Iffiorferalak cafémik ammaanissamik takorloortakkamut aallarniutaasoq

Iffiorferalaap isaariaani mikisumi saaffiginnittarfimmi nerriviusaqarpoq patitittakkamik, tassanilu Vilhelm Willumsen iffiukkaminik seernarsaqqaakkanik, boor'lunik seernarsaqqaakkanik aamma kaffimik qalarlaamik pisisartuminut tuniniaasarluni. 

Sapaatip akunneranut ulluni sisamani, sisamanngornermit sapaammut nalunaaqutaq 09.00-imit 14.00-imut ammasarpoq, tallimanngornermilu sivisunerusumik ammasarluni 07.00-imit 17.00-imut ammasarami.

- Iffiorferalak pisisartunit ilassilluarneqaqaaq, Vilhelm Willumsen oqarpoq, taassuma seernarsaqqaakkanik iffiorfik decembarimi ammarpaa.

Suliffeqarfik taanna kisimiilluni ingerlataraa, nuliaminit Ivilunamit, nunaqarfinni atuarfinnut ungasianit qarasaasiakkut atuartitsinermik suliaqartuusumit, meeqqaminnillu iffioqataasartunit iffiukkanillu seernarsaqqaakkanik tuniniaanermini ikiorneqartarluni. Tuniniagai pisisartunit piumaneqarluartarput.

- Iffiorfimmik ammaaneq naatsorsuutigisamit ingerlalluarneruvoq. Piareersarninni qajuusanik puunik sisamanik seernarsaqqaakkanik iffiornissannut atugassannik inniminniigama, naatsorsuutigalugu taakku qaammammut siullermut naammassasut. Taakkuli sapaatip akunnerani siullermi nungupput, Vilhelm Willumsen nuannaarluni tupaallassimallunilu oqarpoq.

-Namminersortunngorluni nuanneqaaq, taamaalillungami piffissaq ullullu suliffissakka nammineerlunga pilersaarusiorsinnaasarakkit, oqarpoq.

Iffiukkanut seernarsaqqaakkanut ilisimasat

Iffiukkat seernarsaqqaakkat qanoq pilersinneqartarnersut, Vilhelmip nuliatalu Ivilunap iffiorferalammi takutippaat. Immersagaq angisooq akimut ersittoq seernarsakkamik puaasartumik imalik takutippaat, taanna qajuusanik assigiinngitsunik marlunnik akuukkanik imermillu pilersitaavoq. 

Pileriartortarnera nassuiarpaat seernarsakkap ulluni arlalinni uninngatillugu seernarsakkap seernarsarnerani ”nerisillattaaneqartarpoq”, naggataagut iffiorfimmi ”aalartillugu” uunneqannginnermini ammalorsariarlugu koorimi pullasserneqassalluni.

- Seernarsaammik suliaqarneq ilisimatusaqqaagassaavoq, Iviluna Willumsen oqarpoq, nassuiaallunilu seernartoq naamut pitsaasuusoq, tassami seernartup akui iffiukkamit nalinginnaasumik pullassikkamit pullassaateqarnerusarmata.

Seernarsakkamik iffiukkat nerisat arrorsarnerinut iluaqusiisarput iffiukkanillu nalinginnaasumik qapulimmit naamut pullanganannginnerulluni.

Nuliariit Danmarkimi najugaqartillutik, Vilhelmip igasunngorniarnerata nalaani, seernarsaqqaakkanik iffiorfiit assigiinngitsut ilikkagaqarfiginiarlugit takuniartarpaat. Seernartup pilersinniarnerani silap pissusia pingaaruteqartoq paasisimavaat.

Cafémik ammaanissani takorlooraa

Vilhelm Willumsen Kangaamiuni inunngorpoq, ukiorpassuarnilu Sisimiuni najugaqarsimalluni, allaffimmiutut pisiniarfimmiutullu sulilluni, soorlumi aamma Sisimiuni Jens' Markedimi sulisimasoq. Ukiut arlallit matuma siornagut suliffini allanngortinniarlugu aalajangeriasaarpoq Aarhusimilu igasunngorniarluni aallartilluni. Sabroe Kromilu ilinniarnerminut atatillugu suliffimmik misiliisimalluni.

- Cafémik ammaanissaq takorloortuartarakku, Vilhelm Willumsen oqarpoq.

Takorloortakkaminik cafémik ammaanissaminik pilersaarusiornermini alloriarnertut siullertut seernarsaqqaakkanik iffiorfik Iffiorferalak ammarpaa. Nuliariimmi taanna nammineq akilikkaminnik sukkanerusumik ammarsinnaagamikku, soorlu Nalik Venturesimit tapiiffigineqanngikkaluarlutik. Vilhelmip Iffiorferalak inissiarsuarmit Ceresvejimiittumit, Kommuneqarfik Sermersuumit attartukkaminit ingerlassinnaavaa.

Inissiarsuaq kommunip aasaru isaterniarpaa, taamanikkussamullu Iffiorferalak ininik nutaanik ujaasisariaqassalluni.

- Aallarnisaasunut sullivinnik immaqa ammaassaagut containerinik, tassani cafémik seernarsaqqaakkanillu iffiorfimmik ingerlatsisinnaassalluta, Vilhelm Willumsen oqarpoq.