Greenland Rubymi piginnittuuneq: – Rubinimik suliniut suli upperaarput

– Rubininik suliniut suli upperaarput. Pissarsisoqartariaqarpoq tuniniaanermi (rubininik safirinillu, aaqq.) ikiuussinnaasunik.

Frode Nilsen Norgemi entreprenørit aatsitassarsiornermillu ingerlatseqatigiiffissuarmi LNS-imi Greenland Ruby DK Aps-imi pingaarnertut piginnittuusumi pisortaaneq Sermitsiamut oqarpoq.

Suliamut oqaaseqarpoq rubininik ingerlatseqatigiiffiup siulersuisuisa rubininik suliffeqarfiup aningaasaqarnikkut sakkortuumik tatineqartup iluarseqqinniarneratigut akilersuinerup unitsinneqarnerata nalaani inatsisitigut suliaq aallartereeraallu.

Suliffeqarfik akiliisinnaajunnaaqqajaavoq. Norgemi internetimi tusagassiuutimut AT.no-mut oqarpoq:

– Suleqataasussamik nutaamik pissarsinissarput neriuutigaarput.

Taamaalillutik Norgemi piginnittut rubininik suliffeqarfik aningaasaliisussamut nutaamut tamakkiisumik ilaannakuusumilluunniit ingerlatseqatigiiffimmik tigusisussamut tuniniarlugu sulissutigigaat.

– Suliniut suli annertuumik upperaarput. Periutsilli eqqortut nassaarisariaqarpavut. Suleqatissamut tamakkiisumik ilaannakuusumilluunniit tuniniarneripput suli akisinnaanngilara, Frode Nilsen Sermitsiamut oqarpoq.

Norgemi aningaasaliisut pisuut tallimat LNS aamma qatanngutigiit Adolfsenikkut katillugit piginneqataassutit 88 procentiinik piginnittuusut siuttoralugit, Nalik Ventures 12 procentimik piginnittuuusoq peqatigalugu katillugit 1,5 milliardit NOK missaannik Kalaallit Nunaanni rubinisiornissaarsuarmut ajalusoortumut aningaasaliisimapput. Assigaat 950 millionit DKK. Aningaasaliinerit taakku tamangajammik 0-nngortinneqarput, Greenland Rubymit tusagassiuutinut nalunaarummi allassimavoq.

Tyt Mogensen: - Silatusaarneruvoq

Namminersorlutik Oqartussat suliniutinut ingerlatseqatigiiffiata Nalik Venturesip rubininik ingerlatseqatigiiffimmi aningaasaliissutit taarsigassarsiallu 50 millionit koruuninik annikillivai, pisortaaneq Thomas Tyt Mogensen Sermitsiamut ilisimatitsivoq.

Taassuma oqaatigaa, Greenland Ruby piiaaffimmik silatusaartumik ingerlatsisimasoq, rubininilli safirinillu tuniniaanermi ajutoorsimalluni.

– Tuniniaanermi ikiortaasinnaasumik aningaasaliisussarsiorneq silatusaarneruvoq. Isumaga malillugu tamanna ingerlatseqatigiiffiup kivinniarnerani eqqortuliorneruvoq. Neriuppunga rubininik ingerlatseqatigiiffik nutaanik aningaasaliisussarsissasoq. Maannamut piginneqataanerput attatiinnarallarparput. Ingerlatseqatigiiffiup iluarseqqinniarnera iluatsippat nutaamillu aningaasaliisussarsilluni, tamanna nuannissagaluaqaaq. Neriuppunga kingunerissagaa, Nalik Ventures pissarsissasoq Kalaallit Nunaanni suliffeqarfinnut allanut aningaasaliinermut atorneqarsinnaasunik, oqarpoq.

Akilersuinerit unitsinneqartut

Frode Nilsen arlaleriarluni Sermitsiamut Kalaallillu Nunaanni Norgemilu tusagassiuutinut allanut oqartarsimavoq nammineq Norgemilu piginnittut allat rubininik suliniut upperigitsik. Naak Greenland Ruby ukiuni arlalinni aningaasaqarnikkut ajalusoorluinnarsimagaluartoq.

Rubininik suliffeqarfiup piffissaq kingullerpaaq atorlugu akiliisinnaajunnaarnissaq pinngitsoortinniarpaa. Ingerlatseqatigiiffiup siulersuisuisa sapaatit akunnerani ataatsimi tamanit ilisimaneqartutuut Københavnimi Sø- og Handelsrettenimut iluarseeqqinnissamik kissaatigisartik tunniussimavaat. Greenland Ruby DK-p Kalaallit Nunaanni ingerlatseqatigiiffii Greenland Ruby A/S aamma LNS Greenland A/S tamatuma saniatigut Nuummi pigisanik agguaassisarnermut eqqartuussivimmut akilersuinerup unitsinneqarnissaa qinnutigisimavaat.

Tamanna pivoq rubininik suliffeqarfik ukiuni arlalinni akiitsunik annertuunik ilungersuuteqareersorlu, annertuumik annaasaqarluni amigartooruteqarlunilu. Greenland Rubyp akiitsoqarfimminut aningaasatigut pisussaaffiit naammassisinnaanngilai, akilersuinerullu unitsinneqarneranut atatillugu akilersuinerit kinguartinnissaat qinnutigalugu.

Ingerlatseqatigiiffiup akiitsoqarfiisa annersaat New Yorkimi Nebari Natural Resources Credit Fund ilaatigut aatsitassarsiornermut aningaasaliisartoq isumasioqatigalugu Greenland Rubymi siulersuisut aalajangerpaat rubininik suliffeqarfiup iluarseqqinniarnissaata aallartinnissaa.

– Nalinginnaasumik iluarseeqqinniarneq naammassineqartarpoq periusissiornikkut piginnittunut nutaanut tunisilluni. Tunineranit pissarsiassaq siullertut atorneqartarpoq iluarseeqqinniarnermut aningaasartuutit akilerneqarnerannik tamatumalu kingorna suliffeqarfiup akiitsoqarfiinut tamakkiisumik ilaannakuusumilluunniit akiliineq.

Taama tusagassiuutinut nalunaarummi Greenland Ruby ilaatigut allappoq.

Frode Nilsen oqarpoq ilisimanagu rubininik suliffeqarfik USA-mi aningaasaateqarfimmut qanoq annertutigisumik akiitsoqarnersoq.

– Naluara, oqarpoq.

Maannamut nunarsuarmi niuerfimmi rubininik safirinillu kaaviiaartitsineq rubininik ingerlatseqatigiiffimmut annertuumik annaasaqarfiusimavoq.

Norgemi naatsorsuutit rubininit tatineqartut

LNS-ip rubininik suliniut 2017-imi tiguaa. Tamanna pivoq anguniarneqarluni akilersinnaasumik piujuartitsillunilu Kalaallit Nunaanni ujaqqanik erlinnartunik piiaanikkut. 2022-p naalernerani aatsitassarsiorneq matuneqarallarpoq ingerlatseqatigiiffiup aningaasartuutai ataavartut annikillisinniarlugit. Kingorna ingerlatseqatigiiffiup toqqorsivimmiititai annertuut tunineqarsinnaasimanngillat.

Greenland Rubyp 2023-imut naatsorsuutit suli saqqummiutinngilai. 2022-mi akileraareerluni 355 million koruuninik amigartoortoqarpoq.

Kalaallit Nunaanni rubininik suliniuteqarnerup kinguneraa Norgemi entreprenørit aatsitassarsiortullu ingerlatseqatigiiffissuata siorna annikitsumik millioninik marlunnik kisitsisitalimmik amigartoornera naak Norgemiut aningaasaanni 3,1 milliardit koruunit kaaviiaartikkaluarlugit, 1,9 milliardit DKK nalingannut.