Kommune Qeqertalimmi eqqagassalerineq suli uiverfiuvoq

ESANI-p nittartakkamini ilisaritilluni videoliaani Kalaallit Nunaat minguitsuutissallugu suliniuteqartoqartoq takuneqarsinnaavoq. ESANI-p pisortaa Frank Rasmussen Kalaallit Nunaanni eqqakkanik isumaginninneq inuppassuarnit takornariarfigineqalissasoq, avatangiisitsinnullu siunissaq isumalluarnartoq takusinnaallugu 2021-mi oqarpoq.

Naak kommunit ataatsimut eqqagassalerinermik ingerlatsiviata pilersinneqarneraniit ukiut arfinillit qaangiutereeraluartut eqqaavissuit, ilaatigut Qeqertarsuarmiittut, takornarianut suli alutornartuliaanatillu suli mingutsitsipput.

Eqqakkat sumi tamaani

Eqqakkat ikuallassinnaasut plastikkimut poortorneqarsimasut Sisimiunilu ikuallaavimmut umiarsuarmik nassiunneqartussat katersorneqarsimasut uppissinnaasarput timmiarpassuarnillu uumasunillu putoorneqartarlutik.

Eqqakkanik isumaginninnerup tungaatigut suli annertuumik unammilligassaqartoq ESANI A/S-ip Kommune Qeqertallillu maanna nassuerutigaat

Kommuni akisussaasuusoq

Eqqakkat plastikkimik poortorneqarsimasut Sisimiunut ikuallaavimmut apuunnissaasa tungaannut isumannaatsuunissaat kommunip akisussaaffigigaa Frank Rasmussen oqarpoq.

– Eqqakkat poortorneqarsimasut kingusinnerusukkullu aaniarlugit katersorneqarsimasut qanoq suliarineqartarnerat apeqqutaavoq. Eqqakkat poortorneqarsimasut putoorneqartarnerat uppittarnerallu ilisimavarput. Timmissat amerlanertigut putoorisartut, nalunngilarpulli kommunit ilaat poortukkat illersorniarlugit iliuuseqartartut. Assersuutigalugu sumiiffiit ilaanni eqqakkat poortorneqarsimasut poorsuarnut big-bagsinut angisuunut katersorneqartarput, taamaalillutik qajannaannerulertarlutik, oqarpoq.

Sisimiuni ikuallaavik, Nuuk kisiat pinnagu, illoqarfinni nunaqarfinnilu eqqakkanik tamanik nassiussisarfik tamakkiisumik ingerlaleruttormat eqqakkanik aallertarneq akulikinnerulissasoq ESANI-mi pisortap naatsorsuutigaa.

Sikusarnera ajornartorsiutaasoq

Illoqarfinni nunaqarfinnilu eqqakkat qanoq sivisutigisumik uninngasinnaanerannut malittarisassaqartoqanngitsoq Frank Rasmussen oqarpoq. Sikusarneralu aamma unammillernartoq oqaatigaa.

– Eqqakkanik ukiukkut aallerniarneq ukiup affaata tungaanut ingerlasinnaasarpoq. Assersuutigalugu Qeqertarsuarmut umiarsuarput North Viking atorlugu eqqakkanik aallerniarluta ukioq manna angalaniarnikuuvugut, sikuli pissutigalugu taamaatiinnartariaqarsimallugu, taamaattumillu sivisunerusumik Aasianniittariaqarluta. Tamanna pissutigalugu eqqakkat poortorneqarsimasut naatsorsuutigineqartumit sivisunerusumik Qeqertarsuarmiipput. Eqqakkat maanna Qeqertarsuarmiittut siorna ukiakkut ukioq mannalu ukiuunerani poortorneqarsimasuusimassapput, Frank Rasmussen oqarpoq.

ESANI Kangaatsiami nunaqarfinnilu eqqaaniittuni eqqakkanik allertarluni aallartippoq, Qeqertarsuarmullu sapaatip-akunnerani matumani tikissasoq naatsorsuutigineqarpoq.

Ikummatissanik ikuallaaviit milliardip affaanik akillit 

Nuummi Sisimiunilu ikuallaaviit nutaat tamarmik immikkut 250 millionit koruuninik akeqarput, kommunillu tallimat ESANI A/S-imik piginneqataasut Namminersorlutillu Oqartussat ikuallaaviit taakku marluk aningaasalersorpaat – aningaasalli amerlanersaat aningaaserivinnit taarsigassiisarfinnit assigiinngitsuneersuusut Frank Rasmussen ilisimatitsivoq.

- Nalunanngilaq aningaasat piffissap ilaani taarserneqartussaasut, taamaattumik kommunit tamarmik ESANI A/S-imut ingerlatsinermut isumaqatigiissut aqqutigalugu akiliuteqartarput.

Tamatuma saniatigut eqqagassalerinermik ingerlatsivik ungasissumi kiassarnermut Nukissiorfinnut ukiuni 30-ni atuuttussamik 600 millionit koruuninik nalilinnik isumaqatigiissuteqarpoq.

- Kiassarnermut atortunik tuniniaanikkut aningaasarsiulerpugut, aningaasalli aamma kiassaanerup ingerlannerannut atorneqartussaapput, pisortaq oqarpoq.

Kommunit ESANI A/S-imut aningaasartuutaat innuttaasut amerlassusaat aallaavigalugit kisinneqartarput. Assersuutigalugu Kommune Qeqertalik ukiumut 3,5 millionit koruuninik ESANI A/S-imut akiliisarpoq.

Ajornartorsiut ilisimaneqartoq

Eqqakkanik isumaginninnermi unammilligassat kommunimit ilisimaneqartut Kommune Qeqertalimmi borgmesterip Demokraatineersup Simigaq Heilmannip erseqqissarpaa.

- Eqqakkat poortukkat suli mingutsitsinerarneqarnerat ajoraluartumik ilumoorpoq. Nakkutilliinerup amigaataaneranik pinaveersaartitsinermillu suliniuteqannginnerup kinguneranik timmissat uumasullu allat putoorisarnerannit ilaatigut taamaattoqarpoq. Aammali eqqakkanik isumannaatsumik isumaginninnissamut atortunik amigaateqarpugut. Taamaattumik kommunimi politikkikkut aqutsisut nutaat eqqakkanik isumaginninnerup nutarternissaa, eqqagassanillu isumaginninnermut atortunik pisariaqartunik pissarsisoqarnissaa sulissutigissavaat, oqarpoq.

Borgmesteri naapertorlugu eqqaavissuit pitsaanerulersinniarlugit ilungersortoqarpoq, taamaattumillu piffissami aggersumi silami ikuallaanissamut akuersissummik qinnuteqartoqassalluni.

- Avatangiisinut Aningaasaateqarfik aqqutigalugu 3 millionit koruuninik aningaasaliisoqarpoq, taakkulu ilaatigut eqqakkanik pitsaanerusumik isumaginninnermut aamma Kommune Qeqertalimmi eqqakkanik tigooraaviit nutaat pingasut pilersinnissaannut atorneqartussaapput, Simigaq Heilmann oqarpoq.

Kommune Qeqertallip kommunip eqqagassaleriffia oqaloqatigiumaaraa eqqakkat assigiinngitsut, ilaatigut saviminermik eqqakkat Sisimiuni ikuallaavimmut nassiunneq ajortut, qanoq iliuuseqarfigineqarsinnaanerat pillugu aaqqiissutissanik nassaarniarluni Borgmesterip aamma oqaatigaa.

Piffissap ingerlanerani ajorneruleriartortoq 

Kommune Qeqertalimmi eqqagassalerinermi ajornartorsiutit kommunip kommunit ataatsimut eqqagassalerinermut ingerlatseqatigiiffiannut ESANI A/S-imut ilanngunnerata kingorna ajornerulersimasut Siumumiit Kommune Qeqertalimmi kommunalbestyrelsimi ilaasortaq Franz Lundblad isumaqarpoq.

- Kommune Qeqertalimmi politikkikkut aqutsisut eqqagassalerinermik ingerlatsiviup suleqatigineqarnerata pitsanngorsarneqarnissaanik iliuuseqarnissaat piffissanngorpoq. Partiit amerlanerussuteqartut Demokraatit, Inuit Ataqatigiit aamma Naleraq ajornartorsiut annertusiartuinnartoq ilisimavaat, taamaakkaluartoq aaqqiissutissamik iliuuseqanngillat. 2023-mi januaarip aallaqqaataaniit umiarsuaq eqqakkanik assartuut qaammammut ataasiarluni illoqarfinni nunaqarfinnilu aallerumaartoq ilisimatinneqarnikuuvugut, maannali ukiut marluk qaangiutereersut tamanna suli piviusunngorsimanngilaq, taanna oqarpoq.

Periarfissaq maangaannartinneqartoq 

Naalakkersuisut ammaannartumi ikuallaanissamut qinnuteqarsinnaanermik siorna periarfissiipput. Kommune Qeqertalimmili kommunalbestyrelsimi ilaasortaasimasut qinnuteqaat, Franz Lundblad oqarnera naapertorlugu, kommunimi politikkikkut aqutsisunit ingerlateqqinneqarsimanngilaq.