Qaammatini kingullerni pingasuni
Kalaallit Nunaata angalaffissatut nunat tamat akornanni
soqutigineqariartorpoq.
Tamanna
Visit Greenlandip nalunaarusiami nutaami, Anguniagaq Solutions
suleqatigalugu suliarisaani erseqqissarneqarpoq.
Qaammatini kingullerni pingasuni
Kalaallit Nunaata angalaffissatut nunat tamat akornanni
soqutigineqariartorpoq.
Tamanna
Visit Greenlandip nalunaarusiami nutaami, Anguniagaq Solutions
suleqatigalugu suliarisaani erseqqissarneqarpoq.
Nunarput
tamakkerlugu takornarialerinermik ingerlatsisut maanna
eqqummaariffigineqarneruneq, saaffiginninnerit amerlanerit
akuunerunerlu – ingammik USA-mit Europamilu nunanit Danmarkip
avataaneersunit misigaat. Misissuineq takornarialerinermik
ingerlatsisut 67-t akissutaannik toqqammaveqartup ingerlatsisut 81
procentiisa nunanit tamalaanit soqutigineqarneruneq ersersippaa.
NUNAT TAMALAAT AKORNANNI SULEQATIGIINNEQ UNITSINNEQARALLARTOQ
Kalaallit Nunaanni ineriartortitsinermik
suliniutit Amerikamiunit aningaasalersorneqartut tallimat qanittukkut
Trumpip naalakkersuisuisa suliniutinik arlalinnik Amerikamiut
ineriartortitsiviata USAID-p tamakkiisumik ilaannakortumilluunniit
aningaasalersugaanik unitsitsinissamik aalajangernerisa ilaatut
qanittumi unitsinneqarput. Innovation South Greenland (ISG) ukiuni
arlalinni suliniaqatigiiffimmik suleqateqartoq, pisortaq Miki Jensen
oqaluttuarpoq.
- Ukiuni kingullerni nunap immikkoortutsinni USAID-mik qanimut suleqateqarnerput annertusarparput. Amerikamiulli naalakkersuisuisa nutaat suleqatigiinneq tamanna unitsikkallarpaat. ISG-p akuunera assigiinngiiaarpoq, taakkununngalu IBI-mentorimik aaqqissuussinerit, nunap immikkoortuani attaveqaatit periarfissallu pillugit nalunaarusiaq, UNESCO Kujataanut ukiunut qulinut siuariartornissamut pilersaarut, niueqatigiinnerup nukittorsarnissaanut suliniutit ilinniartitaanikkullu qaninnerusumik suleqatigiinneq kiisalu Kujataani ujarassiornermik nunap assiliornissaq ilaapput. Maannakkorpiaq suleqatigiinnerup ingerlaqqinnissaa pillugu tusagaqarnissatta tungaanut utaqqimaarallaqqavugut, Miki Jensen oqarpoq.
Nalunaarusiaq
naapertorlugu soqutigineqarneruneq pissutsinik pingasunik
pingaarnernik toqqammaveqarpoq, tassanilu nunat tamat akornanni
tusagassiorfinnit sammineqarneruneq pingaartuuvoq. Tamatuma
saniatigut aperineqartut 56 procentiisa Nuummi mittarfik ineriarnermi
pingaarutilittut inissisimasoq isumaqarput.
Pisoq
atorluarneqarli
Nunani
tamalaani takuneqarsinnaanerulerneq silatusaartumik
akisussaassuseqartumillu atorneqassasoq Visit Greenlandimi pisortaq
Anne Nivíka Grødem oqarpoq, taassumalu erseqqissarpaa Visit
Greenlandip kalaallit oqaluttuassartaasa ataatsimut isigalugit
nukittorsarneqarnissaa pingaartippaa.
- Tamanna nunatta brandiata kalaallit pingaartitaanik ataatsimullu oqaluttuamik aallaavilikkut nukittorsaanikkut pissaaq. Kalaallit Nunaat nittarsaakkaangatsigu misigisassarsiornermik pilerilersitsinissaq, avatangiisinut pingaartitsinermik, inooqatigiinnermik akisussaaqataanermik piffimmilu aningaasarsiornermut ilapittuisuunermik ilisarnaateqartoq annertunerusumik sammisarparput, tamannalu Kalaallit Nunaanni pingaartitanik siuarsarusutatsinnut naapertuuppoq, pisortaq oqarpoq.
Nunani
tamani sammineqarneruneq takornariartitsinermik ingerlatsisut
nammineerlutik annertuumik suliniuteqartinnagit pisoq, akerlianillu
avataanit pissutsinik soorlu tusagassiorfinnit sammineqarnermik,
mittarfinnit nutaanit nunarsuarmioqatigiinnillu soqutiginninnerup
annertusineranit pisoq, nalunaarusiami inerniliunneqarpoq.
Naammassinnissinnaassusermut
apeqqut
Kalaallit
Nunatta annertusiartortumik soqutigineqarnera, ingammik
naammassinnissinnaassutsimut tunngatillugu, aamma unammilligassanik
malitseqarpoq.
- Takornariat amerleriapiloornerat eqqartorutsigu, soorunami naammassinnissinnaassuseq qitiusumik unammilligassaavoq, ingammik unnuisarfinnut tunngatillugu. Naammassinnissinnaassutsikkulli unammilligassap nunarput tamakkerlugu assigiinngitsuunera paasissallugu pingaaruteqarpoq. Nunap immikkoortuisa ilaanni unnuiffissat amigaataapput, allanilu atunngisaqartoqarluni, ingammik piffissap takornariarfiunerpaasartup avataani, Anne Nivíka Grødem oqarpoq.
Kujataani
ilisimatusartunit tusagassiorfinnillu annertusiartortumik
soqutiginnittoqarnera misigineqarpoq. Ilisimatusarnermut tunngasunik
saaffiginninnerit amerlanersaat silaannaap pissusaata
allanngoriartorneranut, imminut pilersornermut, ujarassiornermut
kujataanilu aatsitassarsiornikkut periarfissanut attuumassuteqarput.
Taama Innovation South Greenlandimi pisortaq Miki Jensen
oqaluttuarpoq.
- Ingammik immikkuullarissumik ujaqqat sananeqaataannut, nunalerinermut kulturimut, silaannaap pissusaata allanngoriartorneranut, imminut pilersornerup sammineqarneruneranut UNESCO-qarfittullu inissisimanerput patsisaalluni sammineqarnerujartornerput ersarippoq.
- Trumpillu oqariartuutaanut qisuariaatitsinnut apersuinissamut ataasiakkaat aamma saaffiginnittarput, Miki Jensen oqarpoq.
Nutaaliorneq
pisariaqartinneqartoq
Nunanit
tamalaanit soqutigineqarnerup annertusinera takornariartitsinermik
ingerlatsisunit pitsaasutut misigineqarpoq, ingammik Amerikami
niuerfinnit piumanninnerup annertusiartornera pissutigalugu.
Taamaattoq ingerlatsisut arlallit piujuartitsisumik
takornariartitsinermik ineriartortitsinermik Kalaallit Nunaannut
tamarmut iluaqutsiisumik siunnerfilimmik suliniarnermik qulakkeerisoq
ujartorneqarpoq.
- Tamatta nutaaliortumik eqqarsarlutalu ungasissumut sammisumik pilersaarusiornissarput pingaaruteqarpoq, taamaalilluni siuariarneq misigisat pitsaassussaannut piffinnilu inuulluataarneq akornusernagu pisinnaaqqullugu. Takornariat ukiup immikkoortuinut nunallu immikkoortuinut pitsaanerusumik agguarneqarnissaat kiisalu aaqqiissutinik piujuartitsisunik aningaasaliinermik ikorfartuinissaq aaqqiissutissat ilagaat, Anne Nivíka Grødem oqarpoq.
Kujataani
takornariartitsineq ukiuni kingullerni tallimani
annertusiartupiloortoq, Miki Jensen oqaluttuarpoq. Init unnuiffiit
attartortinneqartut 2020-mi 20.000-init 2024-mi 38.000-inut
amerleriarput – taamaalilluni siuariarneq 86 procentiulluni.
Peqatigisaanik umiarsuit takornariartaatit nunap immikkoortuanukartut
annertuumik amerleriarput.
Trumpip oqariartuutaanut qisuariaatinik apersuinissanik ataasiakkaanik aamma saaffiginnittoqartarpoq, Innovation South Greenlandimi pisortaq Miki Jensen oqarpoq.
Foto: Innovation South Greenland
Qaqortumi
naammassinnissinnaassutsimut misissueqqissaarnissami 2026-mit ukiumut
takornariat 5-15 procentinik amerleriartarnissaat ilimagineqarpoq.
- 2026-mi Qaqortumi mittarfissap naammassinissaa naatsorsuutigineqarpoq, suliffeqarfiillu amerlasuut hotelinut, niuertarfinnik alliliinissamut angallatinillu pisinissamut aningasaliinissamut piareersalereersut, Miki Jensen oqarpoq.
Oqimaaqatigiinnermik
pilersitsisoqarli
Visit
Greenland naapertorlugu Kalaallit Nunaannut takornariarnissamut
soqutiginninneq assigiiaartumik agguarsimanngilaq, ingerlatsisummi
ilaat inniminniinertigut annertuumik siuariartoqarneranik misigipput,
allalli allanngornermik malugisaqangaarnatik.
- Suliniarnivut tikikkuminassuseq tikeqqaarfiillu nittarsaannerisigut piumanninnermik annertusaanissamik aallutaqarput, peqatigisaanillu nunatsinni piffinni allani ornitassanik ineriartortitsinissaq siunnerfeqartumik sulissutigaarput, taamaalillutalu misigisassarsiornerit neqeroorutigisaat ersarinnerulersinniarlutigit.
- Tamanna amerlanerusut tikeraartinnissaasa, takornariartullu siaruarnissaasa qulakkeernerisigut oqimaaqatigiissitsinertut isigaarput, taamaalilluni tamanna siammasissumik piffinni najugaqartunik iluaqutsiillunilu piujuartitsisumik ineriartornermik ikorfartuisinnaaqqullugu, Anne Nivíka Grødem oqarpoq.
