Najukkami siulittaasoq Ittoqqortoormiini innuttaasunik ataatsimiititsinerup kingorna: Naalakkersuisut uuliasiortitseqatigiiffimmik oqaloqateqarneq tigusariaqarpaat

Aatsitassarsiortitseqatigiiffiit marluk 80 Mile aamma Greenland Energy Company Jameson Landimi, illoqarfimmit 50 kilometerisut ungasitsigisumiittumi, uuliasiornissartik pillugu Ittoqqortoormiini katersortarfimmi innuttaasunik ataatsimiisitsinissamut pingasunngornermi unnukkut qaaqqusipput.

Sermitsiap paasissutissaatai naapertorlugit, 80 Mile-mi pisortaq Olga Solovieva aamma Greenland Energy Company-mi pisortaq Robert Price nalunaaqutaq pingasut missaanni qulimiguulimmik attartorsimasaminnik tikipput, nalunaaqutarlu 21.30 missaani aallaqqillutik.

Katersortarfimmi ataatsimiititsisoqarmat amerlasuut peqataasut

Illoqarfimmiorpassuit katersortarfimmut taakkussimasut, najukkami ataatsimiititaliami siulittaasoq Hans Brønlund Sermitsiamut oqaluttuarpoq.

- Immaqa 50-it sinneqarpugut amerlanerullutaluunniit. Tassami katersortarfik ulikkaavippoq, Hans Brønlund oqarpoq. Taassuma maluginiarpaa Robert Pricep arlaleriarluni oqaatigisaraa, angunni sorsunnersuit aappaanni Nunatsinni suliffeqarsimasoq.

- Tamanna upperiuminaatsilaarparput. Aamma neriorsuuterpassuisa ilaat upperiuminaatsippavut, Hans Brønlund oqarpoq, taassumalu Robert Pricep pissusilersornera uukapaatitsiniarnertut taavaa.

 - Ataatsimiinnermi inuppassuit akerlilerniarsarigaluarpaat, apeqquterpassuillu akissutissaqartinngilai, Hans Brønlund oqarpoq.

Najukkamit piumasaqaatit 

Aamma atuaruk

Najukkami naammagittaalliuut: Akuerinngilarput qangamut qimanneqarnissarput, ilissilu nunatsinni milliardinik aallernerusi

Najukkami ataatsimiititaliap ataatsimiititsinissaq sioqqullugu Naalakkersuisut ingerlatseqatigiiffillu peqataatitsinnginnerarlugit isornartorsiorpaat, aamma ingerlatseqatigiiffimmut piumasaqaatinik arlalinnik suliaqarsimapput, assersuutigalugu timersortarfiup allilerneqarnissaanut illuaqqanillu piniariartarfinnik pilersitsisoqarnissaanik piumasaqarlutik.

Ingerlatseqatigiiffik taakkununnga piumasaqaatissinnik oqaluttuuppiuk?

- Naamik, taamaaliuungilanga. Upperinnginnakkit. Naalakkersuisut piumasaqaateqartussaallutillu ingerlatseqatigiiffinnik oqaloqateqartussaapput, taamaanngippat uukapaatinneqarsinnaagatta.

 Arlaannik oqarfigivigit?

– Innuttaasunik ataatsimiititsinerup nalaani naamik. Innuttaasunilli ataatsimiititsinissaat sioqqullugu sivikitsumik ataatsimeeqatigaavut, tassanilu aperivakka sooq borgmesteri aamma Naalakkersuisunut ilaasortamik akisussaasumik Ittoqqortoormiinut ilaqarsimannginnersut. Tamannali akissuteqarfiginngilaat, Hans Brønlund oqarpoq.

Amerikamiut sunniiniarnerat pissutigalugu nunaqavissut atornerlunneqarsinnaanerat inuit ilaasa ernumanartoqartippaat. Illit tamatumunnga qanoq eqqarsarpit?

- Amerikamiut innuttaasunik uukapaatitsiniartutut misigaakka. Uuliasiornissaminnik pilersaarutaat illoqarfimmi maani tapersersorneqanngilaq. Innuttaasunillu ataatsimiititsinerup kingorna ingerlaannarlutik aallaqqipput. Neriuutigisamittut pissarsinngitsoortut isumaqarpunga, Hans Brønlund oqarpoq.