Disko Linep ulloq 31. marts kiisami angallatitaani Maliina Ittuk Fåborg Værtimit tigummagu, ukiuni arfinilinni ilungersorneq, ajornakusoortitsineq perulluliornerlu naammassipput. Maanna umiarsuaq Kalaallit Nunaannukartussanngorpoq, tassanilu kujataani Disko Linep Qaqortup Narsarsuullu akornanni angallassinerani juunip aallaqqaataaniit aallartissaaq.
- Suliaq aporfippassuaqarsimavoq, maannali akuersissutit tamarmik pigineqalerput – pingaarnerit Søfartsstyrelsip Norske Veritasillu akuersissutaat – taamaammallu umiarsuup ilaasartaatip angisuup angallassilernissaani, Maliina Ittuup pappiarassai ilitsersuutissaalu tamarmik maanna naammassipput, Disko Linemi pisortaaneq Michael Højgaard oqarpoq.
Disko Linep ulloq 31. marts kiisami angallatitaani Maliina Ittuk Fåborg Værtimit tigummagu, ukiuni arfinilinni ilungersorneq, ajornakusoortitsineq perulluliornerlu naammassipput. Maanna umiarsuaq Kalaallit Nunaannukartussanngorpoq, tassanilu kujataani Disko Linep Qaqortup Narsarsuullu akornanni angallassinerani juunip aallaqqaataaniit aallartissaaq.
- Suliaq aporfippassuaqarsimavoq, maannali akuersissutit tamarmik pigineqalerput – pingaarnerit Søfartsstyrelsip Norske Veritasillu akuersissutaat – taamaammallu umiarsuup ilaasartaatip angisuup angallassilernissaani, Maliina Ittuup pappiarassai ilitsersuutissaalu tamarmik maanna naammassipput, Disko Linemi pisortaaneq Michael Højgaard oqarpoq.
- Ulloq 31. marts Faaborgimi umiarsualiorfimmit tiguarput. Maliina Ittuk maanna Svendborgimiippoq, tassanilu inuttassat ilinniartileruttorpagut, Fynillu kujataata imartaani sungiusarluta angalavugut.
- Sapaatit akunnialui qaangiuppata Aarhusimut aqqusaarnissaq pilersaarutaavoq, tassanilu apriilip 24-iani Topas Travelsimi sulisutsinnut sanaartornerup naammassinera nalliussiniarlugu katerisimaartitsissaagut. Kingorna Savalimmiunut Islandimullu ingerlassaagut, angalanerullu kingullersaatut Kalaallit Nunaannut angerlamut ingerlassalluta.
Sila apeqqutaavoq
- Suli Qaqortumut tikiffissaq ullulinngilarput, tamatumanimi Islandip Kalaallillu Nunaata akornanni sila apeqqutaassaaq. Kujataanilu juunip aallaqqaataanit ingerlaartussanngortipparput, tassanilu umiarsuaq Qaqortup Narsarsuullu akornanni angalatinneqassaaq, Michael Højgaard oqarpoq.
Maliina Ittuup inaarsarnera Disko Linemut ilungersunartorsiorfiuvoq. Umiarsuup ilaasunut 113-inut inissallip nutaaliamillu ingerlatillip sananera ajornartorsiuterpassuarnik aporfissiivoq.
Titartaaneq 2019-mili aallartippoq, Disko Linellu Assens Stålskibsværft suliarinnittussanngortippaa. Siullermillu corona nalaapparput – kingornalu hybridtekniki ajornakusoortitsivoq. Tamanna sanaartornerup Assens Stålskibsværtimit Faaborg Værftimut 2023-mi nuunneqarneranik kinguneqarpoq.
Siorna upernaakkut Julie Berthelsen atsiisoralugu Maliina Ittuk atserneqarpoq – atsiinerullu kingorna ingerlaalissasoq pilersaarutaaqqaaraluarpoq. Teknikili suli ilungersortitsivoq, siornalu novembarimi Michael Højgaardip qaqugu umiarsuup ingerlaalernissaa ullulerumanngikkallarpaa.
- Maannakkut qulakkeerinninnissara mianersuukkallarpara. Iluatsinngitsoornerpassuimmi paasisaqartippaatigut, teknikilu ajornartorsiortitsivissorpoq. Aqutsinermi atortorissaarutit innaallagissamik dieselitortumillu ingerlateqarnerup nikittarneranik nakkutilliisussat ilungersunartorsiortitsipput, Michael Højgaard, siorna Sermitsiamut nr. 48-mut oqarpoq.
Batteriinik ingerlateqarneq
Maliina Ittuk hybridfærgiuvoq. Tassa umiarsuaq dieselmotorimik inaallagissamillu batteerersuarneersumik ingerlasinnaavoq. Motorit innaallagiatortut marluk angisuut ingerlataapput. Taakku sarpinnut thrusterinullu nukimmik tunisisarput. Motoorit innaallagiatortut battereersuarnit, Porchenik biilit angisuut sisamat ingerlatigisinnaasaattut angitigisuninngaanneerlutilluunniit – Volv Penta dieselmotorinit marlunninngaanneerput.
- Aallaqqaammut innaallagiamik ingerlaneq umiarsualivimmi ilulissallu arferillu akornanni takornarianik angallassinermi atorneqassaaq. Batteriinik ingerlateqarneq umiarsualivinni avatangiisinut annertuumik sunniuteqarpoq – nipaqanngitsumillu ingerlasinnaaneq assersuutigalugu takornarianik arfernik takuniaatitsinitsinni iluaqutissaalluarpoq, Michael Højgaard nassuiaavoq.
- Batteriinik ingerlasinnaaneq nalunaaquttap akunnerini marlunni 8 knoberluni angalasinnaatitsivoq, Maliina Ittulli kingusinnerusukkut anginerusunik batteriilernissamut piariigaavoq. Maanna teknik pigineqartoq atorlugu innaallagiaannarmik ingerlateqarsinnaaneq piviusorsiortuunngilaq. Tassani Kalaallit Nunaanni piffiit imminnut ungasippallaarput, Michael Højgaard oqarpoq.
Takornariat innaallagiatortunik kissaateqartut
- Nalunaaquttalli akunnerini marlunni innaallagiamik ingerlaarsinnaaneq iluaqutissarpassuaqarpoq, takornariallu tamanna iluarissaqigaat qularinngilarput. Takornariat avatangiisinut pingaartitsiartorput – ukiunilu aggersuni tamanna pingaarutilimmik unammillissutissaassaaq.
- Umiarsuit hybridit umiarsuillu innaallagiaannarmik ingerlasut mingutsitsinngitsumut ikaarsaarnermut ilaapput, umiarsuaatillillu akisussaaffimminnik eqqummaarinnittut akuuffigisassaat. Taamaammat teknikikkut ajornartorsiorneq uggornartupilussuuvoq.
- Disko Line 2021-mi nunatta kujataani Qeqertarsuullu tunuani ukiuni qulini ilaasunik angallassinissamut Naalakkersuisunik sullissinissamut isumaqatigiissuteqarpoq. Isumaqatigiissutip atuuffia sivisooq umiarsuarmik taama angitigisumik aningaasaliinitsinnut toqqammaviuvoq, Michael Højgaard nassuiaavoq.
- Maliina Ittuk sivisuumik suliarineqarpoq. Siunissamulli isumannaagaavoq, peqatigisaanillu nunatsinni takunikuusatsinnit ilaasunut ilorrisimaarnarnipiluussuulluni. Umiarsuup atulernissaa qilanaareqaarput. Kalaallit Nunaanni takornarianik angallassinermi siuariarnipilussuusussaavoq.
Ukioq manna aappaagulu Maliina Ittuup kujataani angallassinissaa pilersaarutaaavoq. Kingornalu Maliina Ittuup Ilulissani mittarfik naammassippat, Qeqertarsuup Tunuanut nuunnissaa pilersaarutaavoq.
