiut allannguisoqaraangat suliaminnik ilisimasaqarluartarnerannik naleqqussarsinnaanerannillu nuannaarutiginnittoq, oqarpoq.

Paarlaatsitsineq siulleq

Nuummi mittarfissap nutaap ammarneqarnerata kingorna DMC Nordic umiarsuarmik takornariartaammik ilaasuinik siullermeerluni taarsiivoq. Tamanna pivoq apriilip sisamaani Nuummi ilaasunik taarsiisoqarmat. 

Tassani sulisut Nuummi attaveqaasersuutit mittarfillu qanoq ingerlanersut paasivaat  – nunatsinni nunanullu allanut timmisartuussinerit akornusinngikkaluarlugit.

DMC Nordic Kalaallit Nunaanni aamma umiarsualivinni mittarfinnilu sulisussanik 10-20-nik akunnermut akissarsiaqartartunik atorfinitsitsissaaq, taakkulu pilersaarutit malillugit susoqarnissaa qulakkeerniarlugu piffissaq tamaat najuussinnaassapput.

– Suut tamarmik ingerlalluarnissaannik kikkullu tamarmik nuannaarnissaannik qulakkeerinnissapput. Angallassisartullu bussinik ingerlatsisut allat bussit ingerlaarfissaat pillugit paasissutissiissuteqarnissaannik ikiorlugillu ataqatigiissaarinikkut pilersaarutit malinneqarnissaa qulakkeertussaavaat, Magnus oqarpoq.

Takornariaqarneq pitsaanerulersinniarlugu 

Allaffiup oktobarimi 2024-mi ammarneqarneraniit ullumimut pisoqangaatsiartarsimavoq. Sulisut ilikkagaqangaatsiarsimapput, ilaatigut apriilimi siullermeersumik ilaasunik paarlaatsitsinermut atatillugu, tassanilu ilisimasaqarfiginngisatik paasisimavaat, 

– soorlu bussit assigiinngitsunik amerlassusilinnik issiaveqarneri, mittarfimmi nassatanik tunniussiviup aalajangersimasunik ammasarfeqarnera, nassatanullu assartuut ataasiinnaasoq, umiarsuaatileqatigiiffiit Nuummut tikittut tamarmik tupaallaatigisaat.

Illoqarfimmi Nuummi, kangerlummi illuaqqani siniffissat ilanngullugit 1.300-iinnarnik siniffissaqartumi, piujuartitsilluni takornariartitsinerup qanoq isumaqarnera oqallisigisariaqartoq nunami pisortaq isumaqarpoq.

– Attaveqaasersuutitigut ajornartorsiuteqarpugut. Umiarsuaq 2.000-inik ilaasoqarluni Kalaallit Nunaannut tikikkaangat inuit 200.000-it Norgemut umiarsuarmik tikittarnerattut ippoq. Tamanna imaannaanngilaq, Magnus oqarpoq. 

Visit Greenlandillu ataatsimeersuarnerni oqallinnermut aallarniutaanut innersuussivoq – tassani takornariarpassuaqarnani pitsaanerusumik takornariartitsisoqarnissaa kissaatigineqarpoq.

Takornariat Ilulissaniit Nuummut angalaannarnagit nunap sinneranut siammartittarsinnaanissaat aaqqiissutissatut siunnersuutigineqarsinnaavoq. Taarsiullugu Qeqertarsuarmut, Maniitsumut, Qasigiannguanut illoqarfinnullu mikinerusunut allanut angalatinneqartalersinnaapput. Tamakkorpiaat pillugit ikiuuttarpugut.

- Umiarsuaatileqatigiiffiit arlallit ataatsimeeqatigisarpagut, sumiiffiillu ilaanni unammilligassaqarnera pillugu ilisimatittarpavut. Ilulissani angallassisoqarsinnaanngeratarsinnaanera eqqarsaatigalugu assersuutigalugu Qeqertarsuaq periarfissatut saqqummiuppara 

– arlalillu Qeqertarsuup piunera naluaat. Taava Kalaallit Nunaanni innermik anitsisartoqarfituaanera pillugu assinik takutitsillutalu oqaluttuartarpugut                          – tuniniaanermullu allaffiannut tuniniaasarluta.

- Frederik Ivaanalu illoqarfinnut ullumikkut taama takornariartinneqartiginngitsunut nioqqutissat allattorsimaffiinik nutaanik pilersitsiniarlutik suliaqarput. Maniitsumut allattorsimaffik suliarilereernikuuarput maannalu Qeqertalimmiittunik suliaqarluta, Magnus Biilmann Trolle oqarpoq.