Ingerlatseqatigiiffik nutaaq saarullinnik qeritinneqanngitsunik avammut tunisassiorusuppoq

"Royal Greenland suleqatigalugu saarullinnik uumatitsivinnik amerlanerusunik pilersitsisoqarnissaanik pilersaarusiortoqarnissaanik Naalakkersuisut peqquneqarnossaannik Inatsisartut aalajangiiffigisassaattut siunnersuut." taamak qulequtalimmik Inatsisartuni ilaasortaq, Siverth K. Heilmann (A) saqqummiussivoq  (FM2024/155).

Sermitsiap nittartakkatigut nutaarsiassaqartitsivianit maluginiarparput, Naalakkersuisut akissuteqaamminni ilaatigut paasissutissiisut, imatut nipilimmik: "Tamatuma saniatigut ingerlatsisumit Royal Greenlandip saarullinnut uumatitsiviit ingerlataasa assinginik aallartitserusulluni kissaateqartumit 2023-mi saaffiginnissummik Aalisarnermut Piniarnermullu Naalakkersuisoqarfik tigusaqarsimavoq."

Naalakkersuisut taamatut saaffiginnittoqarnera ilassilluarsimarpasippaat, tassa ingerlatseqatigiiffiit nutaat aalisarnermi taamatut ingerlanneqartumi suliniuteqarnissamut periarfissinneqarsinnaanerat pillugu, taamaattumillu allannguutissatut siunnersuuteqarput imatut nipilimmik: "saarullinnut uumatitsiviit atornerinut tunngavissat iluarsiiffigineqarnerata nalunaarutinut attuumassuteqartunut ilannguteqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut"

Maanna suliaq Inatsisartut aalisarnermut, piniarnermut nunalerinermullu ataatsimiititaliaani suliarineqarpoq aappassaaneerneqassalluni maajip 7-ani.

Opilia ApS: Upperaarput siunissamullu isumalluarpugut

Sermitsiap nittartakkatigut nutaarsiassaqartitsivianit allagaatinik takunnikkumaneq aqqutigalugu paasivarput saaffiginnissimasoq tassaasoq Opilio ApS. Opilio Greenland ApS-ip piginnittui Kalaallit Nunaanni aalisarnermik ingerlataqarnikkut misilittagartuut tassaapput Robert Møller, Jens Peter Larsen aamma Siverth Knudsen.

- Suliniuterput upperaarput, taamaattumik maanna umiarsuarmik tunitsiviliiniarluta akuersissummik qinnuteqarpugut, umiarsuaq taanna suliniutitsinnut tulluaqqissaarpoq, tassalu saarullinnik qeritinneqangitsunik nioqqutissiornissatsinnut umiarsuaq taanna milluaatitalik naammassinnissinnaalluarpoq, Robert Møller, Opilio Greenland ApS-imi pisortaq oqaluttuarpoq.

Maannakkut ingerlatseqatigiiffik suliniutiminnik misileraallutik aallartipput, aalisartumit nunani allani psisussamut ingerlaartitsineq misilerarneqarluni.

Mittarfik nutaaq aamma umiarsuarnik angallassinermik aaqqissuussinerit aalisakkap atuisumut apuutilertortarnissaanik qulakkeerinneqataassapput

Pisortaq aamma piginneqataasoq, Robert Møller, niuernermik ilusilersugaanera  pilersaarutaalu pillugit ingelatseqatigiiffiup suli nammineq pigiumagallarai oqarpoq, tassami suli aallartisaanermiikkamik, kisianni isertuarani oqaatigaa naatsorsuutigigitsik Naalakkersuisunit akuersissummik tunineqassallutik taamaammallu suleriaasissartik kiisalu avataani attaveqaatit inississorlugit aallartereeritik:

- Kitaani saarulliit nerpii mamarluinnartuupput, tassa "sanigorsareeraangamik" ammassannik orsoqangaatsiartunik nerisimanermi kingorna uumatitsivinni nerpigissarneqartarmata, tamatuma saniatigut saarulliit nerpii qaallorissuusarput. Qeriteqqaarnagit pisisussanut apuunneqartarnissaat sulissutigaarput, aamma Nuummi mittarfittaap atuutilerneratigut kiisalu umiarsuit periarfissat aappaattut atorneratigut pisisussanut apuussilertortarnissatsinnut periaarfissat atorluassamaarpagut, Robert Møller nassuiaavoq.

Nuup eqqaani Nuup kujataatungaani saarullinnik uumatitsivimmiunik pisiortussapput

Timmisartunut Atlantikukkoortartunut mittarfittaassap piviusunngornerani silaannakkut Nuummit nunanut allanut toqqaannartumik attaveqalernissaa tamatumalu saniatigut umiarsuatigut angallassisarnissaq naatsorsuutigineqarpoq.

- Taamaattumik Nuummit aallaaveqarluta aallarnisaavugut, periarfissalli ineriartortinnissaannut takunnissinnaalluarpugut, tassami inuussutissarsiortup kialuunniit anguniagarisarpaa ineriartortitsinissaq, taamaattorli pingaaruteqarpoq aallartilluarnissarput ingerlallualernissarpullu tunngavilissallugu, tamannalu isumannaareerutsigu alloriarnerit tullii ingerlassinnaalerumaarpagut, Robert Møller oqarpoq.

Aperineqarami unammilleqatigiinnermit nalaataqassagunik, ilaatigut Royal Greenland uumatitsivimmiunik saarullinnik Maniitsoq aallaavigalugu tunisassiornermik ingerlataqareernera innersuussutigalugu, Møller akivoq, ilisimaarilluaritsik unammillerneqarneq pilersinnaasoq, tassanilu ingerlatseqatigiiffiit anginerusut sakkortuumik unammilleriaannaasartut, taamaattorli nammineq ingerlatseqatigiiffimmillu pilersitseqatimi ingerlatseqatigiiffissuit  taanna aamma suleqatigiissitani isumaqatigiissutigaat anginerusut ileqqorissaarnermik aamma naapertuilluarnermik tunngavilimmik  pissusilersorumaartut ataqqinnillutillu, allanillu aamma inissaqartitsissasut.