Iluliarsuit ingerlaartut Kalaallit Nunaata eqqaani umiarsurnut ulorianartorsiornerulersitsisut

Kalaallit Nunaata imartaani iluliarsuit 2000-imiilli sisamariaammik amerlisimapput.

Tamanna misissuinermi nutaami DTU Space-meersut Tysklandimeersullu Amerikameersullu suleqatigiillutik suliarisimasaanni erserpoq.

Iluliarsuit silaannaap kissakkiartornera pissutigalugu immamut nakkaasarput.

Ilisimatuut naapertorlugit iluliarsuarnik naapitsinissaq umiarsuarnut takornariartaatinut assartuutinullu ajornannginnerulerpoq.

- Kalaallit Nunaata sermersua aakkiartortillugu imaq qaffakkiartorpoq. Allanngornerilli issittumi pissutsinut tamarmiusunut sunniuteqartut aamma takusinnaavarput, professori Shfaqat Abbas Khan DTU Space-mit tusagassiutitigut nalunaarummi oqarpoq.

Ilisimatuut Kalaallit Nunaata Svalbardillu akornanni Framstrædemi iluliarsuit ukiuni 40-ni misissuiffigineqartarsimasut qaammataasakkut paasissutissanut, sikumik assilialiornermut immallu naqqanik misissuinernut sanilliuppaat.

Ilisimatuut naapertorlugit Tunup avannaani iigartartut angisuut arlallit allanngorarnerulerlutillu ilulianik aniatitsinerulersimanerat iluliarsuit amerliartornerinut pissutaavoq.

Tamatuma kingunerisaanik iluliarsuit amerliartuinnartut immamut nakkaasarput.

Tamatuma saniatigut siku milliartorlunilu ingerlaarnerulersimavoq.

Tamanna iluliarsuit Issittumi ungasissumut ingerlaarnissaannut ajornannginnerulersitsivoq.

Iluliarsuit amerliartuinnartut sumiiffimmi tassani umiarsuarnik angallassinermut unammillernartunngortut misissuinerup takutippaa

Umiarsuarnut ingerlaartunut aalisartunullu iluaqutaasussamik nakkutilliinerunissaq aarlisaarinerunissarlu pisariaqartoq ilisimatuut taamaalillutik erseqqissarpaat.

Iluliarsuit immap uumasuinut qanoq sunniuteqartarnertut ilisimatuut aamma misissorsimavaat.

Tassami iluliarsuit ujarappassuarnik siorarpassuarnillu nunamiit immamut kilometerinik hundredelinnik ungasitsigisumut nassataqartarput.

Tassani ujaqqat sioqqallu immap naqqanut kiviartortaramik ilaatigut pupinnut, immap naasuinut uumassusillinullu allanut najugaqarfiulersitsisarput.

Ilisimatuut naapertorlugit Issittumi silap pissusiata allanngoriartornera annertuumik kinguneqarpoq.

- Immap qaffakkiartornera kisimi pissutaanani aammali sermersuarnit ungasissumi immap itissusiani uumassusillit ataqatigiinnerat toqqaannartumik sunnerneqartoq misissuinerup nutaap takutippaa, Shfaqat Abbas Khan oqarpoq.

Misissuineq tamanna ilisimatuussutsikkut atuagassiami Nature-mi saqqummersinneqarpoq.

/ritzau/