KNI-mi anguniagaq: Sulitilluni ajoqusernerit 2024-mi affaannanngortinneqassapput
2024-mi sulitilluni ajoqusernerit affaannanngornissaat KNI A/S-ip anguniarpaa.
KNI-mi sulisut sulinerminni nuannaarnerat suliffimmullu tunniusimanerat nuna tamakkerlugu agguaqatigiissillugu qaffasinneruvoq, sulisulli 54 procentiinnaat misissuinermut peqataapput
KNI Pilersuisoq
KNI-mi sulitilluni ajoqusernerit ukiumi naatsorsuiffiusumi kingullermi ukiup siulianut sanilliullugu ikileriarujussuarsimapput.
2023/2024-mut naatsorsuutit naapertorlugit ukiumi naatsorsuusiorfiusumi suliffimmi ajoqusernerit 30-t nalunaarsorneqarsimapput, 2022/2023-mi ingerlatseqatigiiffimmi tamarmi sulisut akornanni 65-it nalunaarsorneqarsimasut:
- 2022/23-mi sulitilluni ajoqusernerit 65-it nalunaarsorneqarput, taakkulu taamani ukiup siulianut sanilliullugu 35-nik amerlanerupput. Nalunaarutigineqartut amerleriarnerinut pingaarnertut tunngaviuvoq sulisut amerlanerit suliffimmi avatangiisit pillugit ilinniarnermut peqataasimammata, ajutoornerillu minnerit suulluunniit tamaasa nalunaarutigisarnissaannik ilinniarnerminni kaammattorneqarsimapput. Taamaalilluni nalunaarutigineqartartut amerlipput, tamannalu isumannaannerusumik sullivimmik avatangiiseqarnissamut paasiuminarnerutitsinissamullu pitsanngoriaatissatut aqqutaavoq.
Siorna Pilersuisumi/Engrosimi sulitilluni ajoqusernerit ikileriarsimapput, ukiup siuliani 48-usimasut 2023/24-mi 19-iullutik.
Pinartortaqanngitsut
"Ajutoorsimasutut nalunaarutigineqartut pinartortaqanngitsut, annikitsuinnaanerusullu soorlu orlunerit, kimillannerit kivitsinerlunnerillu nalunaarutigineqartarsimasut" naqissuserneqarpoq.
Ajutoortarnernut tunngatillugu nalunaaruteqariaaseq ikummatissaqarnermut ingerlatsiviup periusaa assigalugu tamanit atorneqalernera assut pitsaavoq, suliffimmilu ajoqusertoqarnissaanut pinaveersaartitsinerup suli nukittorsarnissaanut KNI-p sinnerani periutsip ukioq manna atuutilersinneqarnissaa pilersaarutaavoq.
Qanoq pisoqarsimatillugu pisut nassuiarneqarnerat ingerlatsivimmi tamanut nassiussuunneqartarpoq, taamalilluni taamatut ajoqusernerit qanoq pinngitsoortinneqarsinnaanersut nassuiaatigineqartarluni, ilisimatitsissutaavoq.
Suliffeqarfimmi avatangiisit isumannaatsut peqqinnartullu KNI-mi aqutsisut pingaartikkaat ukiumoortumik nalunaarusiami erseqqissarneqarpoq, tamatumalu saniatigut sulisut naammagisimaarinninnerat pingaartinneqarpoq.
Sulinermi nuannaarneq qaffasissoq
Ukiumi naatsorsuusiorfiusumi sulisut naammagisimaarinninnerat pillugu misissuisoqaqqippoq, misissuinermilu paasineqarpoq sulisut sulinerminni nuannaarnerat suliffimmullu tunniusimanerat 82-imik 86-imillu naleqartut, tassa ingerlatseqatigiiffinni Ennovap nalilersuineri atorlugit misissuiffiusartuni nuna tamakkerlugu agguaqatigiissillugu qaffasinnerusumik.
Apeqqutaavorli kisitsisit piviusunut naapertuunnersut, siornami akissuteqartut 54 procentiinnaammata, sulisut 80 procentiisa akissuteqartarnissaat pillugu aqutsisut anguniagaannit ikinnerungaatsiarlutik.
- Sulisut misissuinermut peqataanissaasa qulakkeernissaanut suli suliniuteqarnerusariaqarnerput akisimasut taama ikitsiginerisa takutippaat, ukiumoortumik nalunaarusiami aqutsisut allapput.
Ukiumi naatsorsuiffiusumi qaangiuttumi KNI-mi 838-t sulisorineqarput.
