Uulia avatangiisinut mingutsitsisoq pillugu kommuni iliuuseqaqqittoq

Kangilinnguit sakkutooqarfianni saliinissamut pilersaarutit annertuut sivisuumik suliarineqarsimasut ilaat allat suli naammassineqanngillat.

Kommuneqarfik Sermersuumi aqutsisoqarfik kommunip illuutai tallimat sakkutuut umiarsualivianniittut isaterneqaqqullugit politikkerinut qinnuteqarput.

Illunik isaterineq mingutsinneqarsimasumik saliinermi, nunalerinermi atortorissaarut bakterianik uuliamik arrortitsisartunik imaqartoq, inissaqartinneqalissaaq.

Illut aserfallassimasut

Periuseq tamanna Station Mestersvigimit ilisimaneqarpoq, tassani dieselimik annertuumik mingutsitsineq bakteriat atorlugit nunami uulia arrortinneqarpoq. Issoq atortorissaarummi salinneqareersimaleriaruni nunamut isumannaatsumik utertinneqarsinnaalissaaq.

Illut isaterneqartussat atorneqarneq ajortut aserfallassimaqisullu, kommunip aqutsisoqarfiata nassuiaatigaa.

- Pigisat tamarmik piiarneqareersimapput, isugutammik ajoqusersimasut oqoqalersimasullu takuneqarsinnaavoq. Igalaat aserorsimasut sakkutuunit qajannaarsorlugit matuneqartarput, aqutsisoqarfik politikerinut allappoq.

Avatangiisinik saliineq 2041-p tungaanut ingerlaannassaaq

Nunalerinermi atortorissaarutip ilineqannginnerani VVM-imik misissuisoqaqqaartariaqarpoq, sakkutuullu nalunaarusiaat naapertorlugu tamanna maannakkut ingerlanneqalereerpoq. Avatangiisinik saliinerup 2027-mi aallartinneqarsinnaanissaa anguneqarsinnaaqqullugu sullissisussanut neqeroorusiortitsineq ukioq manna naammassineqassasoq aamma neriuutigineqarpoq.

Naalakkersuisut siulittaasorisimasaat Kim Kielsen aamma Danmarkip illersornissamut misitererisimasaa Claus Hjort Frederiksen sakkutooqarfiup avatangiisinut mingutsitsiffiusup salinneqarnissaata aallartinneqarnissaa 2017-imi isumaqatigiissusiorfigaat.

Taamanili assigiinngitsunik suliniuteqartoqarsimavoq, maannalu pilersaarutit malillugit ingerlappat sakkutooqarfimmi avatangiisinut saliineq 2041-p imaluunniit 2042-p tungaanut suliarineqartussaavoq.