Nikueqqissaagut

- Uppisinneqarpugut. Nikueqqissaagulli. Uppisimaannarnianngilagut.

Kangerlussuarmi Kang Mini Markedimi, novembarip 22-ani nungulluni ikuallattumi, piginnittoq oqarpoq. Pisiniarfiup saniani angallassinermik suliffeqarfimmik biilinillu attartortitsisarfimmik aamma ingerlatsivoq.

- Pigisatta annerpaartaat annaavagut. Biilit pingasut ikuallagussaaginnanngillat, aammali biilitsinnut allanut matuersaatit annaavagut. Tassami biilinut nutaalianut immikkut ittumik paarnaarsaatilinnut atortorpassualinnullu matuersaatinik nutaanik pissarsinissaq pisariuvoq – maannalu timmisartoq ullut tamaat Danmarkimiit tikissaarmat unammillernarnerulerpoq.

Ilisimatusartut sullikkai

- Pisiniarfipput innuttaasunik ilisimatusartorpassuarnillu kiisalu amerikamiunik sakkutooqarfimmit 109-meersunik aasat tamaasa timmisartuutiminnik Herculesinik Kangerlussuarmi sungiusartartunik sullissisaraluarpoq.

- Ilisimatusartorpassuarnit, siunissami qanoq pilersaaruteqarnitsinnik paasiniaasunik saaffigineqartarpugut, taamaammat qanoq ileriarutta aallarteqqinnissarput qularinngilara.

- Atlantikuli qulaallugu timmisartuussisarnerit unimmata illoqarfik pisoqarfiorpiarunnaarmat piffissaq takoqqaalaassavarput. Inuppassuit maanngaanniit allamut nuupput, kisiannili 2025-mi nikueqqissalluta isumaqatigiissutigaarput. Kangerlussuarmi siunissaqarpoq. Tamanna qularinngilara.

- Atlantiku qulaallugu timmisartuussisarnerit qujanartumik marsimi sapaatip-akunneranut marloriartassallutik aallarteqqinneqassapput, taamaalilluni arlaannik pisoqartussaassaaq. Qanorpiaq pisoqassanersoq ilisimanngiinnarparput.

Ikuallannermi suna pissutaanersoq suli paasineqanngilaq.

- Ikuallannermi pissutaasoq pillugu maannamuugallartoq nalunaaruteqarsinnaanngilagut, Kalaallit Nunaanni Politiit Sermitsiamut taama oqarput.