Eqalussuit nuliaat Halibut Greenlandimi tunisaalersut
Qaleralinniarluni aalisarnermi pisarisuukkat atorluarneqarnissaat siunertaralugu eqalussuit nuliaat Ilulissat Halibut Greenlandip aalisakkanut suliffissuaataani tunisaalerput.
Annonse
Eqalussuit nuliaasa nunani allani niuerutigineqarsinnaanerinut periarfissat piffissami sivisuumi misissorneqareersullu, Ilulissani Halibut Greenland ApS-ip aalisakkanut suliffissuaataani eqalussuit nuliaasa sului tunisaalerput. Tamanna Ilulissat eqqaani aalisartut pisaasa sapinngisamik amerlanerpaat aalisartunit aningaasarsiutaanissaannik pisarisuukkanillu atorluaanissamik siunertaqartoq, Halibut Greenlandip pisortaa Erik Sivertsen aamma siulersuisuni siulittaasoq Kaaleeraq Mathæussen oqarput.
Europamut niuerutigineqassasut
Halibut Greenland ApS-ip pisortaa Erik Sivertsen naapertorlugu Ilulissat eqqaani qaleralinniarluni aalisarnermi eqalussuit nuliaat ukiut tamaasa amerlasoorpassuit pisarineqartarput, taakkuli tunisaanngimmata amerlanerpaartaat igiinnarneqartartut, taassuma oqaatigaa.
- Taamaattumik eqalussuit nuliaasa sului Halibut Greenlandip Ilulissani aalisakkanut suliffissuaataanut tunisaalernissaat pillugu misissuinerit piffissami sivisuumi ingerlassimavarput.
- Siornatigut misiliummik tigusisarnikuuvugut, maannakkulli misileeqqilerpugut tunisinerlu qanoq annertutigisumik ingerlassanersoq suli naluarput, pisortaq oqarpoq.
Eqalussuup nuliata sului aalisartup piissavai, taakkulu aalisakkerivimmi salillugillu qeritinneqartassapput Europamilu nunani assigiinngitsunut tuniniarneqartassallutik. Tunisassiallu qanoq piumaneqartiginerat aallaavigalugu tusassiornerup ingerlaannarnissaanut tunngavissaqarnersoq paasiniarsiumaartoq, Erik Sivertsen oqarpoq.
Eqalussuup nuliata suluinik tunisinermi kilomut 15 krouuni akigitinneqassaaq, misilittakkagullu naapertorlugit Ilulissat Kangerluani eqalussuit nuliaat pisarineqartartut nalinginnaasumik angisuujusarput.
Tupissutit immaqa tunisaalersinnaasut
Pisarisuukkat soorlu qeeqqat suluppaakkallu Halibut Greenlandimut tunineqartarput.
- Halibut Greenland annertunerpaamik aalisartunit pigineqarpoq, taakkulu pisarisoortagaat nunani allani tunineqarsinnaanersut misissortarparput.
- Ilulissat Kangerluani aalisartut tupissutinik pisaqartarput, taakkuli qanoq amerlatiginersut ilisimaneqanngilaq, tupissutilli ilaatigut panertillugit Ilulissani avannaanilu piumaneqarluartut ilisimavarput, taamattumillu Halibut Greenlandimut tunisaalersinnaanerannut periarfissat misissorneqarnissaat siunertaavoq, Erik Sivertsen erseqqissaavoq.
Halibut Greenland Kitsissuarsuni Qeqertamilu qaleralinnik tigooqqaaveqarput, maannakkuugallartumullu nunap immikkoortuini allani aalisakkanik tunisassiornermik ingerlataqarnissaq pilersaarutigineqanngilaq.
Aalisartunut iluaqutaassasoq
Halibut Greenlandimi tunisassiornerup ineriartortinneqarsinnaanera pillugu suliffeqarfimmi atorfilittat siulersuisullu siorna ukiakkut Danmarkimi Norgemilu paasisassarsiorlutik angalapput, tassungalu atatillugu ilaatigut eqaluissuit nuliaasa tunisassiarineqarsinnaanerat misissorneqartunut ilaasoq, ukiuni kingullerni pingasuni Halibut Greenlandimi siulersuisuni siulittaasuusoq, aalisartoq Kaaleeraq Mathæussen oqarpoq. Taanna eqalussuit nuliaasa Halibut Greenlandimut tunisaalernissaannut suliamik aallartitsisuuvoq.
- Suliffeqarfimmi ingerlatatsinni aningaasatigut annaasaqaataanngitsunik, qalerallit saarulliillu saniatigut aalisakkat suut tunisassiarineqarsinnaanersut ujartortarsimavara.
- Ullaaq manna qaleralinnut ningittakkanni eqalussuit nuliaat angisuut 24-it qaqippakka, taakkualu sului 48-t katillugit 30 kilo missaaniittut tunivakka, taamaattumik qaleralinniarnerup saniatigut tapertaalluarsinnaapput, taanna oqarpoq.
Ilulissani Hotel Arctic aalisartunut ataasiakkaanut eqalussuit nuliaanik qangaaniilli pisisarpoq.
