- Isumaqatigiissutit avaqqutaarneqarput

- Sullissisut ataasiinnaagunartut kisiisa saaffiginikuunngilakka, tassalu qatserisartut. Kisianni sinneri tamakkerpakka, sulinermilu atugassarititaasut iliuuseqarfigeqqullugit tusaaneqassaguma matut tukkaqqaartariaqarsimavakka.

Taama oqarpoq Martin Ramsing, arnamik Filippinerineersumik nuliaqartoq, ’sinnerilu tamakkerlugit’ oqarami tamaavisa pivai.

- Politiiniillungalu, akileraaruserivimmiillungalu, ombudsmandimiillungalu, kommuunimiillungalu, SIK-miillungalu napparsimmavimmiippunga, Martin Ramsing oqaluttuarpoq.

Illoqarfimmi imerniartarfinniitilluni asasani naapikkamiuk Filippinerineersunik nalunngisaqalerpoq.

- Arnap inuusugigaluarpaanga, asannilerattali taamanili najuleratta maanna ukiut aappassaat katisimavugut. Angerlarsimaffianut pulaaqqaarama takusakka upperinngingajavippakka. Inissiami marlunnik initalimmi Filippinerineersut allat sisamat ineqatigai. Namminerisaa tassaavoq natermi madrassi, illikartissinnaasamik talulik. Ilumoorsorinngikkaluarpara. Taamaakkaluartoq arnaviara peqqusiileqinngilaq, Nuummimi taamak najugaqartoqartartoq isumaqarpoq.

Piviusoq

Inooqatigiikkaluttuinnartillutik arnap aningaasarsiami allagartaa angutiviaminut nassuiaatigeqquaa.

- Qisuariarnera suli eqqaamavara: Qanoq aam…, arnaviamalu aningaasarsiaata allagartaata paatsiveqarluinnannginnera aliatsaatigalugulu ilungersuummissutigaara. Allat aamma takujumavakka – aningaasarsiamilu allagartaasa sinneri tamaasa tunniuppai. Misissorakkit kamakkaluttuinnarpunga, Martin Ramsing oqarpoq.

Aningaasarsiat allagartai naapertorlugit tunninneqartartut nikerartut nassuiaavoq. Aningaasarsiat ilaannikkut qaammat naareersoq sapaatip-akunnera qaangiukkaangat aatsaat ikineqartarput, allani aningaasat tunniunneqartut annikingaatsiartarput; sulinngiffeqarnersiutit amigaataapput, taamatuttaarlu ’soraarnerussutisiassat’ sulinngiffeqarnersiassallu piviusumiit allaanerupput.

- Ineqarnermut akiliut qaffariasaartoq allaqqavoq, aammalu ’atortorissaarutinut’ ilanngaasisoqariataarsimavoq. Tamakku qaavatigut arnaviama qaammatini siullerni pingasuni qanoq sulisimanerluni oqaluttuuppaanga. Taamani pingasunik suliffeqarsimavoq – ullut tamarluinnaasa – nujaleriffimmilu suliffigisamini najugaqarsimalluni. Taamaattoqarsinnaanngilaq. Allamilu suliffittaarami inissiami madrassimiilerlunilu ataasiinnarmik suliffeqalerami soorunami pitsaanerusunik atugassaqalersorivoq. Sulisitsisumilu tassani isumaqatigiissutit naapertorlugit sapaatip-akunneranut akunnerni 40-ni sulineq, nalliuttuni tapeqartitaaneq, kiffaanngissuseqarneq piffissarlu eqqorlugu aningaasarsisitsisarneq pingaartinneqarput, Martin Ramsing oqaluttuarpoq, ilanngullugulu eqqaavaa arnaviani ukiut sisamat affarlu sulinermini sulinngiffeqarsimanngitsoq.

- Ukioq manna aatsaat sulinngiffeqalaarsinnaanikuuvoq. Kanngunaqaaq. Arlaalli qisuariartariaqarmat matunik isimmittaanissara aalajangerpara. Arlaat iliuuseqartariaqarpoq. Kalaallit Nunaat inukeruttormat ima eqqarsarnarpoq: Qanoq taamaaliortoqarsinnaagami? Ima eqqarsassalluni sivisusinnaanngilaq: kukkuneruvoq aaqqissavara. Sullissinerli taamaanngilaq, tamanna ilikkarpara, Martin Ramsing oqarpoq.

Politikki

Sullissinermi sorpassuit, ilaatigut inatsisit malittarisassallu nalinginnaasut, takunngitsuusaaginnarneqartartut naqissuserpaa. Ombudsmandimili tusaaneqarpoq

- Ombudmandi suliamik ingerlatsisinnaanngilaq, tassanili aatsaat tusaajumaneqarpunga. Ukioq ataaseq affarlu qaangiutereerput. Sullissivinni allani maalaartutut isigineqannguatsiarpunga.

- Sulisut nunanit allaneersut…aap, oqaatsimik naleqquttumilluunniit nassaaruminaakkaluartoq taama pisinnaanngilagut. Allaalluunnit ajornartorsiut iliuuseqarfiginiassagatsigu politikkerinngorniangajalluinnarpunga, suliammi pingasut aviisimi saqqummiunneqartut kisimiinngillat. Ilamininnguaannarai, arnallu pineqartut iliuusertik kinguneqartinneqarsinnaagaluartut sassarmata nammineq inuttut sapiigaakka, tassami sassarnerat kinguneqartinneqartoq kingorna paasivarput.

- Inuit arnanik Filippinerineersunik pingasuusunik sapiiginnittut soorunami naapittarpakka, aaqqissuussisoqarnissaalu maanna neriuutigineqarpoq. Inuilli tupinnaraluartumik pissusissamisoorsorinnittut aamma naapittarpakka. Sulisut Filippinerineersut Kalaallit Nunaanni atugarissaarnerunerannik eqqaamanneqqusisut aamma tusarlugillu naapittarpakka, tassami Filippinerini malittarisassat allarluinnaat atuupput. Taama oqartumik tusarama oqaasissaarulluinnarpunga. Innuttaasulli taakku qanorluunniit ajortigisumik pineqaraluarpata ikiorneqarnerannik oqaannarsinnaaneq isiginnittaasitut eqqumiilluinnarpoq, Martin Ramsing oqarpoq.

Taama isiginnaaseqarneq ajornartorsiutaavoq isumaqarpoq, taamatummi isiginnittaaseqarneq sulisinnaasut aningaasarsiaannut apparsaataavoq.

- Filippinerimmi sulinerminni atugassarititaasa assinginik atugaqassagunik namminneq suliumanavianngillat. Filippinerit akunnermut 30 koruuninik akilerlugit sulilersinneqarsinnaanerat, kingornalu qisuariartoqannginnera, siunissaq ungasinnerusoq isigalugu ajornartorsiutaangaatsiartoq isumaqarpunga. Tamanna suliffeqarfeqarfinnik tamanik avaqqutaarinninneruvoq, Martin Ramsing oqarpoq.