Peqquserlunneq pillugu isumaqatigiissut partiit avissaartuussutigigaat

Naalakkersuisut Kalaallit Nunaata FN-ip peqquserlunnerup akiorniarnera pillugu isumaqatigiissutaanut ilanngunnissaa ingerlaannaq sulissutigisariaqarpaat. Inatsisartunut ilaasortaq Pipaluk Lynge (IA) taama siunnersuuteqarpoq.

Siunnersuut sisamanngormat aappassaaneerneqarmat Inatsisartuni partiit avissaartuupput.

Avissaartuunneq Inatsisit pillugit ataatsimiititaliap nalunaarusiaani allassimareerpoq. Inatsisinut ataatsimiititaliami partiit sisamat ilaasortaapput, siunnersuullu assigiinngitsunik pingasunik inassuteqaateqarpoq.

Demokraatit ataatsimiititaliami sinniisaat marluk Naalakkersuisut allannguutissatut siunnersuutaannik tapersersuipput. IA-p Atassutillu sinniisaata siunnersuutigineqartoq akuerineqassasoq kissaatigaat. Naleqqallu sinniisaata siunnersuut itigartikkusuppaa.

Allannguutissatut siunnersuut nutaaq saqqummiunneqartoq

Siunnersuutip siunertaa pingaarnerusoq, tassa peqquserlunnermik akiuineq, partiit tamarmik tapersersorpaat, isumaqatigiissummulli ilanngunnerup aningaasaqarnikkut allaffissornikkullu kinguneqartussatut nalilerneqarnera, tamatumalu allaffissornikkut aqutsinermut tatisinissaa ajornartorsiutaavoq.

Aammattaaq peqquserlunnerup akiorniarneranut najoqqutassiat pingaarnerit ilaat inatsisinut ullumikkut pisortat ingerlatsinerannut atuuttunut ilaalereerput.

Siunnersuutip sisamanngornermi Inatsisartuni suliarineqarnerani partiit avissaartuunnertik attattuarpaat. Suliarinninneq aallartinneqarmat Naalakkersuisut allannguutissatut siunneruummik nutaamik, Pipaluk Lynge siunnersuutaanut assingungaatsiartumik, saqqummiussipput:

“Atorfimmut peqquserlunnerup akiornissaanut Naalagaaffiit Peqatigiit isumaqatigiissutaannut Kalaallit Nunaata ilanngunnissaata sulissutigineqalernissaa aallartinneqaqqullugu Naalakkersuisut aalajagiiffigisassaattut siunnersuut. Suliap peqquneqarnissaannik ingerlanneqarneranut Naalakkersuisut Inatsisartunut ataavartumik ilisimatitsisassapput.”

Asii Chemnitz Narupimit 2022-mi saqqummiunneqartoq

IA-p inatsiseqarnermut ataatsimiititaliaani ilaasortap Nivi Rosingip siunnersuut nutaaq pissutigalugu siunnersuutip ataatsimiititaliamut utertinneqarnissaa innersuussutigisimavaa.

Naleqqamit ataatsimiititaliami ilaasortap Kuno Fenckerip aamma Siumumi ilaasortap Nivi Rosing taperserpaat. Taamaalillunilu Inatsisinut Ataatsimiititaliaq suliamik nalilersueqqittariaqalerpoq.

Pipaluk Lynge ullumikkut Kalaallit Nunaanni ileqqorlunnerup peqquserluttuliornerullu siusinnerusumut naleqqiullugu navianarnerusut, taamaattumillu nunat tamalaat suleqatigiinnerisa nukittorsarneqarnissaa isumaqatigiissutinillu malinninnissaq pingaaruteqarluinnartoq isumaqarluni siunnersuummut tunngavilersuutimini ilaatigut allappoq.

Siunnersuut tamanna aamma qinigaaffimmi kingullermi taamanikkut Inatsisartunut ilaasortamit Asii Chemnitz Narupimit Inuit Ataqatigiinneersumit saqqummiunneqarsimasoq aamma maluginiaqquaa.

Taamanikkut Naalakkersuisut peqquserlunnerup akiorniarnissaanut ataatsimut periusissiamik suliaqarnissamik pisussaaffilerneqarnissaminnik allannguutissatut siunnersuuteqarput, tamannalu akuerineqarpoq.