Nuna
tamakkerlugu takornariartitsinermik suliaqartut misigisassarsiorluni
nioqqutinik nutaanik aallartitsinissamut aningaasaliissuteqarusukkunik maanna
Grønlandsbankenimut takornariartitsinermut taarsigassarsinissamut
qinnuteqarsinnaalerput.
Tamanna Visit Greenlandip nuannaarutigaa.
Nuna
tamakkerlugu takornariartitsinermik suliaqartut misigisassarsiorluni
nioqqutinik nutaanik aallartitsinissamut aningaasaliissuteqarusukkunik maanna
Grønlandsbankenimut takornariartitsinermut taarsigassarsinissamut
qinnuteqarsinnaalerput.
Tamanna Visit Greenlandip nuannaarutigaa.
– Aningaasanik
pissarsiniarneq suliffeqarfinnut mikisunut akunnattunullu piujuartitsisumik
misigisassarsiorfissanik ineriartortitserusuttunut sivisuumik akornutaasutut
oqaatigineqartarsimavoq – ingammik isorliunerusuni, Visit Greenlandimi pisortaq
Anne Nivíka Grødem oqarpoq.
Grønlandsbankenip
takornariartitsinermut taarsigassarsiisitsisinnaanera nutaaq katillugit 100
millionit koruuninik aningaasartaqartoq kalaallinut takornariartitsisartunut
nutaamik aallartitserusuttunut imaluunniit suliniutinik annertusaarusuttunut
naleqquppoq. Ukiumi siullermi 1 millionit koruunit tikillugit erniaqanngitsumik
taarsigassarsisoqarsinnaavoq, tamatumalu kingorna erniat ukiuni sisamani
tulliuttuni qaffakkiartuaassapput. Taarsigassat taamaalillutik
takornarialerisut aallartisaanissaannut periarfissaalluarput.
Piujuartitsinermut takornariaqarnermullu
inatsimmut naapertuuttoq
Visit Greenlandip aningaasatigut atugassarititaasut kisiisa
nuannaarutiginngilaat, aammali piujuartitsineq takornariartitsinermullu
inatsimmik malinninneq pingaartippaat.
- Taarsigassarsiat ineriartornermut tunngaannanngitsut aammali
piujuartitsinermut ersarissunik piumasaqaatillit nuannaarutigeqaakka.
Nutaanngortitsinissamik periusitsinnut naapertuuppoq, tassani
takornariartitsinerup inuiaqatigiinnut pinngortitamullu iluaqutaanissaa
sulissutigaarput, Anne Nivíka Grødem oqarpoq.
Taarsigassarsinissamut periarfissaq isumassarsianik pitsaasunik
piviusunngortitsinissamut kajumississutaasinnaasoq taanna isumaqarpoq.
– Sulinitsinni inuit nuna tamakkerlugu oqaloqatigiuarpavut,
nalunngilarpullu isumassarsiarpassuaqartut. Periarfissarpassuaqarpoq – kisianni
takornariartitsinerup ineriartornissaa anguniarlugu iliuuseqartoqartariaqarpoq.
Isumaqarpugut taamatut aningaasaliinikkut suliaqartut amerlanerusut
isumassarsiaminnik piviusunngortitsinissamut sapiissuseqalersinnaasut –
isumassarsiat misigisassarsiornermik aningaasarsiornermik nukittorsaasussatut,
tamatumalu saniatigut ineriartornerup Kalaallit Nunaanni pinissaa qulakkeerneqartoq,
taanna oqarpoq.
Takornariat
amerliartortillugit pisariaqartitsineq annertusiartortoq
Nuummi
mittarfittaarsuup ammarneqarnerani takornariallu amerliartupiloorneranni
misigisassarsiorfissanik nutaanik pitsaanerusunillu pisariaqartitsineq
annertusiartorpoq.
– Siornatigornit takornariat
amerleriarujussuarsimasut aqqusinermi takusinnaavarput. Maannakkut
sammisassanik misigisasanillu suli pisuunnguallaataasinnaasunik
aallartitsinissaq pineqarpoq – tamatumalu peqatigisaanik takornariaqarneq
aningaasarsiutigineqalerpoq, Grønlandsbankenimi pisortap tullia John Jakobsen
nassuiaavoq.
Grønlandsbankenip
takornariaqarnermut taarsigassarsisitsisarnera Visit Greenlandip nuna
tamakkerlugu piujuartitsisumik takornariaqarnerup ineriartortinneqarnissaanut
pingaarutilimmik tapersiivoq.
