– Illoqarfik tattulerparput

Kalaallit Nunaata Danmarkillu akornanni tunngavissatut isumaqatigiissummik atsiorneq sioqqullugu, Nuupilummi umiarsualivik pillugu Kujataanut nutaarsiassatsialammik peqartoq oqaluttuariniarlugu, Naalakkersuisut Siulittaasuata Jens-Frederik Nielsenip Kommune Kujallermi borgmesteri Malene Vahl Rasmussen sianerfigaa.

- Qaqortup Narsallu akornanni umiarsualiviliornissamut tunngatillugu uannit Jens-Frederik Nielsen arlaleriarluni tusagaqartarsimavoq, aamma borgmesteriulernerma kingorna, taamaattumillu toqqammavissatut isumaqatigiissummi Nuupiluup toqqaannartumik eqqaaneqarnera uannut tupaallannanngilluinnarpoq, Malene Vahl Rasmussen Sermitsiamut oqarpoq.

Nunami aningaasaqarnermi imminut napatinnerusutut allanngoriartortitsinermut ilalersuuteqartussanik pilersitanut, aningaasaliinernullu nutaanut ukiuni tulliuttuni sisamani Kalaallit Nunaata Danmarkillu akornanni tunngavissatut isumaqatigiissut 1,6 millardit koruuninik immikkoortitsivoq. Isumaqatigiissutip piviusumik attaveqaasersuutini suliniutit marluk eqqaavai: Ittoqqortoormiini nunap immikkoortuani mittarfik, aamma Qaqortumi immami itisuumi umiarsualivik. Oqaaseq ”immami itisuumi umiarsualivik” paatsuungatitsivoq, oqaatsilli Narsamik Qaqortumillu attaviliisumik Nuupilummi ikaartaatinut umiarsualivimmut tunngasuunera pillugu Malene Vahl Rasmussen ilisimatinneqareersimavoq.

Inuussutissarsiorfittut qitiusoqarfik nutaaq

Qaqortumi inuussutissarsiorfik umiarsualiviup eqqaani katersuussimavoq, tamaanilu aalisarnermut tunngasutut suliarisat, suliffeqarfiutillit anginerit marlussuit, aamma ammerivittaqarlunilu mersortarfeqartoq Great Greenland inissisimapput.

Qaqortumi suliffeqarfiit pilersitat aallarterlaallu ukiut arlerlugit inuussutissarsiorfimmi nunaminertanik amerlanernik piumasaqarsimapput, illoqarfilli allaanngilaq ”igap” iluani inissisimasoq, tamaanilu illoqarfiup allanngoriartornissaanut qaqqarsuit portusuut, Tasersuarmi imeqarfiusumut pallitsaaliugaq peqatigalugu pissusissamisoortumik killiliisuupput.

- Illoqarfik tattulerparput, aappaaguli atulertussatut mittarfimmut aqqusineqarnitsigut, aammalu toqqammavissatut isumaqatigiissummit aningaasalissutaasunit ikaartaatinut umiarsualivimmik sanaartorneqartukkut Qaqortup allanngoriartortinnissaanut periarfissanut annertoorujussuarnut tamakku ammaasuupput, Malene Vahl Rasmussen oqarpoq.

Mittarfimmit 8,3 kilometerinik kippasissusilimmi Nuupiluup eqqaani siunissami suliareqqitassanik atortussiornermut, usit puuinut aqqusaartitsivimmut, Atlantikumik ikaarsillutik umiarsuarnut talittarfimmut, piukkunnaatilittullu attaveqaasersuutinut nutaanut inuussutissarsiorfimmut nunaminertat angisuut atugassiarineqarput.

- Qaqortoq tassaavoq umiarsuarnit takornariartaatinit nunami tikikulanerpaaffik, Nuupilummilu tulassinnaanerup kommunimi takornariartitsineq sumiiffimmut anginermut siammartissinnaavaa, Malene Vahl Rasmussen oqarpoq.

Suliap nanginnissaa

Aningaasaqarnermut Akileraartarnermullu Naalakkersuisoq Múte B. Egede, aamma Aningaasaqarnermut Ministeri Nicolai Wammen, naalakkersuisoqarfiit attuumassutillit tamakku peqatigalugit suliniutit taakku marluk piviusunngortinnissaannut tunngavigisassanik qulaajaasussaapput.

Taamaattumik akia pillugu oqaaseqarsinnaaneq siusippallaarpoq, 2020-milli kingullertut akigisassaanut missiliuummi taaneqarput 169 millionit koruunit: Mittarfimmit Nuupilummut aqqusineq 39 millionit koruunit, ikaartaatillu tulattarfii taakku marluk katillugit 130 millionit koruunit. Umiarsuaatilik nammineq ikaartaammik pilersuissaaq.

Nuupilummik umiarsualiviup ineriartortillugulu atugarinerani danskit illersornissamut sakkutooqarfiata erseqqinnerusutut nassuiarneqanngitsumik inissisimaffeqartuunera Jens-Frederik Nielsenip oqaluttuaraa. Sakkutuujunngitsunit, soorlulusooq sakkutuunit atugarisassatut ikkussukkat pisariaqartitat suliniummik annertusaassapput – akiatigut angissusiatigullu.