Justus Hansen: Eqqakkat pillugit pissutsit akuerineqarsinnaanngillat

Karen Marie Kyed Frederiksen, Demokraatineersoq Inatsisartunilu ilaasortaq, paragraf 37 naapertorlugu Sisimiuni ikuallaavik nutaaq qanoq ingerlanersoq pillugu paasissutissinneqarusulluni.

Kiisalu kommunit ataatsimut eqqagassalerinermik ingerlatsiviat ESANI A/S kommunillu illoqarfinni nunaqarfinnilu eqqakkanik katersorsimasunik aallerfiginninnissamut sunik pilersaaruteqarnersut pillugit apeqquteqarpoq.

ESANI-p nuna tamakkerlugu eqqakkanik isumaginninnerup pilersaarutit malillugit ingerlanera Isumaginninnermut, Suliffeqarnermut, Nunamut Namminermut Avatangiisinullu Naalakkersuisumut Bentiaraq Ottosenimut Atassummeersumut ilisimatitsissutigigaluaraa maannakkut pissutsit akuerineqarsinnaanngitsut Inatsisartunut ilaasortaq Kommuneqarfik Sermersuumilu kommunalbestyrelsimut ilaasortaq Justus Hansen, Demokraatit, isumaqarpoq.

Misiliilluni ingerlanneqartoq 

Kommunit eqqakkanik isumaginninnermut igitsinermullu pingaarnertut akisussaapput, Naalakkersuisulli kommunit qanimut suleqatigalugit inatsisitigut tunngavissaqarluarnissaq kiisalu eqqakkanik suliaqarnerup ineriartortinneqartuarnissaanik malinnaanissaq akisussaaffigaat.

Avatangiisinut Naalakkersuisoq Bentiaraq Ottosen, ESANI A/S-imit akissutissarsisimasoq, ESANI-p Sisimiuni ikuallaaviutaa maanna misiliutitut ingerlanneqartoq, taamaalilluni ikuallaavik maanna eqqakkanik ikuallajasunik tamakkiisumik, tassa ullormut eqqakkanik 70 tonsinik, suliaqarsinnaasoq, misileraanerlu juunip naanerani naammassineqartussatut naatsorsuutigineqartoq Karen Marie Kyed Frederiksenimut ilisimatitsivoq. Nuummi Sisimiunilu ikuallaaviit nutaat atorlugit ESANI-p eqqakkat ikuallajasut nunami maani pinngortinneqartut tamaasa suliarisinnaagaat eqqakkanik ingerlatsivik aamma ilisimatitsivoq.

- Illoqarfinni najugaqarfinnilu eqqakkanik poortuereertartuni eqqakkanik aallertarneq ingerlallualereerpoq. ESANI-p eqqakkanik aallertarneq 2025-p sinnerani ukiunilu tulliuttuni ingerlaannassasoq naatsorsuutigaa, ESANI A/S ilisimatitsivoq.

ESANI-p kommunit ingerlatsinermut immikkoortortaqarfii suleqatigalugit illoqarfinni inoqarfinnilu minnerusuni eqqakkanik assartuinermut piumasaqaatit naammassineqarsinnaasut pillugit aaqqiissutissanik suliaqarsimavoq.

Suli ilisimaneqanngitsoq 

Nuna tamakkerlugu eqqakkanik katersuineq pitsaanerulersinniarlugu qanoq sivisutigisumik suliniuteqassanersoq Karen Marie Kyed Frederiksenip aamma paaserusuppaa. Tassunga ilanngullugu tamanna ilaatigut kommunit qanoq annertutigisumik aningaasaliissuteqartarnerannit aalajangiineqartarmat aaqqiissutissat ataatsimut isigalugit suliarineqarnissaat qaqugu naatsorsuutigineqarsinnaanersoq oqaatigisinnaanagu ESANI-mit ilanngullugu oqaatigineqarpoq.

- Illoqarfinni najugaqarfinnilu eqqakkat poortoriikkat assartorneqartarnerat atuutsinneqaleraangat eqqakkanik assartuisarnerup akulikissusaa nalimmassarneqartarpoq. Assartuinermut isumaqatigiissutit tamakkiisumik atuutsinneqalerpata illoqarfiit, najukkamili sikoqassusaa apeqqutaatillugu, qaammammut ataasiarlutik eqqakkanik poortoriikkanik aallerfigineqartarnissaminnut periarfissaqassapput.

- Inoqarfinni mikinerusuni qanoq akulikitsigisumik aallertoqartarnissaanut inuttussuseq aalajangiisuusarpoq, ukiumulli pingasoriarluni sisamariarlutilluunniit aallartitsisoqartarnissaa naatsorsuutigineqarpoq, ESANI nalunaarpoq.

ESANI A/S Kommune Kujalliup, Kommuneqarfik Sermersuup, Qeqqata Kommuniata aamma Kommune Qeqertallip ataatsimoorlutik pigivaat, suleqatigiinnikkullu eqqagassalerinermik suliassaq Naalakkersuisut EU-mi ikuallaanermut najoqqutassiap malinnissaanik anguniagaannut naapertuuttumik kivinneqassaaq.

Avannaata Kommunia ESANI-mik suleqateqanngikkaluarluni ESANI Shippingip umiarsuaata North Vikingip akiliilluni eqqakkanik aallertittarnissaanik isumaqatigiissuteqarpoq. Eqqakkat Sisimiuni ikuallaaviliaanneqartarput.

Akuerineqarsinnaanngitsoq 

Eqqagassalerinermut pilersaarusiaq 2020-miit 2031-mut atuuttoq naapertorlugu eqqagassalerinerup immikkut kivinnissaa politikkikkut kissaatigineqarpoq, tamannalu ESANI A/S suleqatigalugu piviusunngortinneqassaaq. Kommunit najukkami ingerlatsinermut naammattumik piginnaasaqarluartunillu aningaasaliinissaat Naalakkersuisut pingaartippaat. Taamaanngippat nuna tamakkerlugu eqqagassalerinermut aaqqiissutissamik aalajangersakkami aaqqissuussineq attatiinnarneqarsinnaassanngilaq, tamanna ilaatigut Eqqagassalerinermut pilersaarummi atuarneqarsinnaavoq.

ESANI A/S-ip pilersinneqarneraniit ukiut arfinillit qaangiutereersut suli politikkikkut anguniakkat taakku anguneqarsimanngillat, Tasiilami Inatsisartunut ilaasortaq Justus Hansen oqarpoq.

- ESANI A/S-ip aallartinnerani pissutsit naammaginarsimagaluartut, ukiuni kingullerni marlunni ajoraluartumik sinerissami sumiiffinni assigiinngitsuni eqqakkat amerliartuinnartut takusinnaavavut, Tunumi aamma taamaappoq, tamannalu akuerineqarsinnaanngilaq.

- ESANI-mi aqutsisut eqqagassalerinermut tunngasunik assigiinngitsunik suliniutit qanorlu iliuuseqarfigineqarsinnaanerat pillugit kommunit innuttaasullu ilisimatitsiilluarnerusariaqarpaat, taanna oqarpoq.

Justus Hansenip oqaasii naapertorlugit Kommuneqarfik Sermersooq Tasiilami nammineq ikuallaavimmik pilersitsisinnaanermik misissuisimavoq, ikuallaavilli taama angitigisoq avatangiisinut illersuinermut isumannaallisaanermullu piumasaqaatinik aalajangersimasunik, soorlu pujunik minguiaanermut kiassuarnullu piumasaqaatinik, naammassinnissinnaanngimmat tamanna ajornarsimasoq paasineqarpoq.