Kompas-ip sulissutigaa nittartakkakkut aalisakkanik tuniniaavik ammarniarlugu

Aallarnisaasoq Jens-Jakob Sandgreen Space App ApS-milu suleqataa Allan Juhl, Wildfoodimik suleqateqarlutik kompas.gl-mik, kompas gomillu, aalisartut suliffeqarfiillu inunnit ataasiakkanik pigineqartut allaffissornikkut ingerlatsinerannik, aningaasaqarnerminnillu ajornaannerusumik aqutsisinnaanngortitsisussaq ineriartortippaat.

- Taanna aalisartumut tamakkiisumik aaqqiinertut taarusuppara, tassa allaffissornermut aningaasaqarnermillu aqutsinermut tunngatillugu. Piareerutsigu taava aalisartup tunisinissaanik ikiornissaa tullinnguutissaaq, Jens-Jakob Sandgreen, qarasaasiakkut isaariaq kompas.gl atorlugu aalisartup pisaanik nunarsuarmi pisisartunut qaffasinnerpaamik akileerusuttunut tunisinissaanik ikiuukkusuttoq oqarpoq.

- Piffissap ingerlanerani illorsuarmik illumilluunniit akitsorterussisarfimmik pigisaqanngikkaluarluni, qarasaasiakkut akitsorterussivik atorlugu pisisussanut toqqaannartumik tunisisarneq nunatsinni iluatsinneqarumaarpoq, ukiualuilli ingerlaqqaassapput, Jens-Jakob Sandgreen oqarpoq, qarasaasiakkullu akitsorterussinerup qanoq pinissaa nassuiaatigaa:

Berlinimi, Københavnimi New Yorkimilu pisisartut

Kompasikkut amerlasuunut attaveqarneq imminullu isumagisumik qarasaasiakkut akitsorteriffik qularnaarneqassaaq, taamaalilluni kikkut tamarmik tunisassiat sumi pisarineqarnerannik, tulaanneqarnerannik suliarineqarnerannik kiisalu sumi toqqortarineqarlutillu aaneqariaannanngorlugit tunineqarnissaata tungaanut kikkunnit paarineqarnerannik malinnaasinnaassapput.

- Kompasiminngaanniik qarasaasiakkut akitsorterivimmik neqerooruteqassaagut, tassanilu sms-it emailllu pisisartunut nassiuttassavagut, taamaalilluni taakku piffissamit pisaqarfimmit, tulaassiffimmut, timmisartup assartuisussap aallarnissaata uppernarsarneqarnerannut malinnaasinnaassapput, taavalu akitsorterinikkut tuniniaaneq aallartissavarput, pisisussaallu neqeroorsinnaalissapput, imminullu isumagisumik akisunerpaaffissatut aalajangikkap tungaanut neqeroorsinnaalissallutik, Jens-Jakob Sandgreen oqarpoq. 

Akitsorterineq aallartippat, pisisussaat assersuutigalugu Københavnimeersut, Berlinimeersut New Yorkimeersulluunniit pisiassap piffimmi aaneqarnissaminut piareernissaata tungaanut, imminnut akimik unammissapput.

- Nalunaaquttap akunnialuini nioqqutigineqartut uninngatinneqassappata, akitsorterussineq ingerlaannassaaq, taamaalillunilu qaffasinnerusumik akilersillugit tunineqarsinnaanerannut periarfissaqassaaq. Ukiunilu marlussunni siullerni pisisussaqarnissaa qularnaarniarlugu ”ingerlaannartumik pisiarinerannut aki”-mik peqarnissarput minnerpaamik piumasarissagipput naatsorsuutigaarput, Jens-Jakob Sandgreen oqarpoq.

Tunisassiat oqaluttuartallit

Aasaq manna pisisussat umiatsiaararsortorlu aalisakkamik pisaqartoq pisat amuneqarnerannit qalallugit sassaalliutigineqarnerannut malinnaasinnaalissapput.

- Aasaq mannaminngaanniik pisat Kompa-ikkut nalunaarutigineqarpata, kompasip qarasaasiakkut tunisassiamik malinnaaneq pisinnaanngortissavaa, tassanilu naggataagut pisisussaat aalisartulluunniit sukkulluunniit tunisassiap oqaluttuassartaa takusinnaassavaa, tassa raajaappata, saattuaappata, uiluiuppata, nipisaat suaappata, nilaappataluunniit, piffissaq pisarineqarfiat, angallatip suunera sumilu pisarineqarnerat. 

- Paasissutissallumi inatsisitigut piumasaqaataareerput, taakkulu sila pillugu paasissutissanik takussutissanillu ilassavagut, tunngaviusumilliuna paasissutissat taakku pisisartumut, qaqutikkut nioqqutissanik inuussutissanik takusaqartartumut immikkuullarissumik oqaluttuanngortittussaagivut, Jens- Jakob Sandgreen oqarpoq. 

Alloriarnerlu tulleq tassaassaaq aalisakkanik suliffinnik avammut niuersinnaanermik akuersissutinik suleqatigiissuteqarneq.

Avannaa pingaarutilimmik nassitsivinngussaaq

Ilulissat mittarfissaat aalisakkanik, suannik qalerualinnillu nutaanik avammut niuernermi pingaarutilimmik inissisimalernissaa, Jens-Jakob Sandgreenip ilimagaa.

- Nioqqutissiassat immikkuullarissut Kalaallit Nunaata nunarsuup sinneranut neqeroorutigisinnaasai, annertunertigut avannaaniipput, Ilulissallu tunisassiassat pisarineqarlaat silaannakkut angallannissaannut tunngatillugu pingaarutilimmik inissisimaffeqassaaq, taanna oqarpoq, avannaanilu aalisariuteqarnerunera nassuiaatigalugu.

- Isumaqarpunga avannaa pingaarnertut pilersuisuussasoq, taavanimi – Aasiaat Uummannarlu ilanngullugit - aalisariuterpassuit illoqarfinnut nunaqarfinnullu siuariarsimapput, Jens-Jakob Sandgreen oqarpoq.

Ineriartortitsinermik suliaqarneq

Kompasimik ineriartortitsinermi suliaqarnermi alloriarnernut tullernut aalisakkerinermik suliffeqarfimmik avammut niuersinnaanermik akuersissuteqartumik peqatitaarnissaq ilaaniartussaavoq, tassanngalu niuerfik niuerfiilluunniit kalaallit nioqqutissiassanik tunisassiaannik qaffasissumik akeqartitsilluni pisinissamik soqutiginnittut misissorneqassapput.

- Kalaallit raajaataannik, nilaataannik, nipisaat suaataannik, suluppaagaataanik ataasiaannarnani, arlaleriarlunili pisinissamik soqutigisaqarneq, tassanilu ingerlaannartumik akiliiumassuseqarneq, ullut tamaasa periarfissanilu allani pigeriikkaminni, Jens- Jakob Sandgreen oqarpoq, taassumalu nuimasorujussuarmik neriniartarfiutilimmik niueqatigiinnillu USA-mi nioqqutissanik ingerlatitseqqiivimmut ilanngussinnaasumik oqaloqateqarnertik nassuiaatigaa.

- Saaffigisassatta allatut periarfissaqarlutik aamma aalisakkanik inuussutissalerisooreernissaat nassuerutigisariaqarparput, taamatullu annaassisinnaasumik aaqqiissummik tunniussassaqannginnitsinnik, periarfissamillu allamik periarfissiiginnarnerput immitsinnut nassuerutigissavarput. Akimik anguneqarsinnaasorisamik suli qaffasinnermik, taamaalilluni tuniniaanermi akersuunneq ajornarnerulersillugu.

- Nuannerumaarnerali upperaara. Utaqqisinnaanermut akissaqaraanni tamanna pingaaruteqarpoq, taamaalillunilu ineriartornermik sukkavallaamik ingerlatsinaveersaartoqassaaq. Iluatsissaqqaarporli, Jens-Jakob Sandgreen oqarpoq.

Timmisartunik assartuutinik pisariaqartitsineq

Aalisakkanik, suannik qalerualinnillu aamasunik avammut niuernissamik pilersitsinissami, timmisartutigut assartuinerit ilaasunik timmisartuussisunik toqqammaveqarnera unammilligassani annernut ilaavoq, taamaaliornermilu pisaqarnermit sassaallernerup tungaanut nalunaaquttap akunneri 54 angullugit ingerlaqqaartarnissaanni tunisassiassat nalingisa apparpallaarnerannik nassataqartassaaq.

- Qalerallit assersuutigalugu pisisumit isigalugu tuneqqinnerani aningaasartuutit ilanngullugu kiilumut 100 kr-lik tigugutsigu, taava nioqqutissap nalunaaquttap akunnerinit 24-nit sivisunerusumik ingerlannera pissutaalluni kiilumut 10 koruuninik nalikinnerulissaaq, taamaalillunilu usini assartukkani tonsimut tamanna 10.000 koruuninik naleqassaaq.

- Quleriarluni angallassinermi 100.000 koruunit annaaneqassapput, 100-eriarlunilu angallassinerni, ukiumut ullut pingasukkaarlugit timmisartuussisarnerni, nalitigut annaasat 1 million koruuniussapput, Jens-Jakob Sandgreen oqarpoq, taassumalu tutsuiginartumik sukkassuseqarnissap unammillernartuunissaa nassuiaatigaa.

- Kalaallit Nunaat aalisakkanik qalerualinnillu silaannakkut angallassiffittut iluatsissappat, tamanna timmisartoq unnuakkut aallartartoq atorlugu pissaaq. Neqeroorneq akisunermillu neqeroorneq Københavnimi pippat, Nuummut Ilulissanulluunniit tulaassat unnukkut kingusissukkut umiarsualivimmit mittarfiliaanneqarsinnaapput, tassanngalu unnuap qeqqa sioqqutilaarlugu aallarsinnaallutik, kingornalu ullaap tungaani kaattaassinermi ajugaasumut assartorneqarlutik.

- New York assartuiffissaappat, taava pisanik tulaassiffik unnuakkut pisinnaavoq, timmisartorlu tasamani ullaap tungaani kingusissukkut anngussinnaaqqullugu ullaakkut aallassaaq. Matumani immamit puuguttamut pisat nalunaaquttap akunnerini 24-ni anngussinnaanerat pineqarpoq, ataasiaannarnani, ullulli tamaasa ullormut akimut sapinngisamik qaffasinnerpaamik malinnaaffigineqarsinnaallutillu misigisaqarfiusinnaasunik, kalaallit tunisassiaasa pitsaasumik tutsuiginartumillu tusaamaneqarnissaannik pilersitsinissaq matumani pineqarpoq. Taamaaliornissami kompasitut ittut pisariaqarput.

- Timmisartup Kalaallit Nunaannit aallartussap ulikkaarlugu immernissaa suliassap affaannaraa. Aappaa tassaavoq timmisartup assartuutip naasunik naatitanillu nutaanik poortukkanillu ulikkaarlugu Kalaallit Nunaannukartinnissaa, taamaattoqarnissaanummi timmisartumik assartuummik, ilaasunik angallassisutulli sakkortuunik piumasaqaateqarfiunngitsumik attartorneq aningaasalersuinerluunniit imminut akilersinnaassaaq.

Taamaammat Jens-Jakob Sandgreenip nammineq qarasaasiakkut akitsorteriveqalernissaq iluatsissappat tamanna nunatsinnut annertuumik isumalluutinillu atuiffiusumik ineriartortitsinermik pisariaqartitsissasoq eqqoriarpaa.

- Manna nunatsinni niuerfimmik annertuumik ineriartortitseqqinneruvoq. Taamaammallu aamma ukiualuit ingerlaneranni ineriartortinneqaqqaassaaq. Aasaru aappaaguluunniit aasakkut piareernavianngilaq, ukiualuilli ingerlaqqaassapput. Unammilligassaq maaniinngilaq, tasamaniippoq, tamannalu ataatsimoorluta angusariaqarparput.