Múte KNI-mut: Pisiniarfinni ulluinnarni nioqqutissanut akigititat assigiissaarneqarlik
Nioqqutissanut assigiinnut pisiniarfinni assigiinngitsuni tunineqartartunut akigitinneqartut assigiinngissinnaanerat annikinnerpaatinniarlugu iliuuseqartoqarnissaanik Naalakkersuisut KNI-mut piumasaqaateqarput.
KNI-p nioqqutissanik immikkoortortaqarfiani ulluinnarni nioqqutissanut akigititat pillugit Naalakkersuisut misissuinissamik suliniuteqarniartut, Múte B. Egedep KNI-p ataatsimeersuarnerani ilisimatitsissutigaa.
Assiliisoq: Leiff Josefsen
Naalakkersuisut siulittaasuat Múte B. Egede KNI-p tallimanngormat ataatsimeersuarnerani aqutsisunut immikkut ittumik oqariartuuteqarpoq.
Nunaqarfinni najugaqartut ikiliartornerat pissutigalugu nioqqutissanik immikkoortortaqarfik immikkut unammilligassaqartoq ukiumoortumik nalunaarusiami allassimavoq, tamannalu KNI-p pisisartuisa ikiliartorneranik pisariaqartumillu isertitaqarsinnaannginneranik malitseqarpoq.
Akigititat pillugit misissuisoqassasoq
- Pissutsit tamakkua aaqqiivigineqarnissaat ingerlatseqatigiiffiup aqutsisuinit sulissutigineqassaaq. Tamatumunnga atatillugu unammilligassat taakku piffissaq ungasinnerusoq eqqarsaatigalugu pitsaanerpaamik qanoq aaqqinneqarsinnaanerat pillugu oqaloqatigiissuteqarnissamut Naalakkersuisut piareersimassapput. Tamatuma saniatigut nioqqutissanut assigiinnut pisiniarfinni assigiinngitsuni tunineqartartunut akigitinneqartut assigiinngissinnaanerat annikinnerpaatinniarlugu iliuuseqartoqarnissaanik Naalakkersuisut piumasaqaateqarput, Múte B. Egede oqalugiarnermini oqarpoq.
Ulluinnarni nioqqutissanut akigititat pillugit Naalakkersuisut misissuinissamik suliniuteqarniarlutik sulissuteqartut, Naalakkersuisut siulittaasuata aamma oqaatigaa. Misissuineq tamanna Inatsisartuni politikerinit ujartorneqarsimavoq.
Ukioq manna akileraarutit suli ilanngaatiginagit 173,7 millionit koruunit anguneqaraluartut, piginnittuunermut politikkip nutaap kingunerisaanik sinneqartoorutinit akiliuteqartoqassanngitsoq, Múte B. Egedep aamma erseqqissarpaa.
Sinneqartoorutinit akiliuteqassanngitsoq
- Taamaattumik piginnittuunermut politikkimi aalajangersagaq, tassa Namminersorlutik Oqartussat ingerlatseqatigiiffiutaanni akit apparnerisigut innuttaasunut iluaqutaasumik sinneqartoorutit atorneqarsinnaanerata piviusunngorsinnaanera Naalakkersuisut naammagisimaarpaat. KNI-p sinneqartoorutai ikummatissat akiisa appartinnissaannut atorneqarput. Taamaattumik KNI siornatigutut sinneqartoorumminit akiliuteqassanngilaq, tamannalu ingerlatseqatigiiffiup ukiuni 250-ini oqaluttuarisaanerani immikkoortumik nutaamik aallartitsivoq, oqaluttarfimmit oqaatigineqarpoq, erseqqissarneqarlunilu ”KNI inuiaqatigiinnit pigineqartoq innuttaasunullu tamanut iluaqutaassasoq”.
Siulersuisooreersut qinigaaqqipput, Múte B. Egedelli KNI eqqaasippaa “piginnittuunermut politikki malillugu siulersuisut pisortallu taarserneqartarnissaat sulissutigisariaqartoq”.
