Nalunaarasuartaateqarnermik tuniniagaqartunut piumasaqaatit annertusisat
Hans Peter Poulsenip attaveqaatit isumannaatsuunerulersinniarpai.
Hans Peter Poulsen: – Uanga suliassaqarfimma iluani attaveqaasersuutinut pinngitsoorneqarsinnaanngitsunut isumannaallisaanermut pingaarnertut akisussaasuuvunga.
Leiff Josefsen
– Suleqatigiissitamik pilersitsivunga, maannalu piumasaqaatit annertusisassat, nalunaarasuartaateqarnermik tuniniagaqartunut piumasarineqartussat suunersut taassuma misissuiffigaa, ineqarnermut attaveqaasersuutinullu naalakkersuisoq Hans Peter Poulsen oqarpoq.
– Suleqatigiissitaq Naalakkersuisunut saqqummiussereerpat, piumasaqaatit suut inatsimmi sakkortusineqassanersut misissussavarput, taanna ilisimatitsivoq, piumasaqaatinilu nalunaarasuartaatitigut attaveqaqatigiinnermik atuisinnaanissaq, isertuussisinnaanissaq, ilumoorussisinnaanissaq (tassalu paasissutissat ingerlaarnerminni paasiuminaallinnginnissaat) aammalu piviusorsiorsinnaanissaq (tassalu nassiussisut kinaassutsiminik taasinerannut tatiginnissinnaaneq) pillugu qulakkeerinninnissaq siunertarineqartoq tikkuaalluni. Tunngaviusumik piumasaqaatit teknologiimut attuumassuteqassannginnerarpai.
Tassunga atatillugu piumasaqaatit amerlanerit Tusass-imut tuttartut Hans Peter Poulsen ilisimatitsivoq, Tusass akuersissummik pigisaqartutut attaveqaasersuutinut akisussaasuummat. Tassa imaappoq immap naqqatigut kabelit, qaammataasat radiokædillu, piumasaqaatinik naammassinniffiusut pillugit aalajangiisarneq Tusassip akisussaaffigaa.
- Kalaallit Nunaanni attaveqaasersuutit pinngitsoorneqarsinnaanngitsut isumannaatsuunissaannut kina akisussaava?
– Upalungaarsimanermi, tassungalu ilanngullugu pinaveersaartitsilluni isumannaallisaanermi tunngavissat tunngaviusut immikkoortumut akisussaaffeqarnermut tunngavigineqarput. Tassalu uanga suliassaqarfimma iluani attaveqaasersuutinut pinngitsoorneqarsinnaanngitsunut isumannaallisaanermut pingaarnertut akisussaasuuvunga. Attaveqaasersuutit pigineqarneri ingerlanneqarnerilu aktianik piginneqatigiiffinnut, Namminersorlutik Oqartussanit pigineqartunut inissitaammata, inatsisini aktianik ingerlatseqatigiiffinnut eqqortunik piumasaqaateqartoqarnissaanik, aammalu ingerlatseqatigiiffiit inatsisinik malinninnissaannik nakkutilliinermik qulakkeerinissaq uanga akisussaaffigaara, Hans Peter Poulsen oqarpoq, ilisimatitsillunilu suliassaqarfinnut, Namminersorlutik Oqartussanut tiguneqarsimanngitsunut tunngatillugu danskit ministeriat atuuttoq inatsisinut pingaarnertut akisussaasuusoq.
– Nalunaarasuartaateqarneq, tassungalu immap naqqatigut kabelit, radiokædit aamma qaammataasanik atuineq ilanngullugit, akisussaaffeqarfimma ataani inissisimavoq, naqissusiivoq.
– Tusass attaveqaqatigiinnermik qulakkeerinninniarluni immap naqqatigut kabelimik nutaamik ikkussuippat Namminersorlutik Oqartussat akiliissappat?
– Tusass aningaasaliissutissat ilaannut EU-mit aningaasaliissutinik tapiissutisisimavoq. Namminersorlutik Oqartussat Tusass-ip attaveqaasersuutaanut toqqaannartumik tapiisarnerat ileqquunngilaq, Hans Peter Poulsen ilisimatitsivoq.
