Greenland Airportsimeersut Hong Kongimut tikeraartut
Kalaallit Nunaannut aqqutinut periarfissat nutaat Greenland Airportsimiit aallartitat ataatsimeersuarnermi Routes World 2025-mi misissorpaat.
United Airlines Jens R. Lauridsenip Greenland Airportsimiillu Nuummi mittarfimmi juunimi tikilluaqquneqarput.
Assi: Oscar Scott Carl
Greenland Airports ataatsimeersuarnermi Routes World 2025-mi peqataavoq. Pisortaaneq Jens R. Lauridsen aamma suliffeqarfimmik ineriartortitsisoq Milan Vraa Namminersorlutik Oqartussat suliffeqarfiutaat sinnerlugu peqataapput. Taama silaannakkut angallannermut tunngasunik tusagassiorfik check-in.dk allappoq.
Hong Kong International Airport Routes Worldimik ukioq manna septembarip 24-aniit 26-anut aaqqissuussisuuvoq, tassanilu mittarfiinniit assigiinngitsuneersut timmisartortitseqatigiiffiit nunarsuarmi tamarmeersut ataatsimoorput.
Greenland Airportsimiit peqataasut timmisartortitseqatigiiffinniit assigiinngitsuneersut Kalaallit Nunaannut timmisartuussisinnaanerannik oqaloqateqarusuttoq, check-in.dk allappoq.
Tusagassiorfiup paasissutissaatai naapertorlugu Greenland Airportsimit tamanna uppernarsarneqarpoq, suliffeqarfimmiillu Routes Kalaallit Nunaata nittarsaannissaanut periarfissatut immikkorluinnaq ittutut isigineqartoq oqaatigineqarluni.
Greenland Airportsip aqqutit nutaat pillugit, Nuummi nunanit tamalaanut mittarfimmut Ilulissanilu mittarfissuassamut tunngassuteqartut, suleqatigisinnaasaminnik ujaasisut Sermitsiamut uppernarsarneqareernikuuvoq, Greenland Airportsilli timmisartuutileqatigiiffiit sorliit pineqarnersut itisiliiffigiumanikuunngilai.
