Suliffeqarfiup Halibut Greenlandip kisimi avataasiorluni qaleralinniarneq aallukkusunngilaa, piffissarlu kingullerpaaq atorlugu aalisarnermik ingerlatseqatigiiffimmik nutaamik pilersitsisoqarpoq.
Avalleq ApS, ilaatigut aalisarnermut naalakkersuisuusimasup Siumumeersup Karl-Kristian Krusep soraarnerussutisiaqarnermullu aningaasaateqarfiup SISA-p pigisaat aamma aallusserusupput.
Suliffeqarfiup Halibut Greenlandip kisimi avataasiorluni qaleralinniarneq aallukkusunngilaa, piffissarlu kingullerpaaq atorlugu aalisarnermik ingerlatseqatigiiffimmik nutaamik pilersitsisoqarpoq.
Avalleq ApS, ilaatigut aalisarnermut naalakkersuisuusimasup Siumumeersup Karl-Kristian Krusep soraarnerussutisiaqarnermullu aningaasaateqarfiup SISA-p pigisaat aamma aallusserusupput.
Avalleq suliffeqarfiit allat aqqanillit, ilaatigut Halibut Greenland, peqatigalugit Kitaani avataasiorluni qaleralinniarnermut, saarullinniarnermut qaleralinniarnermullu pisassiissutinut qinnuteqartuuvoq.
PIngaartumik qaleralinnik saarullinnillu pisassiissutit naleqartorujussuugamik piumaneqartorujussuupput.
Karl-Kristian Kruse 50-inik ukioqartoq ukiorpassuarni aalisartuusimavoq. Inatsisartuni 2013-imiit 2021-mut ilaasortaasimavoq, 2014-imiillu 2016-imut aalisarnermut piniarnermullu naalakkersuisuusimalluni, taamatuttaarlu 2017-imiillu 2018-imut naalakkersooqqissimalluni.
SISA-p siulittaasua: Piginnittut siammarterneqassapput
Pisassiissutinik piginnittut siammarternissaat aalisarnermut inatsimmi nutaami siunertarineqartut ilagigaat SIK-p siulittaasua Jess G. Berthelsen erseqqissumik oqarpoq.
- SISA-p soraarnerussutisiaqarnissamut aningaasaatit ilaasa aalisarnermut atornissaat siunertaraa. 40.000-inik ilaasortaqarutta ingerlatseqatigiiffillu maanna pigisarput pisassiissutinik qinnuteqarpat, pisassiissutinik piginnittut siammarternissaat siunertarissavarput, Jess G. Berthelsen oqarpoq.
Qinnuteqarsinnaanermut killissarititaq ullunik tallimanik sioqqullugu pilersinneqartoq
Aalisarnermut Piniarnermullu Naalakkersuisoqarfik soqutiginnittunut ukioq manna februaarip aallartinnerani neqeroorpoq. Qinnuteqaatit tunniunnissaannut killigititaq tassaavoq apriilip 30-at. Avalleq, apriilip 25-ani pilersinneqartoq, sisamanik piginnittoqarami taakkulu tamarmik immikkut piginneqataassutit sisamararterutaannik piginnittuugamik, pisassiissutinik qinnuteqarput.
Aalisarnermut inatsit nutaaq ukiut nikinneranni atuutilermat soraarnerussutisiaqalernissamut aningaasaateqarfiit aalisarnermut aningaasaliisinnaalerput.
- SISA-p soraarnerussutisiaqalernissamut aningaasaateqarfiup aningaasataasa ilaat aalisarnerup ineriartortinnissaanut atorniarlugit isertuutinngilaa, Jess G. Berthelsen oqarpoq.
- Qanoq kinguneqassanersoq pissangageqaara, taanna oqarpoq.
Avalliup qinnuteqaataa Naalakkersuisumit akuerineqassappat ingerlatseqatigiiffik aalisariummut aningaasaliissanerluni aalajangiissaaq, nangilluni oqarpoq.
Pisassiissutit tunineqarsinnaasut
Aalisarnermut inatsit nutaaq naapertorlugu qaleralittassiissutit tuniniarneqarsinnaasut januaarip aallaqqaataanit atuutilersinneqassapput. Tamanna Naalakkersuisut 2024-mi decembarimi aalajangernerat naapertorlugu qalerallit 4.600 tonsit saarulliillu 1.950 tonsit aalisartunut nutaanut marlunnut minnerusunut imaluunniit annerusumut ataatsimut immikkoortinneqarsimanerannik isumaqarpoq.
Tamanna aalisartut ukiup ingerlanerani aningaasarsiorsinnaanerannik qulakkeerinninneruvoq, taamaalillunilu aalisartut nutaat ingerlalluarnissaannut pitsaanerpaamik tunngavissaqartitsilluni, naalakkersuisoqarfik neqeroorummut atatillugu allappoq.
Krusemi adresseqartoq
Piginneqatigiilluni ingerlatseqatigiiffik Avalleq Nuup ilaani Nuussuarmi Sangoriami Karl-Kristian Krusep najugaani adresseqarpoq. Taanna ingerlatseqatigiiffimmi pisortaavoq, Paaviaaraq Heilmann siulersuisuni siulittaasuusoq.
Qaleralittassat ukiunut qulinut pisassiissutigineqassapput, saarullittassallu ukiumoortumik pisassiissutigineqartassallutik.
Pisassiissutinik tunineqarumalluni qinnuteqarniaraanni suliffeqarfimmik tamakkiisumik, tassa 100 procentimik, kalaallinit pigineqassaaq.
