Erne inuusuttunut maligassiuilluartoq

Erne Lange Olsen naqqaniit sulisartutut aallarteriarluni KJ Greenlandimi piginneqataalerpoq, suliffeqarfik taanna Nunatsinni sanaartugassanik suliakkerneqartartut annersaraat.

42-nik ukiulik angusaqarluarniartoq taanna, Aasianni/Kangaatsiami immikkoortortaqarfimmi pisortaasoq suliffeqarfimmik, ulluinnarni KJ-mik taaneqartartumik, juulip aallaqqaataanni piginneqataalerpoq.

- Suliffeqarfimmi 19-inik ukioqarlungali suliffigisanni piginneqataalerama nuannaaqaanga, oqarpoq.

Erne Lange Olsen immikkut ittumik sanaajuvoq. Pisortaanerup Jens Jensenip inunnguuserisaminik piginnaaneqartutut, sulianik unammillernartunik naammassinnilluartartutut aqutsilluartartutullu taavaa.

Suliffeqarfimmi inuusuttut utoqqaanerusullu Erne Lange Olsen nersugaraat, ilaatigut immikkut ittumik suliassaqaleraangat siulliulluni iliuuseqartarnera pissutigalugu.

Erne tamatigut allannguiniartuusarpoq, suleqatiminullu maligassiuilluartuulluni. Erne aamma suliffeqarfimmi inuusuttunik isumassuilluartuusartoq, Jens Jensen isumaqarpoq.

Namminerminut neqeroorutigineqartoq tupaallaatigigaa

Erne Lange Olsenip KJ Greenlandimik, siorna 593 millionit koruuninik kaaviiaartitaqartumik, ullut ilaanni piginneqataalernissani, nammineq takorloorsimanngisaannarpaa.

Ukiup affaata matuma siornagut, suliffeqarfimmik piginneqataanissamut neqeroorfigineqassasunga, Jensimit oqarfigineqarama tupaallaatigeqaara.

- Taama neqeroorfigineqarnera takkummat, Jensip kajumissaarmanga akuersivunga, suleqatimalu oqarfigimmannga suliffimmi pisartut tamaasa ilisimagikka, oqarlutillu neqeroorutigineqartoq qujallunga tigussagiga, oqarpoq.

Mekanikeritut ilinniagaqarsimasoq

Erne Lange Olsenip Nunatsinni sanaartornermik suliakkerneqartartut annersaanni qaffasissumik atorfeqalernissaminut ingerlaarnera nuannersoq tupinnartorlu oqaluttuarineqarpoq.

Nunatsinni atuarnini naammassigamiuk Danmarkimi efterskolemi 11. klassimi atuarnini ingerlateqqippaa. Tassanilu atuartuunini naammassigamiuk Aasiannut angerlarluni.

Erne Lange Olsen pisiniarfinni assigiinngitsuni sulisareerluni 19-inik ukioqarluni taamani suliffeqarfiusumut EMJ/KJ-mut sulisartutut suliartoqqaarpoq, kingornalu biilinut mekanikerinngorniarluni ilinniartutut aallartilluni. Kingusinnerusukkulli ilinniakkani allannguallatsillugu sanaartugassanut suliakkerneqartartuni mekanikeritut ilinniartunngorluni, tassanilu ilinniakkani KJ Aasianni naammassillugu.

Tamatuma kingorna EMJ/KJ marlunnut avinneqarpoq — KJ Greenland Ilulissani qullersaqarfeqartoq aamma EMJ-Atcon Nuummi qullersaqarfeqartoq.

- Akisussaaffeqarneruleriartorpunga. Siullermik Aasianni saffiorfimmi pisortanngorpunga. Piffissap ingerlanerani aqutsisutut akisussaaffeqarneruleriartorpunga, Erne Lange Olsen oqaluttuarpoq.

KJ-imi sulisunit qullersanillu nuannarineqartorujussuuvoq ataqqineqartorujussuullunilu. Ukiunilu kingullerni tallimani KJ-ip Aasianni/Kangaatsiami immikkoortortaqarfiani pisortaavoq. Erne Lange Olsen illoqarfimmi peroriartorfigisamini ilaquttanilu najugaqarput.

- Immikkoortortaqarfimmi pisortatut atorfik aallaqqaammut naammassisinnaasorinngilara. Jensilli oqarfigimmanga suliassaq tigusariaqariga, taamaattumik akueriinnarpara. Suliffik ingerlatilerakku, piffissap ingerlanerani suut tamarmik ingerlallualerput, oqarpoq.

Angusarissaarnerpaasoq

- Erne kalaallini siullersaalluni Aarsimi inuussutissarsiornermut ilinniarfimmut Jyllandip avannaaniittumut aallartinneqarpoq. Pitsaalluinnartunik karaktereqarpoq, sanaartornermilu suliakkerneqartartuni mekanikeritut ilinniakkani naammassivaa, Kalaallit Nunaanneersut ilinniartuusartut akornanni angusarissaarnerpaalluni, pisortaq Jens Jensen oqaluttuarpoq.

Erne Lange Olsen ukiorpassuarni inuusuttunik ilinniartitsinermik pingaartitsisimavoq, suliffeqarfimmilu inuusuttunut maligassiuilluartuulluni.

- Inuusuttorpassuit ilinniakkaminnik naammassinnittartut taassuma ikiortarpai, Jens Jensen oqarpoq.

Pisortap aamma Erne Lange Olsen inunnguuserisaminik piginnaanertuutut taavaa.

- Suliassat aallartitani tamaasa ilikkartarpai, poqersuullunilu. Kikkunnut tamanut inussiarnersuuvoq, quiasaallaqqissuulluni nuannaartuaannarlunilu.

- Ernip pissusii allat uku erseqqissartariaqarpakka: silassorissoq, inussiarnersoq, poqersoq, alapernaatsoq, sapiitsoq suliaminullu tunngatillugu pikkorinnerpaajuaannarluni, Jens Jensen oqarpoq.

Angutit pingasut — suleqatigiilluartut

Suliffeqarfimmi sanaartornermik suliakkerneqartartumi qulaanit aqutsineq taamaatinneqarpoq. Erne Lange Olsenip piginneqataalerneratigut maannamut sulisut pingasut piginneqataalerput. Bjarke Fuglsang Cortes aamma Mads Nørgaard KJ Greenlandimut siorna piginneqataalerput. Piginnittut allat tassaallutik KJ-imik pilersitsisut, pisortaanerit Jens Jensen aamma Karl Jensen, kiisalu aningaasaqarnermut pisortaq Palle Bendtsen.

„Ernep Mads aamma Bjarke peqatigalugit KJ Greenland suliffeqarfittut nutaalianngortissavaat, pilerinartunngortillugu inuusuttunit ilinniarfigerusunneqalersillugu suliffigerusunneqalersillugulu, Jens Jensen oqarpoq.

Erne Lange Olsen sooq piginneqataalernersoq aperineqarami, pisortaaneq ima akivoq:

- Siunissami kinguaariit nikinnissaanni, Bjarkemut Mads-imullu tulluartuugami. Angummik aap, angutinik pingasunik, piginnaasalinnik nassaarisimavavut. Misigisimavugummi KJ taakkuninnga siuttoqarluni ukiorpassuarni ingerlatsisinnaassasoq, Jens Jensen oqarpoq.

Erne Lange Olsen ilaqutariinni kisimi suliffeqarfimmi sulinngilaq. Angutaa Rudo Olsen Aasianni allaffimmi ukiuni 17-ini pisortaasimavoq Jens Jensenimullu suleqataalluarsimalluni. Rudo Olsen ukioq manna apriilip aallaqqaataanni soraarninngorpoq.

Erne Lange Olsenip sakiatsiai aamma KJ-imi sulisorineqarput, taakkunani siulleq sanaartugassanik suliakkerneqartartuni formandiulluni aappaalu Aasianni innaallagisserivimmi ruujorilerisunilu immikkoortortami pisortaalluni, suliffeqarfillu taanna KJ-imit affarmik pigineqarluni.

Erne Lange Olsenip nuliaraa Najannguaq Sandgreen Olsen, pingasunillu meeraqarlutik. Qitornaat tassaapput Ivik 18-inik ukiulik Aasianni GU-mi ilinniartoq sunngiffimminilu KJ-imi sulisartoq, Ulu 13-inik ukiulik aamma Niviaq 12-inik ukiulik.

- Ilaqutariit nuannerluinnartut, Jens Jensen oqarpoq.