Naalagaaffeqatigiinneq nunanullu allanut pissutsit pineqartillugit
Namminersorlutik Oqartussat ”Pineqartilluta ilaassaagut”
pingaartimmassuk Qeqqata Kommuniani tupigineqarpoq.
Iluamilli
isumaliutiginagu nunatta iluani sumiiffinni ilaatigut kommunini
pissutsit.
Naalagaaffeqatigiinneq nunanullu allanut pissutsit pineqartillugit
Namminersorlutik Oqartussat ”Pineqartilluta ilaassaagut”
pingaartimmassuk Qeqqata Kommuniani tupigineqarpoq.
Iluamilli
isumaliutiginagu nunatta iluani sumiiffinni ilaatigut kommunini
pissutsit.
Aatsaat Sermitsiap isumaqatigiissut kommunimut nassiummagu
takuaat, naak kommunimi inuussutissarsiornermut taamaalillunilu
kommunip aningaasaqarneranut taama pingaartigigaluartoq.
Pineqarpoq Greenland
Airportsip Illersornissamullu ministereqarfiup Kangerlussuup
mittarfiata atorneqarneranut isumaqatigiissusiarigallagaat,
taamaalilluni mittarfik nunap immikkoortuani mittarfinngorluni.
Qeqqata Kommuniani
borgmesteri Malik Berthelsen oqarpoq:
– Isumaqatigiissut una aatsaat
uanga takuara. Takusinnaavara isumaqatigiissut Kalaallit Danskillu
Naalakkersuisuisa 2023-mi apriilimi sinaakkutissatut
isumaqatigiissutaat (rammeaftale aaqq.) aallaavigalugu
suliarineqarsimasoq. Taamaakkaluartoq tupaallaatigivara imarpik
qulaallugu timmisartuussisarnerup tamakkiisumik Kangerlussuarmiit
nuunneqareersimanissaa ingerlanneqarunnaarsimanissaalu
naatsorsuutigalugu illuatungeriit isumaqatigiissutigisimammassuk.
DANMARK KANGERLUSSUARMI SORUSUNNERSOQ UJARTORAA
Qeqqata Kommuniani borgmesterip Malik Berthelsenip
paaserusuttupilussuuaa Danmark Kangerlussuarmi suniarnersoq,
tamannalu amerlanerusunik sulisoqarnermik kinguneqassanersoq,
tamannami kommunip nunaqarfiullu siunissami periarfissaanut
pingaaruteqaqimmat.
- Soqutiginassaaq danskit illersornissamut ministeriata Troels Lund Poulsenip Kangerlussuaq pillugu nutaarsiassanik saqqummersittagaasa takunissaat, Issittumi illersornissamut aningaasaliissutit qanoq sumilu atorneqarnissaat pillugu, borgmesteri Sermitsiamut oqarpoq.
Illersornissamut ministeri siullermik maajimi 2024-mi
nalunaaruteqarpoq Kangerlussuarmi suliffissanik sammisassanillu
pilersitsinissat misissorneqartut. Juullikkunni aamma nalunaarutigaa
Nuummi Issittumi Sakkutooqarfimmi sulisut amerlineqarniartut.. Sulili
tigussaasoqanngilaq. Kingullermik tusarparput Danmarkip Kalaallit
Nunaanni illersornissamut 15 milliardit atorniarai soqutiginartunik
arlalinnik iliuuseqartoqarluni, suulli naatsorsuutigissavavut
Kangerlussuarmilu susoqassava. 2019-imi taamanikkut illersornissamut
ministerip Trine Bramsenip 1,5 milliardit koruunit atorniarlugit
neriorsuutigaa, maannamullu nunatsinnit Folketingimi
naalakkersuinermik suliallit naapertorlugit ilinniartitaanermut 15,6
million koruunit atorneqarsimapput.
- Taamaattumik ullumikkut Kangerlussuarmi sulisut suliniutillu amerliniarneranni sunik pilersaaruteqartoqarpa, borgmesteri Malik Berthelsen aperivoq.
- Maajimiilli sulisut ataannarnissaannik pilersaarutillu ingerlannissaannik oqaasii suli atuuppat? Ilisimavara upalungaarsimanissamut ilinniartitaanermi ilinniartut amerliniarlugit sulisoqartoq, ilisimanngilarali tamanna atorfiit amerlinerannik kinguneqassanersoq.
- Soorunami soqutigalutigulu neriuutigaarput Kangerlussuarmi suliffiit amerlinissaat, ingammik Kangerlussuarmit sulisut taama amerlatigisut annaaneri peqqutigalugu taamaalillunilu akileraarutitigut isertitassat annaaneqarlutik Nuummi mittarfiup ammarnerata kingunerisaanik, Malik Berthelsen oqarpoq nangillunilu:
– Ulluni makkunani USA-mi pisut eqqarsaatigalugit isumaqarpunga,
Naalakkersuisut Danmarkimik isumaqatigissusiornissamik
pissanganartunik suliassaqartut.
/Poul
Air Greenlandip Nuummi
mittarfiup nutaap ammaneqarnerata kingornagut Kangerlussuaq
mittarfittut sillimmataasutut atunngimmagu, Danmarkimullu
uteqqittariaqartarluni aamma ilaasut Nunatsinni mittarfinnut
allanukartut ilaasoralugit Kommunimit uissuummissutigineqarpoq.
Kommunimi sulisut
innuttaasullu paatsuunganartippaat isumaqatigiissummi aallaaviusutut
Kangerlussuup imarpik qulaallugu timminermut atatillugu
taaneqannginnera. Ingammik ukioq manna Københavnip Kangerlussuullu
akornanni qaammatini arfineq marlunni
isumaqatigiissutigineqarsimammat kiisalu aasaq manna umiarsuarmik
takornariartut nikinnerini arlalinni atussasoq
isumaqatigiissutaalluni.
Misissueqqissaarnerit
pisariaqartut
- Taamaattumik paaserusunnarpoq sinaakkutissatut isumaqatigiissut (rammeaftale) 2023-imeersoq malillugu, Kangerlussuarmi niunermik tunngaveqarluni timmisartuussisarnissamut ingerlatseqatigiiffinnik attuumassuteqartunik misissuissoqarnissaanik isumaqatigiissutigineqarsimasoq, ilumut atsioqatigiinnginnermi misissorneqarsimanersoq? Imaluunniit naatsorsuutigiinnarsimanerpaat Kangerlussuaq nunatta avataaniit inuinnarnit atorneqarunnaavinnissaa? Malik Berthelsen oqarpoq.
- Tamatumanilu aamma takuarput Kangerlussuaq nunatta avataaniit miffigineqartassaguni, siusinnerusukkut oqaatigineqartarsimasutuulli tamanna immikkut ukiumut 53 mio. koruuninik akeqartariaqanngitsoq, borgmesteri oqarpoq.
Malik Berthelsenip
misissueqqissaarnernik ujartuinermini apriilimi 2023-mi
tunngaviusumik isumaqatigiissut innersuussutigaa, tassani
ersarissarneqarluni mittarfiup sakkutuujunngitsunik atorneqarnissaata
pisariaqartinneqarnera ersarissarneqarluni, ilaatigullu nunanut
allanut timmisartuussinermi pisariaqarluni. Kommunilli
misissueqqissaarnerit taamaattut takusimanngilai imaluunniit suliami
peqataatinneqarani
Aningaasaqarneq
Malik Berthelsenip uggoraa
Kangerlussuup Air Greenlandip Kangerlussuaq timmisartorsuup
sillimmatitut miffigineqarsinnaanerisigut aningaasatigut
kaaviiaartitsisinnaaneq annaammagu. Pineqarput unnuinerit ilaasunillu
nerisaqartitsineq timmisartumillu kiffartuussineq. Tamatuma
saniatigut ilaasunut Nuujunngitsumut illoqarfinnullu allanut
ingerlasussanut sunniuteqarpoq.
Malik Berthelsen Air Greenlandip
ingerlanneqarneranut akuliukkusunngilaq, oqarlunilu:
- Air Grenlandip imminerminut
tamanullu pitsaanerpaasussaq soorunami ilisimanerugamiuk,
naatsorsuutigaara tamanut pitsaanerpaatitani toqqarsimassagaa.
- Taamaakkaluartoq paasissallugu
soqutiginassagaluarpoq, Tuukkap taavalu timmisartut Jettime-meersut
suna assigiinngissutigineraat? Pissutigalugu pilersaarutit malillugit
timmisartut Jettime-meersut marsimiit Kangerlussuaq aqqusaarlugu
Nuummukartalerunik, Danmarkimut utinnginnerminni Nuummi
unnueqqaartartussatut pilersaarutaapput. Taava tassani timmisartumi
inuttat susassappat? Malik Berthelsen oqarpoq.
