Tuluit aatsitassarsioqatigiiffiat GreenRoc Mining, GreenRoc Strategic Materialsimik taaguuteqaleqqammersoq, Nanortallip eqqaani qeqertami Amitsumi grafitimik piiaanissamik suliniuteqarnerminut suli isumalluarpoq.
Suliffeqarfik ullumikkut aatsitassarsiornermik ingerlatsiviinnaanngitsoq atermik allanngortitsinermut atatillugu pisortaaneq Stefan Bernstein oqarpoq.
Tuluit aatsitassarsioqatigiiffiat GreenRoc Mining, GreenRoc Strategic Materialsimik taaguuteqaleqqammersoq, Nanortallip eqqaani qeqertami Amitsumi grafitimik piiaanissamik suliniuteqarnerminut suli isumalluarpoq.
Suliffeqarfik ullumikkut aatsitassarsiornermik ingerlatsiviinnaanngitsoq atermik allanngortitsinermut atatillugu pisortaaneq Stefan Bernstein oqarpoq.
– Grafit aatsitassatut piumaneqartorujussuuvoq, biilillu batteriinut, saviminernik atomreaktorinilu sananermi atorneqartarpoq, tamannalu atitsinni ersersinniarparput, Stefan Bernstein oqarpoq, taassumalu piffissami kingullermi tunisassiaminik tuniniaanermi niuerfiit paasisaqarfiginerujumallugit piffissarujussuaq atorsimavaa.
– Amitsumiit grafitimik akuiakkamik maannatut tunisassiussagutta Kinamut taamaallaat tuniniaasinnaavugut. Taakkuuppummi kisiartaallutik grafitimik anodeliortartut, tassa biilit batteriinut assigisaannullu atorneqartartunik. Taamaattumik siunertaqarpallaanngilaq grafitsip Kalaallit Nunaanniit Kinamut umiarsuarmik assartuuteriarlugu europamut niuerfimmut assartuuteqqinnissaa. Taamaattumik Europami tunisassiorfiliorluni periutsip ineriartortinnissaanut grafitimik piareersaalluni niuerutissatut periarfissatut soqutiginarpoq.
Europami tunisassiorfik
Kalaallit Nunaanni tunisassiorfiliornissaq periarfissaanngitsoq Stefan Bernstein oqarpoq. Tunisassiorneq nukissamik annertuumik atuisarmat kemikaliat assigiinngitsut pisariaqartinneqartarmata Kalaallit Nunaanni peqalernissaq tulluanngilaq.
- Tunisassiorfik taamaattoq tamakkuninnga suliaqarnermik sungiusimasallit akornannut inissinneqassaaq. Kemikaliat tusindinik arlalinnik annertutigisut ukiumut pisariaqartinneqassapput, taakkulu Kalaallit Nunaannut umiarsuamik assartuunneqassanngillat.
Kemikaalianik atortussiassanik akulerunnerat ajornakusoortoq
Suliffeqarfiup misissuineranit paasinarsivoq grafiti anodip akuliunnissaanut piareersaaneq pisariulluinnartoq, maskiinanik atuinertaa taavalu kemikalianik akoorineq.
– Kinami akuutissaq flussyre kemiskiusumik suliaqarnermi maanna atorneqartarpoq. Flussyre arrortitsinikkaarujussuuvoq, ilaatigut igalaaminernik arrortitsisinnaasutut ilisimaneqarluni. Uagulli sakkukinnermik atuisinnaanissaq sulissutigaarput; tassa natriumhydroxid, amerlasuut kuuffinnut saliutitut nalunngisaat. Suli arrortitsisinnaavoq, kisianni Flussyretulli sakkortutiginngilaq, Stefan Bernstein oqarpoq.
GreenRoc grafitsimik piiaavik tamakkiisumik ingerlappat ukiumut saffiugassiassamik 400.000 tonsinik piiaasinnaassasoq naatsorsuutigineqarpoq, taakkunannga 80.000 tonsinik grafiti minguitsoq piiarneqarsinnaassalluni.
Aningaasaliisut arriitsut
Stefan Bernsteinilli oqarnera naapertorlugu aningaasaliisut maanna arriisaarput.
– Aningaasat pisariaqartinneqartut pissarsiariniarlugit maanna sulissuteqarpugut, aningaasaliisartullu kingaapput. Iluatsissaqqaarpoq, maannali nunarsuarmi eqqissiviilliortoqartillugu niueqateqarniarneq ajornakusoorpoq. Aningaasaliisartut tunuartiterput suliffeqarfinnullu tunisassiulernissamik ukiualunnik suli pisariaqartitsisunik aningaasanik nassaarniarneq ajornakusoorneruvoq. Maannali EU-mi EU’s Raw Materials Act-imut pilersaarusiamik suliniummik qinnuteqarpugut, aammalu aatsitassanut qaqutigoortunut taavalu ataavartumik nukissiuutinut inuussutissarsiornermi EU-p ataatsimiititaliarsuata Naalakkersuisullu aaqqiissuussaani Nuummi septembarip 30-aniit oktobarip sisamaata tungaanut pisussami ataatsimiinnermi siullermi ilaatigut peqataassalluta.
- Suliniutip pitsaassusaa qularutigineqassanngilaq. Grafitsi nunarsuup ilaani sumiiffitsinni pisariaqartinneqartorujussuuvoq. Suliami tassani piginnaasat ineriartortinnissaat pingaaruteqartupilussuuvoq, tassa kinamiut taakkununnga aqutsinerannit aninguisinnaagutta, Stefan Bernstein oqarpoq.
