Nukariit akunnittarfiliornissamik takorluugallit

Kalaallit Nunaanni akunnittarfinnik ingerlatsisut arlallit suliniuteqarput. Illoqarfiit takornariarfiunerpaasartut siuttuanni Ilulissani takornariartitsinermik ingerlatsisut aningaasaliisullu marluk, Frank aamma Tommy Bagger, illoqarfimmi nutaamik akunnittarfiliornissamik takorluuipput.

Qatanngutigiit Baggerikkut annertuumik aningaasaliisartoq Jens Friis-Salling peqatigalugu ukiut pingasut matuma siorna Hotel Ilulissat, imaluunniit Best Western Plus Ilulissat, ammarpaat. Sanaartorneq ataatsimoorlutik aningaasaliisarfiannit Ilu Investimit millionikkaanik aningaasaliiffigineqarpoq.

Takornarialli amerliartuinnarnerat unnuisarfinnillu piumasaqarnerup annertusiartuinnarnera ilutigalugu Frank aamma Tommy Bagger Ilulissani nutaamik akunnittarfiliornissamik takorluugaqalerput.

Qallunaat Topas Explorer Groupiat, Jørgen Sølvsten Nielsen siuttoralugu, aamma taamatut takorluugaqarpoq.

 150-180-inik initalik

- Sivisuumik pilersaarutigisimasavut uninngatissimasagullu maanna aallarteqqippavut. Suliarput aallarterlaajuvoq. Nutaamik pissanganartumik akunnittarfiliorsinnaanerluta maanna misissorparput, Frank Bagger Sermitsiamut oqarpoq.

Brugsenip Pisiffiullu eqqaanni Kussangajaannguami akunnittarfiliortoqarsinnaasoq neriuutigaa.

- Avannaata Kommunianut tunniussinnaasatsinnik suliaqarpugut, oqarpoq.

Ukiut sisamat tallimat ingerlaneranni akunnittarfimmik 150-iniit 180-inut initalinnik ammaasinnaassallutik qatanngutigiit Baggerikkut neriuutigaat. Tassa Best Western Plus Ilulissaniit marloriaammik angitigisumik, 78-inik amerlanerusunik initalimmik.

- Missingersuutit akunnittarfiullu nutaap angissusissaa misissorlugit aallartissavagut, Frank Bagger oqarpoq.

Ukiuni ikittunnguani akunnittarfiuteqarnermik misilittagaqaraluarluni Ilulissani takornariaqarneq ukiuni kingullerni qanoq ineriartorsimanera qanorlu ineriartorsinnaatiginera qularutiginngilaa.

- Illoqarfimmi akunnittarfinni ininik amerlanerusunik pisariaqartitsineq annertoorujussuuvoq. Tamanna qularutiginngilluinnarparput.

Ilulissani nunanit tamalaanit mittarfik nutaaq 2026-mi atulerpat akunnittarfiup nutaap pulaartunik tigusisinnaanissaa piviusorsiornerussasoq taanna isumaqarpoq.

Topas: - Utaqqimaarpugut

Qallunaat takornarialerisut Topas Explorer Groupip siunissaq ungasinnerusoq eqqarsaatigalugu Ilulissani nutaamik akunnittarfiliornissaq aamma eqqarsaasersuutigaa.

- Taamaaliornissarput qularnanngilaq. Suliniutilli nutaap aallartinnissaanut suli piareersimanngilagut. Utaqqimaarpugut takorusullutigulu Ilulissani mittarfissap nutaap atulernerata kingorna takornariaqarneq qanoq ineriartornersoq, aamma akisuumik nutaamik akunnittarfiliornissamik aalajangiitinnata akunnittarfiliortut allat qassit sanaartornersut, Topas Explorer Groupimi siulittaasoq Jørgen Sølvsten Nielsen Sermitsiamut oqarpoq.

Suliffeqarfissuup Topasip Ilulissani Hotel Icefiord, Qeqertarsuarmi Hotel Disko Island, Qasigiannguani Hotel Disko Bay Kujataanilu Igalikumi nunaqarfimmi akunnittarfiit ilaatigut pigisarai.

- Ilulissani akunnittarfinni akikinnerpaajunngikkaluarpugut. Akunnittarfik akimasoq sanaartornialersaagarput immaqa 80-100-nik initaqassaaq, Topasimi siulittaasoq oqarpoq.

Hotel Siku, Arctic Hospitality Corporationip akunnittarfissaa nutaaq pingasunik quleriilik 131-nik initalik, Ilulissani politeeqarfissap nutaap eqqaani sananeqassaaq.

Suliarinnittussarsiornera novembarip arfineq-aappaata tungaanut neqeroorfigineqarsinnaavoq, naatsorsuutigineqarlunilu 150-200 millionit koruuninik akeqassasoq.

– Hotel Siku maajip aallaqqaataani 2026-mi naammassineqassaaq qaammallu qaangiuppat ammarneqassalluni, Arctic Hospitality Corporationimi pisortaaneq Morten Nielsen oqarpoq.

Taakku Hotel Arcticimik aamma World of Greenlandimik piginnittut Air Greenlandimit pigineqarput. Hotel Arctic peqatigalugu akunnittarfik nutaaq 238-nik initaqassaaq, oqarpoq.