Moriusap eqqaani aatsitassat annertussusaat isumaqatigiinngissutaasoq

September 2023-mi pappiaqqanik nalilinnik niuffaffimmut nalunaaruteqarnikkut, tuluit aatsitassarsiortitseqatigiiffiata Bluejay Miningip suliffeqarfiup pigisami Dundas Titaniumip aktiaateqartulluunniit Dundasimi suliniutip kisimi ineriartortillugu siuarsarnissaa siunnerfiginagu nalunaarutigaat. Taamattaaq piginnittutut ingerlatseqatigiiffik suliniummut aningaasatigut allanik pisussaaffiliinermik nangitsissanngitsoq nalunaarutigaa.

Isumalluutit affaannanngortut

Nalunaarut tupaallannartoq 2022-mi Australiamiut aatsitassarsiortunik siunnersuisartut Palaris qallunaallu ingeniørii siunnersuisartut GEO-p misiliillutik ilmenitimik isumalluutinik qillerinernik misissueqqissaarnernillu ingerlatsinerannut tapiliullugu missingiutinik nutarnerinerat tunuliaqutaralugu saqqummiunneqarpoq. Taakku 29,7 million tonsinik 2 procentit missaannik minguissusilimmik ilmeniteqarnera missingerpaat, taannalu 2019-mi missingiinermit 59,3 million tonsinik 3,26 procentimik minguissusilimmik ilmeniteqarneranik missingiinermut sanilliullugu affaannaapput.

Suliniut ingerlaannassappat tamanna aningaasalersuisartumik peqateqarnissamik pisariaqartitsiviussaaq, taamanikkut pisortaasoq Bo Møller Stensgaard Sermitsiamut oqarpoq. Qaammatialuit qaangiuttut taanna taamanikkullu pisortaq Hans Jensen Dundas Titaniumimiikkunnaarput.

Aktiaatilinnut tupaallaataasoq 

Pisortat nutaat 15. marts 2024 sulilersinneqarput, taamanikkullu ilisarisimaneqareersoq Roderick McIllree, siusinnerusukkut ingerlatseqatigiiffimmut siuttuusimasoq, taamatullu aamma Nikkeli Greenlandimi siulersuisuniittoq siuttunngortinneqarpoq. Taanna siusinnerusukkut Greenland Minerals and Energymut (kingusinnerusukkut Greenland Mineralsimik maannalu Energy Transition Mineralsimik ateqartumi) pisortaasimavoq. Roderick McIllree siusinnersukkut Greenland Gas and Oilimik pilersitsisuuvoq.

 Taassuma saniatigut Australiamiu Eric Sondergaard Dundas Titaniumimmi siulersuisunut siulittaasunngortinneqarpoq.

Pappiaqqanik nalilinnik niuffaffimmut nalunaarummi Sermitsiamullu mailimi Eric Sondergaardip 2022-mi aatsitassanik isumalluutinut missingiut, isumalluutit annertussusaannik annikillisitsisoq ”aktiaatilinnut imminerminullu tupaallatsitsisoq” oqaatigaa.

Eric Sondergaard naapertorlugu siulersuisut nutaat 2022-mi qillerinermik suliaqarneq, eqqortutut eqqortumillu takussutissiisutut isiginngisartik, suliffeqarfimmi attuumassuteqanngitsumik misissortillugu aallartippaat: – Suliarput attuumassuteqanngitsunit, nunarsuarmilu aatsitassarsiornermik immikkut ilisimasalittut isigineqartunit suliarineqarpoq, 2022-milu qillerisitsinerup, aalajangiinerit ingerlaneranni kingunerannillu aasitassanik isumalluutinik allannguinermut tunngatillugu imaannaanngitsunik apeqqutissaqalersitsilluni. Pisortaasimasut 2022-mi qaammammi ataatsimi eqartumik misissuisimanerup siusinnerusukkut ukiuni pingasuni ingerlaavartumik suliamit eqqornerusumik takutitsisuuneranik oqarnerat ajornartorsiornarpoq, Eric Sondergaard oqarpoq. 

Eqqartuussivilersuussinissaq isumaliutigigaat

Ingerlatseqatigiiffiup nammineerlutik misissuinertik tunuliaqutaralugu 2022-mi annertussusiliineq isiginiassanagu, taarsiullugulu qaffasinnerusumik annertussusiliineq 2019-meersoq atoqqilissallugu aalajangerpaat. 

Tamatuma saniatigut ”inunnut, tassanilu pisortaqatigiinnut siusinnerusukkut ilaasunut aatsitassatigut isumalluutinik naliliinermut akuusunik inatsisitigut periarfissanik isumaliuteqarnertik” ingerlatseqatigiiffiup nalunaarutigaa.

Nalik Ventursimi, Bluejay Miningimi 1,2 procentimik piginneqataasumi senior investeringsrådgiverip Per Buhl Olsenip suli Dundas Titaniummimi siulersuisuni ilaanini oqaatigaa. Taamaattoq siulersuisuni ilaasortanik taarsiinermut akuusimananilu ilisimatinneqarsimannginnini oqaatigaa.

Oqaaseqarusunngitsoq

Sermitsiap iluatsinngitsumik siulersuisuni ilaasortaasimasut pissarsiariniaraluarpai, siulersuisullu qallunaat aatsitassarsiornermik siunnersuisarfiannut GEO-mut, Australiamiut aatsitassarsiornermik siunnersuisarfiat Palaris peqatigalugu 2022-mi aatsitassanik isumalluutinik missingiisumut oqaaseqarfigitinniarsimagaluarpaa. GEO-mit ima oqaaseqartoqarpoq: ”GEO-p Dundas Titanium A/S Bluejay Miningilu Kalaallit Nunaanni pingaarnertut atortussiat piujuartitsinerusumik passunneqarnissaannik ikiorpaa. Passussineq taanna Kalaallit Nunaannit atortussianit tamanit immikkoortiterineruvoq, taamaaliornermilu misissoqqissaagassatut immikkoortitat kisimik Nagromimut Perthimut Australiamiittumut nassiunneqarlutik. GEO atortussianik misissueqqissaarnermik suliaqanngilaq, Australiamilu inerniliinernut oqaaseqassanani.”

Allaaserisap naqiterneqartussanngortinneqarnera sioqqullugu Sermitsiaq Palarisimit Australiameersumit oqaaseqartitsinissaq iluatsinngilaa.

Aatsitassanik isumalluutinik naatsorsukkat allanngorartut

GEUSimi ilisimatusartoq soraarneq Per Kalvig suliamut aalajangersimasumut oqaaseqarumanngilaq, taasumali aatsitassanik isumalluutinik naatsorsuinerit piffissap ingerlanerani allanngortarnerisa nalinginnaasuunera oqaatigaa.

– Aatsitassarsiorluni misissuinerit aatsitassanik iluaquteqarsinnaanermik periarfissaqarneranik/periarfissaqannginneranik takutitsinissamik siunertaqartarput. Naliliinerit ilaatigut nassaap annertussusianik pitsaassusianillu naliliinerusarput. Piffissap misissuiffiusup ingerlanerani eqqoriaanerit taakku qularnaalliartortarput. Akilli aningaasartuutillu peqassutsimut naliliinermut ilaasarmata, aatsitassaanik isumalluutinik naatsorsuinerit allanngorartarput, piffissallu ingerlanerani tamatigut pitsanngoriarlutilluunniit ajornerulertarlutik. Aatsitassanik isumalluutinik naatsorsuinerit aningaasaqarnikkut annertuumik sunniuteqartarmata, taakku piffimmi akuersissutaatillit paasissutissaatai tunuliaqutaralugit, immikkut ilisimasalinnik akuerisanik attuumassuteqanngitsunit suliarineqartarput.