Múte: Tusass inuiaqatigiinnut akisussaassutsimik takutitsivoq
Naalakkersuisut siulittaasuata Múte B. Egedep nalunaarasuartaaserinermik suliffeqarfik Tusas tallimanngornermi ataatsimeersuarnerani nersualaarpaa. Tusassili immikkoortumi ataatsimi isornartorsiorneqarpoq.
Tusass
Tusass sinneqartoortuartartuuvoq – ukiut tamaasa. Tamaammallu ullumikkut ataatsimeersuarnermi ukiumoortumik nalunaarusiap akuerineqarfiani, sinneqartoorutillu akileraarutinut akileereernermi 124 million koruuniuneranni.
Piginnittut inuiaat kalaallit Múte B. Egedemit sinnerneqartut ataatsimeersuarnermi ima erseqqissaavoq: “Ullumikkut nunarsuarmi saqitsaaffiunerusumi allanngorarnerusunilu inuuvugut.”
- Soorlu Naalakkersuisut siorna ataatsimeersuarnermi tikkuaraat, Tusass maanna isumannaallisaarnermut tunngasunik arlalinnik ilungersunartorsiorfeqarpoq. Ingerlatseqatigiiffinni ataasiakkaani isumannaallisaanerup nukittunerulersinneqarnissaannik Naalakkersuisut peqqusipput, tassani qarasaasianik ingerlatsiviit, ullumikkut ingerlatseqatigiiffiit ingerlanneqarneranni sullissineranilu attaveqaatitut pingaarutilittut inissisimaffeqartut, Naalakkersuisut siulittaasuat oqarpoq.
Siuttoq
Tusassip suliniutinut arlalinnut innuttaasunut iluaqutaasunut siuttuusimanera, taassuma erseqqissaatigaa.
- Suliniutinut taakkununnga coding class ilaavoq, Tusassillu ukiumoortumik nalunaarusiaa naapertorlugu nunatsinni atuarfiit ilinniarnertuunngorniarfiillu 87-nik ingerlatsiffigineqarput. Tamanna ilikkagaqarnermik meeqqat inuusuttullu qarasaasiat silarsuaata iluani ilisimasanik piginnaasanillu pingaarutilinnik pissarsiffigaat, Múte B. Egede naliliivoq, taassumalu aamma nipilersukkanut isaariaq Tusass Music App taavaa, tassanngalu kalaallit nipilersugaat streamerneqarsinnaapput.
- Suliniutit taamaattut Tusassip akuunera inuiaqatigiinnilu akisussaaffeqarnera takutippaat, Múte B. Egede erseqqissaavoq. Suulli tamarmik qaamasuinnaanatillu nuannersuinnaanngillat, nalunaarasuartaatileqatigiiffiummi sullitaasa avannaani, kangiani kujataanilu inississimanerat Múte B. Egedep inissikkusuppaa.
- Naalakkersuisunilli nunatta kangiani, avannaanni savaatilittatsinnilu satelliteqarfiusuni, attavimmillu tassannga pinngitsuuisinnaanngitsuni ilungersunartorsiuutit aamma oqaatigissavagut. Pissutsit tamakku pitsanngorsaavigineqartariaqarput, Tusassillu suliassamik tassannga pingaarnerutitsinissaa Naalakkersuisut sakkortunerpaamik kaammattuutigaat, taamaaliornikkut piffinni satelliteqarfiusuni pissutsit pitsaanerulernissaat sukkanerpaamik qularnaarneqarsinnaaqqullugu, Múte B. Egede erseqqissaavoq.
Siulersuisunut ilaasortaq nutaaq
Siulersuisunut siulittaasup tullia Inaluk Brand nammineq kissaateqarnermigut siulersuisunit tunuarnissani toqqarpaa. Taarserlugu 65-nik ukiulik Paneeraq Olsen, kingullermik Qeqqata Kommuniani kommunaldirektøritut atorfeqartoq, ilisimatusarfimmilu allaffissornermik ilisimatusarfimmi cand.scient.adm-iulluni. Taannalu siulersuisut inaannut nutaamik atilimmut uterpoq, 2014-millu 2015-mut telegreenland A/S-p siulersuisunut ilaasortaasimavoq.
“Siulersuisunut ilaasortaq nutaaq inuiaqatigiinnik kalaallinik annertuumik ilisimasaqartoq, tamannalu piginnittuunermut politikimi anguniakkanut naapertuuttoq”, Múte B. Egedep erseqqissaatigaa.
