Nuummi mittarfiup nunanit tamalaanit tikiffigineqarsinnaasup
ammarneqarnerani takornariallu amerliartupiloornerat pissutigalugu
Grønlandsbankenip Kalaallit Nunaanni takornarialerisut
taarsigassarsisitsinissamut periarfissaq nutaaq pilersippaa.
Grønlandsbankenip 100
millionit koruunit siunertamut immikkoortippai, takornarialerisullu
nutaamik aallartitserusuttut – imaluunniit suliniutiminnik
annertusaarusuttut – immikkut pitsaasumik atugassaqartitsilluni
taarsigassarsisitsinissamut neqerooruteqalerpoq.
Nuummi mittarfiup nunanit tamalaanit tikiffigineqarsinnaasup
ammarneqarnerani takornariallu amerliartupiloornerat pissutigalugu
Grønlandsbankenip Kalaallit Nunaanni takornarialerisut
taarsigassarsisitsinissamut periarfissaq nutaaq pilersippaa.
Grønlandsbankenip 100
millionit koruunit siunertamut immikkoortippai, takornarialerisullu
nutaamik aallartitserusuttut – imaluunniit suliniutiminnik
annertusaarusuttut – immikkut pitsaasumik atugassaqartitsilluni
taarsigassarsisitsinissamut neqerooruteqalerpoq.
– Aqqusinermi
takusinnaavarput siornatigumut sanilliullugu takornariat
amerleriarujussuarsimasut. Maannakkut neqeroorutinik
aallartitsinissamut annertusaanissamulluunniit piffissaalluarpoq
misigisanik suli pisuunnguallaataasinnaasunik annertusaanissamut –
tamatumalu peqatigisaanik takornariaqarneq aningaasarsiutigineqarnera
annertusarneqarsinnaalluni, Grønlandsbankenimi pisortap tullia John
Jakobsen oqarpoq.
Taarsigassarsiat
takornariartitsisartunut naleqqussakkat 1 millionit koruunit
tikillugit ukiumi siullermi erniaqartinnagit
taarsigassarsissutaasinnaapput. Tamatuma kingorna erniat
qaffakkiartuaartussaapput – ukiup aappaani 1 procentimiit ukiup
tallimaanni kingulliusumilu 4 procentiussalluni.
– Akikitsumik
neqerooruteqarpugut, nalunnginnatsigu aallartinneq
aningaasarsiornerlu aallaqqaammut ajornakusoorsinnaasut, pisortap
tullia nassuiaavoq.
Angalatitsivinnut
misigisassarsiortitsisunullu taarsigassarsisitsisarneq
Takornariartitsinermut
taarsigassarsiat takornariartitsisartunut mikisunut akunnattumillu
angissusilinnut neqeroorutaavoq - unnuisarfiit akunnittarfiillu
matumani pineqaratik. Taarsigassarsititsinissamummi neqeroorummi
angallassisartunut aammalu aallarnisaasunut sammitinneqarpoq:
pisuttuarluni misigisassarsiornerit, umiatsiamik angalaarnerit,
kangerlunni tammaarsimaartitsinerit imaluunniit sineriammi
sammisassaqartitsinerit matumani pineqarlutik.
– Matumani pineqarput
inuit takornarianut angallassissutissaminnik pisisussat imaluunniit
kangerlummi tupeqarfimmik pilersitsinissaminnik siunertaqartut.
Tassaasinnaapput takornarianik angallassisartut
pisuttuaqatigiinnermik neqerooruteqartut. Misigisassat taamaattut
tapersersorusuppagut, John Jakobsen oqarpoq, silamilu
takornariartitsinerup ineriartortinneqarnissaata pingaaruteqarneranik
erseqqissaateqarluni.
Taarsigassarsiniartunut
piumasaqaatit pingasut
Grønlandsbankenip
taarsigassarsisitsinissamut piumasaqaatit pingasut
naammassineqassasut erseqqissaatigaa: niuernermut pilersaarut,
tassanilu piujuartitsinissaq aallaavigineqassalluni, aamma
takornariaqarnermut inatsimmik, upernaaq akuerineqartumik malinninneq
piumasaqaataapput.
- Niuernermut
pilersaaruteqartariaqarput, siunnerfigisap aningaasaqarnikkut imminut
akilersinnaaneranik takutitsisumik. Piujuartitsinermut
tunngassuteqassaaq, suliniutiginiakkami pinngortitap avatangiisillu
qanoq illersorneqarnerat, pinngortitamillu illersuinissamik
siunertaqarnermik takussutissalik. Kiisalu suliniut Kalaallit
Nunaanni takornariaqarnermut inatsimmik, 2025-mi upernaakkut
atuutilersumik, malinnittuussaaq, John Jakobsen oqarpoq.
–
Inuussutissarsiornermut siunnersortivut tamarmik piujuartitsisumik
niuernermik ineriartortitsinissamut allagartaqarput. Pinngortitap
allanngutsaalinissaa pingaaruteqarpoq, taanna erseqqissaavoq.
Taamaattumik piujuartitsinermut naatsorsuutit
suliarineqarsinnaasariaqarput.
Suliniutinik nutaanik
aallartitsinissamut taarsigassarsiat
Angalatitsiviit
ingerlareersut takornariaqarnermut taarsigassarsiarisimasatik
nutaamut taarsigassarsianut nuutsissinnaanngilaat, nutaamilli
ingerlatsilerunik qinnuteqarsinnaapput.
- Umiatsiaqarunik
takornarianik angallassissutaasartumik tammaarsimaartarfimmillu
kangerlummi angallassisarunik taava taarsigassarsiniarsinnaapput.
Suliniulli nutaajusariaqarpoq, John Jakobsen oqarpoq.
Grønlandsbankenimi
atuisut tamarmik taarsigassarsiniarsinnaapput, aningaaserivillu
saaffiginnissutinik tigusisalereersimavoq. Soqutiginninneq
annertusiartussasoq naatsorsuutigineqarpoq, pingaartumik aamma
Ilulissani mittarfik nutaaq timmisartunit nunanit tamalaaneersunit
tikiffigineqarsinnaasoq atuutilerpat.
– Takoreerparput
umiatsianik angallanneqarnissamik kissaateqarneq annertusoq –
isumaqarpugullu tamanna annertusiartornissaanik periarfissaqartoq.
Nuummiit Qeqertarsuup Tunuatigoorluni Uummannaq tikillugu, Tunumilu
Tasiilamut. Kujataani Qaqortumi Nanortalimmilu umiatsiamik
angallassilluni takornariartitsisoqarluartartoq aamma nalunngilarput.
Takornariaqartuartillugu isumassarsianillu pitsaasunik
peqartoqartillugu tapersersuinissamut piareersimavugut, pisortap
tullia John Jakobsen naggasiivoq.
