Halibut Greenlandip ukiumoortumik naatsorsuutai appariarput
Halibut Greenlandip 2023-mi ingerlatsinermi angusai ukiup siulianut sanilliullugit affaat sinnerlugit ikileriarput, ukiumullu angusat 11,2 millionit koruuniupput – 2022-mut sanilliullugu 8 millionit koruuninik ajornerullutik.
Aalisakkanik tunisassiat assigiinngitsut akii appariaraluartut Halibut Greenland 2023-mi sinneqartooruteqarpoq
Leiff Josefsen
Halibut Greenlandimi 2023-mi ukiumut angusat “naammaginarpianngitsutut” aqutsisut isigaat. 2023-mi pitsaanerusumik suliarinninnissamik taamaalillunilu akisunerusumik tunisisinnaanissamik kissaat eqquutinngilaq, tamannalu angusat ajornerulernerannut nassuiaataavoq.
Qalerallit, saarulliit, qeeqqat, suluppaakkat nipisaallu suaat tunisarneri tunisassiornerallu aalisarnermut ingerlatseqatigiiffiup pingaarnerpaatippai. Naak tunisassiat amerlanerusut pisiarineqaraluartut, 2022-mi angusat anguneqarsinnaasimanngillat, tamannalu tuniniaanermi akit appariarneranik pissuteqarpoq, tamannalu aamma aalisarnermik ingerlataqarfinnut anginerusunut, Royal Greenlandimut aamma Polar Seafoodimullu sunniuteqarpoq.
Ukioq mannamut naatsorsuutit
Ukioq manna 10 aamma 11,5 millionit koruunit akornanni sinneqartoornissaq naatsorsuutigineqarpoq, tunisassiassanik pitsaasunik pilersuisoqarnissaa ingerlatseqatigiiffiup suli naatsorsuutigigamiuk. Qalerallit saarulliillu pisiarineqartut suliarineqarluarnerulernissaat aqutsisut suli ukkatarigaat, ukiumoortumik nalunaarusiami allassimavoq.
Ingerlatseqatigiiffiup akiitsui tamarmik amerlisimapput maannalu 28 millionit koruuniullutik, taakkunannga piffissami sivikitsumi akilersugassat 16,4 millionit koruuniupput piffissamilu sivisuumi akilersugassat 11,6 millionit koruuniullutik. Nammineq aningaasaatit 57,8 millionit koruuniupput.
Immikkoortortaqarfik matusoq
2023-p ingerlanerani immikkoortortaqarfik Uummannaq Seafood A/S nammineq kajumissutsimik matuneqarpoq.
- Ukiuni kingullerni Uummannaq Seafood A/S-imi annaasaqartitsineq matussuserniarlugu Halibut Greenland ApS iliuuseqartuarpoq. Uummannaq Seafood A/S-ip namminneq kajumissutsimik matuneqarneranut atatillugu akiitsut pingaarnerit akiitsugaqarfiup isumakkeerfigisimavai. Tamanna pissutigalugu Uummannaq Seafood A/S-imi annaasaqarnermut matussusiinissamut siusinnerusukkut qularnaveeqqusiinermut Halibut Greenland ApS-ip immikkoortissimasani 2.916.000 koruunit utertippai, naatsorsuutit ilanngussaanni tamanna atuarneqarsinnaavoq.
Maajip arfineq-pingajuanni ingerlatseqatigiiffiup ataatsimeersuarnerani ukiumoortumik nalunaarusiaq akuerineqarpoq.
