FUTURE GREENLAND

Kalaallit Nunaat nunarsuup assigani

Qupanuk Olsen inuit nittartakkatigut attaveqaqatigiittarfii atorlugit ullutsinni Kalaallit Nunaat pillugu oqaluttuanik siammarteriniarluni, nunarsuup sinnerani ilisimasat siammarternissaat neriuutigalugu, 2020-mi aalajangerpoq. Q's Greenland maanna tusindikkaannik ullut tamaasa isiginnaarneqartarpoq

Qupanuk Olsenip inuit attaveqaqatigiittarfiisigut ilisimaneqarluarneranut pissutaavoq video “3 things not to ask in Greenland” (Kalaallit Nunaanni apeqqutigineqaqqusaanngitsut pingasut) siammarterneqarujussuarmat. Taanna 38.000.000-riarluni takuneqarsimavoq.

Qupanuk Olsenip inuit attaveqaqatigiittarfiisigut nittarsaassissarnera isiginnaassiamik ”3 things not to ask in Greenland”-imit, kalaallisuunngorlugu "Kalaallit Nunaanni apeqqutit pingasut apeqqutigissanngisatit" nutserneqarsinnaasoq, aallartippoq. Isiginnaagassiaq siammarterneqarluarpoq ullumikkullu 38.000.000-it sinnerlugit takuneqarsimalluni. Q's Greenland Youtubemi, Instagramimi, TikTokimi Facebookimilu katillugit 1,3 millioninik malinnaaffigineqaannanngilaq aammali nammineq Q’s Community, kalaallisut Q'p attaveqaataanik taaneqarsinnaasoq, aqqutigalugu nunarsuaq tamakkerlugu attaveqaateqarpoq.

Future of Greenland

Qupanuk Olsen Future of Greenlandip inuusuttunut aqqissuussaani ataatsimeersuarnermi ataasinngornermi maajip 13-ani pisussami peqataassaaq. Saqqummiussassaa ima qulequtaqarpoq: ”Oqallittarfiit – taakku aamma oqartussaaqataanermut pingaaruteqarpat?”

Malinnaasui Qupanuk Olsenimut akiliisarnermikkut nittartakkatigut sisamanngorneq allortarlugu Qupanummik oqaloqateqartarput. Naapinnermi kalaallisuut, oqaatsivut assigisaallu eqqartorneqartarput.

– Ullumikkut inuussutiginissaa siunertarisimanngikkaluarparalu. Nunatta kulturittalu immikkuullarissusaasa oqaluttuarinissaat soqutigigakku isumassarsiarisimavara. Nunatsinni inuppassuit taamaattussaannartut isigisaat. Uagulli immikkuullarissuuvugut, suli aalisarnermik, qimussernermik piniarnermillu inuussuteqarpugut, pinngortitamullu tulluarsarluta inuulluta.

Nunarsuup ilaani suliffissuaqalerneranit inuppassuit tamanna annaanikuuaat. Kalaallit Nunaat angakkuakkatut ippoq, taamaanneralu sulerusussutsinnik nukissanik tunisisarpoq, civilmineingeniøritut ilinniagalik Qupanuk Olsen oqarpoq.

Kalaallit Nunaat pillugu ilisimasat amigarput

Qupanuk Olsenip nunanut allanut angalasartut allat assigalugit inuit Kalaallit Nunaat pillugu ilisimasaqarpianngitsut naapittarsimavai. Assersuutigalugu ukioq kaajallallugu sikuusarsorineqartartoq imaluunniit Kalaallit Nunaat inoqanngitsuusorineqartartoq.

– Ikinngutigilluakkama Australiameersup isigaluta oqaluunnitsinni Nuummi naatsiivilerisunga takugaminga paatsuungalerpoq. Siku sumiinnersoq tammaavaa. Isumaqarsimavoq ukioq kaajallallugu sikuusartugut. Chicagop mittarfianut millunga ilanngaaserisup aperaanga suminngaanneenersunga. Oqarfigaara Kalaallit Nunaanninngaanneerlunga. Taassuma

paasiuminaatsippasillunga isigilermanga nunap assinga iikkamiittoq tikkuarlugu sumiinnersoq takutikkakku ima akivaanga: "Tassani najugaqartoqanngilaq". Taama qisuariarinerit piviusunik siammartererusulerninnut ilaatigut tunngaveqarpoq.

Nas Dailyp tikeraarnera

Qupanuk Olsenip Israelimiu inuit attaveqaqatigiittarfini ilisimaneqarluartoq Nas Daily, Nuseir Yassinimik atilik, Kalaallit Nunaannut tikeraarusunnersoq 2020-mi aperigamiuk inuit attaveqaqatigiittarfiini suliaqartarnini aallartippaa. Nas Daily inuit attaveqaqatigiittarfiini 65 millioninit amerlanerusunik malinnaaffigineqarpoq, ilaatigut nunarsuaq tamakkerlugu angalasarluni nunallu immikkuualuttortaat kanalini aqqutigalugu takutittarlugit.

– Akinngilaanga, taamaattumik videomik siullermeerlunga sanavunga kingornalu attaveqarfigaanga. Tamatuma kinguneraa Kalaallit Nunaannut tikeraarnera. Aatsaalli 2022-mi ulluni 100-ni tulleriiaanik videolioqattaarpunga – tassa ulluni 100-ni ullormut videomik ataatsimik saqqummersitsisarpunga kinguneraalu malinnaasorpassuaqalernera. Taamaasilluni sukkaannaq pisut pipput. Maanna USA-mi saqqummiuttakkannut ikiorteqarpunga, taassumalu USA-mi malinnaasuma 30 procentiinut saqqummiisittarpaanga.

– Sunngiffinni soqutigisara arlalitsigut suliffigilerpara. Kalaallit Nunaat pillugu ilisimasanik aningaasarsiuutigalugu siammarterisinnaatitaavunga. Tamatuma saniatigut misigisarpassuaqarpunga angalasarlungalu. Aamma inuit nittartakkatigut attaveqaqatigiittarfii pillugit pikkorissaasarpunga ataatsimeersuarnernilu pisunilu aaqqissuussisarlunga. Aatsaalli piffissami kingullermi tamanna imminut akilersinnaalerpoq. Kalaallit Nunaanni suliffeqarfiit nittartakkatigut isummanik siammarterisartunut saaffiginneqqaarnissaat pisariaqarmat, paasillugulu qanoq ikiorsinnaanerivut.

- Inuit ilinnut tatiginnilernissaat pineqarpoq oqariartuutillu paasineqarnissaa. Uanga oqariartuutiga tassaavoq nunarput kulturerpullu immikkuullarissoq pillugu ilisimasaqarnerulernissaq, inuit nittartakkatigut naapittarfiini ilisimaneqarluartoq Qupanuk Olsen oqarpoq.

Amazonimut saqqummiineq

Qupanuk Olsen ullumikkut Air Greenlandimut Royal Greenlandimullu kiisalu nunatsinni suliffeqarfinnik mikinerusunik arlalinnik suleqateqarnissamik isumaqatigiissuteqarpoq. Tamatuma saniatigut nunani allani suliffeqarfinnit saqqummiussinissamik imaluunniit suleqateqarnissamik kissaateqartunit saaffiginnittoqartarnera annertusiartuinnarpoq. Soorlu qanittukkut Amazonip nunap inoqqaavinut immikkoortortaqarfianut saqqummiussisoq. Tamatuma saniatigut Youtubemit aamma isertitaqartarpoq, taakkua piumasaqaataat naammassisimappatta videot saqqummersinneqartut isiginnaarneqarnerat aallaavigalugit aningaasarsititsisarmata.

– Aningaasat amerlanerpaanngillat, ataatsimulli isigalugit ataqatigiissarsinnaavakka. Aallaqqaammut uippakajaarnarpoq maannali suliffiit allat assigalugit ulluinnarsiutaalersimavoq. Pissutsinik ataqatigiissaaneruvunga, eqqissisimanerulerlunga imminullu tatiginerulerlunga. Soorunami aamma suliassaqarneruleriartuinnarpunga, taamaattumillu akigititakka qaffannikuullugit.

Saqqummiiuartarneq iluatsittumik ingerlanissamut aalajangiisuuvoq

Qupanuk Olsen naapertorlugu nittartakkatigut isumannik siammarterisutut iluatsittumik ingerlanissamut matuersaat tassaavoq saqqummiiuartarnissaq. Videoliat aalajangersimasumik killorneqartarneri taavalu saqqummiussat sinaakkuteqarnissaat tatiginninnermik pilersitsisunik. Assersuutigalugu Qupanuk Olsenip videoliani ”Life is amazing – Tulliani takuss”-imik oqarluni naggasertuaannarpai.

- Inuit ilinnut tatiginnilernissaat pineqarpoq oqariartuuvillu paasineqarnissaat. Uanga oqariartuutiga tassaavoq nunarput kulturerpullu immikkuullarissoq pillugu ilisimasaqarnerulernissaq. Qupanuk Olsen 2022-mi upernaakkut Nas Communitymut ilaasortaalerpoq, taanna tassaavoq nittartakkatigut isummanik siaruarterisartut nunarsuarmit tamarmeersut ataatsimoorfiat, Dubaimilu Nas Dailyp aaqqissuussaanut pingasunut peqataanikuulluni.

– Sisamanngornerit tamaasa internetikkut naapittarpugut, videonik avitseqatigiittarluta siunnersoqatigilluta qanoq pitsaanerusumik iliorsinnaanerluta. Taanna ataatsimoorfik aqqutigalugu USA-mi ikiortiga nassaaraara, taamaattumik uannut pingaaruteqartorujussuuvoq, ingerlalluarninnullu pissutaaqataagunarluni. Ukioq mannalu januaarip aallaqqaataani nammineq ”Q’s Community” aallartippara, tassani malinnaasut nunarsuarmit sumiiffimmit assiginngitsuneertut ukiumut 60 dollarinik akiliillutik sapaatip akunnera allortarlugu Qupanuk Olsen oqaloqatigisinnaavaat Kalaallit Nunaallu eqqartorlugu.



Powered by Labrador CMS