Ittoqqortoormiini suliffeqarfimmik Arctic El
& VVS-imik piginnittoq Dines Hammeken marlunngornerup ullaavani tusarluarpoq.
- Siullermik takugakku imannak
eqqarsarpunga: “Aasinaasiit mittarfittaalerpugut?”. Kisianni nutaarsiassat
iluamik atualerakkit pimoorusserpasittut takusinnaalerpara, Dines Hammeken
taama oqarpoq.
Ittoqqortoormiini suliffeqarfimmik Arctic El
& VVS-imik piginnittoq Dines Hammeken marlunngornerup ullaavani tusarluarpoq.
- Siullermik takugakku imannak
eqqarsarpunga: “Aasinaasiit mittarfittaalerpugut?”. Kisianni nutaarsiassat
iluamik atualerakkit pimoorusserpasittut takusinnaalerpara, Dines Hammeken
taama oqarpoq.
Taanna 41-nik ukioqarpoq, Ittoqqortoormiillu
mittarfittaassaanik oqalunneq qangali tusartalernikuuaa.
- Inuusuttuaraallungali tusaqqaarpara.
Dines Hammeken kisimi tusarluanngilaq, illoqarfimmimi
360-it missaannik innuttaasoqartumi innuttaasut nuannapput.
- Facebookimi takullattaavakka
inuit nuannattut.
Angalaneq akikinnerusoq eqaannerusorlu
neriuutigaat
Assersuutigiinnarlugu ullumikkut Ittoqqortoormiiniit
Nuummukassagaanni angalaneq sivisuinnarani akisoorujussuuvoq. Inuk
ataaseq siumuinnaq 11.000 koruunit sinnerlugit akiliisariaqarami.
ANGALANERUP AKIANUT ASSERSUUT: ITTOQQORTOORMIIT-NUUK
- Ittoqqortoormiit - Nerlerit Inaat, Air Greenland: 1.136 kr.
- Nerlerit Inaat - Akureyri - Reykjavik, Norlandair: 5.788 kr.
- Unnuineq Reykjavikimi: 900 kr.
- Reykjavik - Nuuk, nassataq tunniussassaq ataaseq ilanngullugu, Icelandair: 3.306 kr.
Katillugit: 11.130 kr.
- Angalasarnerput immaqa
akikillissaaq, Dines Hammeken oqarpoq.
Aammali suliffeqarfimminni atortussanik
piniartaramik tikisitsineq ajornannginnerulerlunilu sukkanerusumik pisalissasoq
neriuutigaa.
- Siunissaq eqqarsaatigalugu bestilikkat
assigiinngitsut tikinniartarneri akikinnerulissapput. Immaqa aamma
Islandikkooqqaarata assersuutigalugu Nuummukarsinnaalissaagut, Dines Hammeken taama
oqarpoq.
Ullumikkummi Ittoqqortoormiiniit
Nuummukassagaanni timmisartortitseqatigiit pingasut atorneqaqqaartarput
nunattalu avataatigooqqaartariaqarluni. Siullermik Air Greenlandip
qulimiguulianik Ittoqqortoormiiniit Nerlerit Inaannukariarluni, Norlandairip timmisartuanik Twin Otterimik Nerlerit Inaanniit Akureyrimukartoqarpoq, Akureyrimiit
Reykjavikimut Icelandairip Dash-8-nik ingerlaariarluni Reykjavikimi
unnuisoqakkajuppoq. Unnueriarlunilu Reykjavikimiit Nuummut Air Greenlandip
Icelandairilluunniit Dash-8-nik timmisartortoqarsinnaalluni.
Pissarseqataanissartik neriuutigaat
Dines Hammekenip suliffeqarfiutaa
pingasunik sulisoqarpoq ataatsimillu ilinniartoqarluni. Sanaartugassaq annertoorujussuaq
takkuttussanngormat pissarseqataalaarsinnaallutik neriuutigaat.
- Neqeroorusiortunut ilaassagutta
akuerineqassaguttalu nuannissaqaaq.
Sanaartornermimi suliassat ukiuni
kingullerni annertugisassaasimanngitsut suliffeqarfiutilik oqaluttuarpoq.
Allaallu matuinnassanerlutik aarleqqutigisalersimavaa.
- Soorlu imatut inissisimasaratta
ernumalaarluta, suliassaqannginneq peqqutaalluni immaqa matoriaannaalluta.
Illoqarfimmut uummarissaataassooq
Nerlerit Inaatigooqqaarani toqqaannartumik
Ittoqqortoormiinut tikittalernissaq sorpassuartigut iluaqutaassasoq Dines Hammekenip
qularinngilaa.
- Siunissaq eqqarsaatigalugu illoqarfimmut
uummarissaataassooq.
Nunaqartummi kisimik pinnatik takornariat
allallu tikittalissasut neriuutigineqartunut ilaavoq.
- Immaqa aamma turistinut
iluaqutaassaaq toqqaannartalernissaq.
Takornariallu amerleriassappata sanaartugassat
aamma qularnanngitsumik amerlanerulissapput.
- Immaqa aamma
hoteliliortoqalissaaq. Immaqa suliassanik allanik ammaassilerpoq, Dines Hammeken
oqarpoq.
Ullorlu tusarluarfik nunaqqatigiinnut
suliffeqarfiutilimmullu neriulersitsivoq.
- Siunissaq qilanaarnarsivoq,
Dines Hammeken taama naggasiivoq.
