KNAPK ilaasortanit tatigineeruttoq

KNAPK-ip siulittaasua Nikkulaat Jeremiassen Siumumiit, kattuffiup pisortaa Vittus Qujaukitsoq Naleqqamiit, kiisalu siulersuisuunernut ilaasortaq Ole Jørgen Davidsen Qullermiit, piffissami matumani Inatsisartunut qineqqusaaleruttorput.

Taamaalilluni Kalaallit Nunaani aalisartut piniartullu kattuffiisa pingasuusut annersaanni 70-it tungaanut immikkoortortoqarfeqartumi aqutsisut pingaarutilittut inissisimasut pingasut kattuffimmiit sulinngiffeqarallarput.

Aalisarnermut inatsit nutaaq ukiortaamiit atuutilersoq kattuffiup ilaasortaanut assigiinngitsutigut sunniuteqarpoq, taassumalu saniatigut kattuffiup aningaasaqanera maannakkut ajorluinnartumik inissisimavoq. 

Taamaattumik piffissami matumani unammilligassat annertuut tunullugit, kattuffiup siuttuisa pineqartut Inatsisartunut qineqqusaarnerat akisussaassuseqanngitsuliornerusoq, kattuffiullu tatiginassusaanik innarliisoq, sinerissami ilaasortat arlallit isumaqarput. 

Siulersuisuunernut ilaasortat ukiuni sisamani atuuffimminni Inatsisartunut qinígassanngortissinnaanerat atorunnaarsinneqartariaqartoq, taakku aamma isumaqarput.

Qineqqusaarsinnaasut

KNAPK-p malittarisassai naapertorlugit kattuffik politikkikkut suliniaqatigiiffiit arlaannaannulluunniit pituttorsimanngilaq, taamaattorli aalisartut piniartullu atugaat pillugit politikkikkut inatsisartoqarnikkullu sunniiniarsinnaatitaavoq. 

Tamannarpiarlu tunngavigalugu kattuffiup siulittaasua Nikkulaat Jeremiassen, pisortaq Vittus Qujaukitsoq, kiisalu siulersuisuunernut ilaasortaq Ole Jørgen Davidsen, sulinngiffeqarlutik Inatsisartunut qineqqusaarsinnaatitaasut, kattuffimmi siunnersorti maannakkullu pisortaagallartoq Mikael Petersen oqarpoq. 

Vittus Qujaukitsoq marlunngorpat Inatsisartunut ilaasortanngussappat, taanna pisortanngussaaq, Nikkulaat Jeremiassenilu Inatsisartunut ilaasortanngussappat siulittaasutut tunuassaaq, siulittaasullu tullia Jens M. Lyberth maannakkullu siulittaasuugallartoq siulittaasunngussaaq aammalu Ole Jørgen Davidsen Narsaminngaanneersoq Inatsisartunut ilaasortanngussappat siulersuisuunernut ilaasortanngussaaq.

Sinngasut

KNAPK-p siuttuisa pineqartut Inatsisartunut qineqqusaarnerat pillugu kattuffiup ilaasortaasa ilaanniit naammagittaalliuutinik tigusaqarsimallutik Mikael Petersen oqarpoq.

- Ataasiakkaannguit sinngasut tutsiuttarput. KNAPK-p siulittaasorisarsimasai Inatsisartunut ilaasortanngoraangamik tunuartarput. Sunamitaavaana ippinnartoq Nikkulaajummat Vittuummat? Inuit susassarinngisagut qanoq aamma taamaliussavagut, taanna oqarpoq.

KNAPK-mi ulluinnarni sulisut ikinneruleraangata sullissinermut sunniuteqartartoq, taamaattorli immikkoortortaqarfinnut tamanna sunniuteqanngitsoq, pisortaagallartoq oqarpoq.

Ataatsimeersuarneq ukiut sisamakkaarlugit ingerlanneqartarpoq ukiorlu manna novemberi naatinnagu ingerlanneqareersimassalluni.

 Avissaartuussutaasinnaasoq

KNAPK-i aqutsisuisa pingaarutillit politikkikkut soqutigisatik aallaavigalugit Inatsisartunut qineqqusaarnerat toqqissisimananngitsoq, Saqqami aalisartut piniartullu peqatigiiffianni allatsi Adolf Jensen oqarpoq.

- Kattuffimmi siuttut partiinut aaliangersimasunut attuumassuteqarneri toqqissisimaneranilu pissusissamisuunngilaq, tamannalu ilaasortat akornanni avissaartuunnermik kinguneqaratarsinnaavoq, taanna oqarpoq.

Ukiorlu manna kattuffiup ileqquusumik ataatsimeersuarnissaani pineqartoq eqqartorneqartariaqartoq, taanna isumaqarpoq.

Upernavimmi aalisartoq KNAPK-p nersornaasiuttagaanik nersornaaserneqarpoq

Maniitsumi aalisartut piniartullu peqatigiiffianni siulittaasuusimasoq Jakob Lyberth naapertorlugu, KNAPK-p siuttuisa qineqqusaarnerat ilaasortanit akerlerineqarpoq.

- Siuttut qineqqusaarnerat tamatta akerleraarput, kattuffimmilu siuttut partiinut aaliangersimasunut attuumassuteqartarnerat Inatsisartunullu qineqqusaarsinnaatitaanerat, ataatsimeersuarnermi qaqinneqarnissaa kissaatigineqarpoq, taanna oqarpoq.

Pakatsinartoq

Nikkulaat Jeremiassenip, Ole Jørgen Davidsenip Vittus Qujaukitsullu sulinngiffeqarlutik Inatsisartunut qineqqusaarnerat, Nuummi aalisartut piniartullu peqatigiiffianni Neqitat-nit pakatsissutigineqartoq, siulersuisuni ilaasortaq Kristian Olsen oqarpoq.

- Kattuffimmi siuttut suliassatik pingaarutillit tunuinnarlugit qineqqusaarnerat ilaasortanik sumiginnaaneruvoq, taamaattumik kattuffik ilaasortaaffigissallugu orniginarunnaarpoq.

- KNAPK partiimut sumulluunniit attuumassuteqartussaanngilaq. Kattuffiup siuttuisa nammineq soqutigisatik pinnagit, kisiannili ilaasortat soqutigisaat aallaavigalugit sulisussaapput, taamaattumik maannakkut pisut assut toqqissisimananngillat, taanna oqarpoq.

KNAPK partiinut attuumassuteqartunik siuttoqartarnera unitsinneqartariaqartoq, tamannalu ataatsimeersuarnermi malittarisassaneq allannguinikkut qulakkeerneqartariaqartoq, taanna isumaqarpoq.