Sivisuumik
utaqqisoqarsimavoq.
2016-imi
novembarip 21-at: Inatsisartut Naalakkersuisut inatsit tunngaviusussaq pillugu
isumalioqatigiissitamik pilersitsinissamut pisinnaatitaaffilerpaa, taannalu
Kalaallit Nunaanni inatsimmik tunngaviusussamik siunnersuusiussalluni.
KUGLEPENNIT QUNGASEQUTILLU
Nuummi, Narsami, Qaqortumi Nanortalimmilu
innuttaasunik ataatsimiititsinerni sisamani namminiilivinnermut nunanullu
allanut tunngasunut naalakkersuisoq Vivian Motzfeldt tikilluaqqusissaaq,
naalakkersuisoqarfiullu namminiilivinnermut immikkoortoqarfiata nittartagaq
saqqummiutissavaa.
Inatsit tunngaviusussaq pillugu
isumalioqatigiissitami ilaasortaq inatsimmik tunngaviusussatut missingiummik
suliaqarneq pillugu saqqummissaaq.
Innuttaasut tamatuma kingorna
workshopertinneqassapput, naggataatigullu inatsimmut tunngaviusussamut sammisat
attuumassuteqartut taasissutigineqassallutik.
Inatsit tunngaviusussaq pillugu
isumalioqatigiissitap nalunaarusiaa atuaruminartoq innuttaasunik
ataatsimiititsinerni saqqummiussinnaassallugu Vivian Motzfeldtip
neriuutigisimagaluarpaa, namminiilivinnissamulli immikkoortortaqarfimmi sulisut
kingusissukkut atorfinitsinneqarnerat pissutigalugu suliaq kinguaattoorfiuvoq.
Ataatsimiinnermili peqataasut susaarlutik
angerlassanngillat.
Vivian Motzfeldtip kuglepennit,
qungasequt/nasat/siutequtit aamma atuagassiaaraq »Inatsit tunngaviusussaq
pillugu sulineq – naatsumik oqaluttuaralugu« 2020-mi saqqummersinneqartunit
sinneruttut agguaatissavai.
Nuummi Kujataanilu innuttaasunik
ataatsimiititsinerni sisamani misilittakkat Avannaani innuttaasunik
ataatsimiititsinissanut pilersaarusiorneranni atorneqassapput.
kurt@sermitsiaq.gl
Sivisuumik
utaqqisoqarsimavoq.
2016-imi
novembarip 21-at: Inatsisartut Naalakkersuisut inatsit tunngaviusussaq pillugu
isumalioqatigiissitamik pilersitsinissamut pisinnaatitaaffilerpaa, taannalu
Kalaallit Nunaanni inatsimmik tunngaviusussamik siunnersuusiussalluni.
2023-mi
apriilip 28-at: Inatsit tunngaviusussaq pillugu isumalioqatigiissitap
inatsimmut tunngaviusussamut missingiut Ilisimatusarfimmi
nalliuttorsiorpalaartumik tunniuppaa.
2024-mi
aggustip tallimaani: Namminiilivinnissamut nunanullu allanut tunngasunut
naalakkersuisoq Vivian Motzfeldt inatsimmut tunngaviusussamut missingiut
pillugu innuttaasunik ataatsimiititsivoq.
Coronap
ajornartorsiortitsinerata nalaani angalanissamut killilersuinerit,
isumalioqatigiissitami ilaasortat taarseraatikulasut aamma sulisussanik
atorfinitsitsiniarnermi ajornartorsiorfiusumi ukiuni arfineq-pingasungajanni
pisimapput.
30 millionit
koruuninik aningaasartuutit inatsimmut tunngaviusussatut missingiummut 49-nik
immikkoortortaqartumik atorneqarput. Kalaallisut 299-inik qallunaatullu
278-inik quppernilik – katillugit 577-inik quppernilik.
Naammassilertorporli.
Innuttaasunik ataatsimiititsinerit sisamat
Augustip
aallartinnerani sisamariarluni innuttaasunik ataatsimiititsinerni Vivian
Motzfeldtip inatsimmut tunngaviusussamut siunnersuut innuttaasunut
inuiaqatigiinnullu tamanut saqqummiutissavaa.
Augustip
arfernat: Nuummi katersortarfimmi.
Augustip
arfineq-pingajuat: Qaqortumi katersortarfimmi.
Augustip
qulingiluaat: Narsap timersortarfiani.
Augustip
qulingat: Nanortalimmi katersortarfimmi.
– Kalaallit
Nunaata namminersulivinnissaanut inatsimmik tunngaviusussamik suliaqarnerup
ingerlateqqinnissaani innuttaasut aalajangiisuunissaat pingaaruteqartoq
Naalakkersuisut isumaqarput, Vivian Motzfeldt erseqqissaavoq.
Nuummi,
Qaqortumi Narsamilu soqutigisaqaqatigiit soorlu aalisartut piniartullu
kattuffiat KNAPK, sulisartut kattuffiat SIK, Sulisitsisut aamma
kommunalbestyrelsimut ilaasortat Vivian Motzfeldtip aamma
ataatsimeeqatigissavai.
Vivian
Motzfeldtip allatsini immikkoortortamilu pisortaq angalaqatigissavai.
Angalasut
Inatsit tunngaviusussaq pillugu isumalioqatigiissitamut ilaasortamik ataatsimik
ilaqassapput, isumalioqatigiissitap 2023-mi marsip 31-anni
atorunnaarsinneqarnerani ilaasortaasut tassaapput siulittaasoq Ineqi Kielsen
kiisalu Jens Erik Kirkegaard aamma Mari Kleist.
Inatsisartuni
partiinit tallimanit sinniisut innuttaasunik ataatsimiititsinernut
peqataanissamut neqeroorfigineqarput.
Pitsanngorsagassaqartoq
Vivian
Motzfeldtip inatsit tunngaviusussamut siunnersuut suliatut pitsaasutut taavaa,
kisianni suli pitsanngorsagassaqarluni.
Missingiummi
inatsisinut tunngatillugu oqaatsit atorneqartut misissoqqissaagassaapput,
soorluttaaq quppernerpassuit atuaruminarsarneqarnissaat pisariaqartoq.
Tamannali
ajornaatsuinnaanngilaq.
2023-mi
septembarimi Naalakkersuisut akisussaaffiinik allannguisoqarmat, inatsimmut
tunngaviusumut suliaq Naalakkersuisut siulittaasuannit Múte B. Egedemit
naalagaaffinngornissamut nunanullu allanut tunngasunut naalakkersuisumut Vivian
Motzfeldtimut nuunneqarpoq.
Sulisorpassuilli
nuunnermut ilaanngillat, namminiilivinnissamulli immikkoortortaqarfimmi
sulisussanik inissiinissaq naatsorsuutigineqartumit sivisuneruvoq. Atorfillit
siulliit marluk marsip apriilillu aallaqqaataanni sulilersinneqarput.
Rå og uredigeret udgave
Inatsimmut
tunngaviusussatut siunnersuut oqitsuinnaanngilaq, Vivian Motzfeldtillu apriilip
22-ani Inatsisartuni Inatsisinut Ataatsimiititaliamik ammasumik
isumasioqatigiinnermi Inatsit Tunngaviusussaq pillugu isumalioqatigiissitap
isumaliutissiissutaa naatsumik atuaruminartumillu saqqummersinniarlugu
oqaatigaa. Namminiilivinnissamut immikkoortortaqarfiup suliaq aallartereerpaa,
naatsorsuutigaali aatsaat ukiaru atuaruminarnerusumik saqqummersitsinissaq.
Taamanikkussamullu kikkunnut tamanut nassiunneqassaaq.
Aammattaaq
immikkoortortaqarfimmi nittartagaq piareersarneqarpoq, nittartakkamili
paasissutissanik suliaqarneq kinguaattoorfiuvoq.
Aamma
inatsimmut tunngaviusussatut siunnersuutip pitsaassusiata qulakkeernissaanut
piffissaqanngilaq, taamaattumillu innuttaasunik ataatsimiititsinerni
allanngortinneqarani saqqummiunneqassaaq. Iluaqutissartaraa
ataatsimiititsinerni peqataasut Kalaallit Nunaata inatsisissaanut
tunngaviusussamut namminneq isumassarsiaminnik ilanngussisinnaanissaat.
–
Inatsisissatut siunnersuutip imarisaa innuttaasunit aalajangiiffigineqarnissaa
Naalakkersuisut oqaatigereernikuuaat. Taamaattumik siunnersuutip
allanngortinneqarnissaanut ilalerneqarnissaanulluunniit
piumassuseqartoqarsinnaanera tunngavilersuisoqarsinnaaneralu ammaffigaarput.
Naalakkersuisut oqanngillat allannguisoqassasoq, periarfissarli taanna
ammaffigaarput, Vivian Motzfeldt erseqqissaavoq.
Inatsimmut tunngaviusussamut siunnersuut Inatsisartuni aamma suliarineqassaaq.
Inatsimmut tunngaviusussamut siunnersuut inaarutaasumik saqqummiunneqareerpat
inatsisinut atuutsitsinermut tunngasunik misissuineq pitsaanerpaaq
naapertuutissaaq, innuttaasunillu ataatsimiititsinerni siunnersuutit
pitsannguutissallu ilanngullugit.
2024-mut
aningaasanut inatsimmi namminiilivinnissamut immikkoortortaqarfik 2.175.000
koruuninik aningaasaliiffigineqarpoq, aningaasalli taakku immikkoortortaqarfiup
ulluinnarni ingerlaneranut taamaallaat atorneqassapput, innuttaasunik
ataatsimiisitsinermut inatsit tunngaviusussaq pillugu paasissutissiiniarnernut
atorneqarnatik. Aningaasanut inatsimmi ingerlatsinermut aningaasalissuutit 22
millionit koruuniupput, aningaasartuutit naatsorsuutiginngisat,
assersuutigalugu pinngortitami ajunaarnersuarnut inunnullu ikiuiniarnermut
tapiissutit, aningaasalersorneqarsinnaapput. Aningaasanut inatsimmi
erseqqissarneqarpoq aningaasat taakkua aamma namminiilivinnissamut sulinermut
atorneqarsinnaasut.
