Martha Lund Olsen kattuffimmit ilaasortaajunnaarsitaavoq
Kalaallit Nunaanni inunnik siunnersortitut ilinniagallit peqatigiiffiata siulittaasua Martha Lund Olsen AK-mit ilaasortaajunnaarsitaasimasoq AK-p nalunaarutigaa. Aammattaaq NIISIP-imi siulersuisunut ilaasortaq AK-mit ilaasortaajunnaarsitaasimavoq.
Isumaqatigiissut atsioqqammersoq pillugu Martha Lund Olsen oqaaseqarnini pissutigalugu AK-mit ilaasortaajunnaarsitaavoq.
Toqqorsivimmit assi: Leiff Josefsen
Atorfillit Kattuffiata (AK) Kalaallit Nunaannilu inunnik siunnersortitut ilinniagallit peqatigiiffiata NIISIP-ip isumaqatigiinngissuteqarnerisa kingunerisaanik, Martha Lund Olsen, NIISIP-imi siulittaasoq, AK-p ilaasortaajunnaarsippaa.
AK-p isumaqatiginninniutiginninnermini isumaqatigiissutaa nutaaq, ilaasortallu taasissutigisassaat, sapaatip-akunnerata siuliani Martha Lund Olsenip isornartorsiormagu ilaasortaajunnaarsitaavoq. AK naapertorlugu isumaqatigiissut nutaaq pillugu Martha Lund Olsen kukkusumik paasissutissiisimavoq.
NIISIP-ip ilaasortani itigartitseqqullugit kajumissaarai Martha Lund Olsen sapaatip-akunnerata siuliani oqarpoq, Martha Lund Olsenip oqarnera naapertorlugu isumaqatigiissut nutaaq NIISIP-ip ilaasortaasa qaangiuttoorluni sulisimanermut akissarsisinneqartalernissaannut periarfissaannik ajornerulersitsimmat. Tamannali eqqunngitsuusoq AK allappoq:
AK: Isumaginninnermi siunnersortit qaangiuttoorlutik sulisimagaangamik nalunaaquttap-akunneranit siullermit akissarsisinneqartassapput
- NIISIP-imi ilaasortat qaammatit pingasukkaarlugit akunnerit 52-it sulisimagunik taamaallaat qaangiuttoorluni sulisimanermut akissarsisinneqartarnissaat eqqunngitsuusoq AK-p erseqqissarpaa. Isumaginninnermi siunnersortit oqartussat ataanni atorfeqartut sulisunut nalinginnaasumik suliartoqquneqariatarsinnaanermut pisussaaffilinnut ilaanngillat.
- Nalunaaquttap akunneranit siullermit qaangiuttoorluni sulisimanermut sulisunut akissarsisinneqartartunut isumaginninnermi siunnersortit ilaapput, oqarasuaatikkut pigaartuunermi aggersagaasimagaanni, soorlu taamaattuaannarsimasoq, kattuffik allappoq, Sermitsiallu oqaaseqaatinik AK-mut saqqummiusseqqaarnani saqqummiussisimanera pillugu isornartorsiorpaa.
Martha Lund Olsen ilaasortarlu alla ilaasortaajunnaartitaapput
Martha Lund Olsenip oqaaseqarnerata kingunerisaanik taanna NIISIP-imilu siulersuisuni ilaasortaq alla ilaasortaajunnaarsitaapput:
- Tusagassiuutinut nalunaaruteqarnissaq Niisip-imilu ilaasortat ilaannakuusumik suliunnaarnissaannik kaammattuuteqarnissaq sioqqullugu, isumaqatigiissut nutaaq pillugu Niisip-ip siulittaasua tamakkiisumik paasisaqarniarluni AK-mut saaffiginninngimmat, AK-p siulersuisui aalajangerput – AK-p malittarisassai naapertorlugit – Niisip siulittaasua AK-mit ilaasortaajunnaarsinniarlugu.
- Taamatuttaaq Niisip-imi siulersuisuini ilaasortaq ataaseq taanna tunuliaqutigalugu ilaasortaajunnaarsitaavoq. Ataatsimeersuarnermi tulliuttumi ilaasortaajunnaarsitaasut ilaasortaajunnaarsitaasimanertik inaarutaasumik aalajangiiffigitissinnaavaat.
Kattuffik tamanna pillugu oqaaseqaqqikkusunngitsoq AK-p aamma ilisimatitsissutigaa.
Martha Lund Olsen
Ilaasortaajunnaarsitaasimanertik pillugu ilisimatinneqarsimalluni, tamannalu tupaallaatigalugu, Martha Lund Olsen Sermitsiamut oqarpoq.
Isumaqatigiissut pillugu oqaaseqannginnermini AK saaffigisimanagu Martha Lund Olsenip nassuerutigaa. NIISIP-ip AK-llu akornanni attaveqatigiinneq ajorsimavoq, Martha Lund Olsen nassuiaavoq:
- Siusinnerusukkut isumaqatiginninniarnerit qanoq ingerlasimanersut pillugit AK-mut apeqquteqarnikuuvugut, isumaqatiginninniarnerilli qanoq ingerlasimanerannik NIISIP-ip ilisimatinneqartarnissaanik AK pisussaaffeqanngitsoq akissutisivugut, taamaattumillu NIISIP-ip AK saaffigeqqinngisaannarpaa, Martha Lund Olsen oqarpoq.