Iserit 400 millionit koruuninik taarsigassarsiniarluni qinnuteqaateqartoq
Kommuneqarfik Sermersuumi inissiaatileqatigiiffik Iserit A/S Nuummi Tuujummi inissialiornissamut 400 million koruuninik KommuneKreditimut taarsigassarsiniarluni qinnuteqarpoq.
Tuujummi suliniummi inissiat siulliit ukiup nutaap aallartinnerani naammassineqassapput, tassanilu inissiat attartortittakkat katillugit 148-t sanaartorneqassapput.
Assi: Leiff Josefsen
Iserit A/S-imi siulersuisut septembarip 19-ani ataatsimiinnerminni Kommune Kreditimut 400 million koruuninik taarsigassarsiniarlutik aalajangerput.
Ingerlatseqatigiiffik aningaasanik qinnuteqartinnagu qinnuteqaat inuussutissarsiornermut aningaasaqarnermullu ataatsimiititaliamit, kommunalbestyrelsimit kiisalu aningaasaqarnermut akileraartarnermullu naalakkersuisoqarfimmit pisortatigoortumik akuerineqaqqaassaaq.
Maanna akuersissut siulleq tiguneqarpoq. Tamanna Kommuneqarfik Sermersuumi inuussutissarsiornermut aningaasaqarnermullu ataatsimiititaliap ataatsimiinneranit imaqarniliami atuarneqarsinnaavoq. Ataatsimiititaliap novembarip arfineq-aappaanni ataatsimiinnerani Iseritip taarsigassarsinissamik qinnuteqaataa akuerineqarlunilu kommunalbestyrelsimi tamanut ingerlateqqinneqarpoq.
Inissialiornermik suliniut aningaasalersussagaa
Iserit Tuujummi inissianik attartortittakkamik katillugit 148-nik sanaartornissamik pilersaaruteqarpoq. Inissiat marlunnik, pingasunik, sisamanik tallimanillu initalinnut immikkoortinneqassapput. Inissiatoqqat 1960-ineersut isaterneqarput, inissianillu nutaanik sanaartorneq aallartinneqareerpoq.
- Erniarititaasut akileeqataassutaasussallu appasinnerat pissutigalugit KommuneKreditimi taarsigassarsiniarnissaq aningaasatigut aaqqiissutissatut pitsaanerpaasoq Iseritimi siulersuisut naliliipput, Kommuneqarfik Sermersuumi inuussutissarsiornermut aningaasaqarnermullu ataatsimiititaliamut saqqummiussami taama allassimavoq.
Iserit piginneqatigiiffittut ingerlatseqatigiiffiuvoq. Iserilli kommunip ingerlatseqatigiiffiutaatut Naalakkersuisut, KommuneKreditip aamma danskit naalagaaffiata akornanni sinaakkutissatut isumaqatigiissut nutaaq, KommuneKredit aqqutigalugu taarsigassarsiffiusinnaasoq atorsinnaavaa.
Aningaasatigut isumannaatsuuneq
Inissialiornermik suliniummi sanaartornermut aningaasartuutit 320 million koruunit missaanniissasut siornatigut naatsorsorneqarsimavoq. Tassunga ilanngullugit akinut qaffaatit 36 mio. koruuningajaat aamma ilimaginngisamik aningaasartuutit missingersuutigineqareerput.
- Sanaartornermut aningaasartuutit ukiuni kingullerni Ukrainemi sorsunneq pissutigalugu qaffarujussuarnikuupput. Taamaammat aningaasartuutit matussusersinnaajumallugit 400 millionit koruuninik taarsigassarsiumavugut. Missingersuutit sinnerlugit aningaasartuuteqarnaveersaarniarluta taamaaliorpugut, pisortaaneq Torben Kortegaard nassuiaavoq.
Inissiat siulliit 2025-p aallartinnerani naammassineqarnissaat naatsorsuutigineqartoq pisortaanerup ilisimatitsissutigaa. Inissiat suli marluk ukioq taanna sanaartorneqassapput, inissiallu kingulliit marluk 2026-mi naammassinissaat naatsorsuutigineqarpoq.
