Nukissiuuteqarfik nutaaq pisariaqartoq

Nuummi qanittumi innaallagiaarutereersorlu Nukissiorfiit Kalaallillu Nunaanni nukissiuuteqarneq pillugu nutaamik eqqarsarfissanngortoq Inatsisartuni ilaasortaq Kuno Fencker, Siumut, isumaqarpoq. 

Maannakkut namminersortitatut ingerlatsineq politikkerinit aqunneqartoq, tamatumalu kingunerisaanik nukissiuuteqarnissamut periarfissanik pitsaanerpaamik atornissaannut periarfissaqalersinnaannginnerput, soorluttaaq piffissaq sivikitsoq eqqarsaatigalugu politikkikkut aalajangiinerit sanaartornermullu pilersaarutit politikkikkut aalajangerneqartut isumalluutaammata nukissiuuteqarnissamik qulakkeerinnissinnaannginnerput tunngaviuvoq, Kuno Fencker naliliivoq.

Tamanna ilaatigut pissutigalugu Nuummi innaallagiaaruttoqarnissaanut sillimaniarneq qulakkeerneqanngilaq, siusinnerusukkullu innaallagiaaruttoqareersoq politikerit innuttaasunut neriorsuisimagaluartut. Ajutoortoqarnermi innaallagialersuut naammanngitsoq marloriarluni innaallagiaarunnerit ersersippaat, aatsaallu maanna ajutoortoqarnerani innaallagialersuut pisarialik 2028-mi atulertussanngorlugu pilersaarusiorneqalerpoq.

Aaqqissuusseqqinnerup Nukissiorfiit piffissaq ungasinnerusoq eqqarsaatigalugu aningaasaqarnermik teknikkimillu naliliinerit tunngavigalugit aalajangiinissamut pisariaqartumik kiffaanngissuseqartissavaa, piffissaq sivikitsoq eqqarsaatigalugu politikkikkut neriorsuutit isumalluutiginagit, Kuno Fencker oqarpoq, taannalu aamma niuernermik aqutsinermi qaffasissumik ilinniagaqarlunilu inatsisilerinermi qaffasissumik ilinniagaqarpoq.

Kalaallit Nunaat angisuumik takorluuisariaqarpoq

– Nukissiorfiit aaqqissuuteqqinneqarnissaat NunaGreenillu ilanngunnissaa pisariaqaannanngillat - periarfissaapput atorluarneqartussat. Tassami nutaaliaasumik pitsaasumillu nukissiuuteqarfiliornissamik, Kalaallit Nunaanni mingutsitsinngitsumik allanngortitsinissamut, namminiilivinnissamut kinguaariillu tullii pilersorneqarnissamut isumannaatsumik, ingerlatitsiffiusumik, ineriartortitsinissamut periarfissaqalerpugut, taanna naliliivoq nangillunilu:

– Aaqqissueriaatsit pisoqqat atorniinnarnagit allatut eqqarsarta. Kalaallit Nunaat nukissiuuteqarfimmik nutaamik, nunatta siunissaa pillugu anguniakkanut naleqquttumik, pisariaqartitsivoq.

Ingerlatseqatigiiffiup siunissaa allatut eqqarsaatigineqassaaq

Nukissiuuteqarfik Kalaallit Nunaata ineriartorneranik ingerlatsisinnaasoq pilersinniaraanni Nukissiorfiit ”Pisortat Suliffeqarfiutaattut Namminersortutut” imaluunniit ”Piginneqatigiilluni Ingerlatseqatigiiffittut” (A/S) allanngortinneqarsinnaasoq Kuno Fencker siunnersuuteqarpoq.

– Periutsit tamarmik ilisimasaqarluni aqutsinermik aningaasaqarnikkullu akisussaassuseqarnermik qulakkeerinniffiussallunilu ulluinnarni politikkerinit aqunneqarnermiit ersarissumik avissaartitsiutigaluni ingerlatseqatigiiffik Namminersorlutik Oqartussanik pigineqaannassaaq, nassuiaavoq.

Pissutsit attatiinnarneqarsinnaanngitsut

Kuno Fencker Inatsisartut ataatsimiititaliaani pingaarutilinni arlalinni, ilaatigut Aningaasaqarnermut Akileraartarnermullu Ataatsimiititaliami, ilaasortaavoq siornatigullu Nukissiorfimmi unammillernartut pillugit saqqummiiffigineqarnikuulluni.

– Tassani Nukissiorfimmi pissutsit attatiinnarneqarsinnaanngitsut takusinnaavara, Sermitsiamut oqarpoq.

Tassunga atatillugu Kalaallit Nunaat piujuartitsisumik nutaaliaasumillu nukissiuuteqarnissamut, nunatta ineriartorneranut iluaqutaasumik, akisussaaffimmik tigusisinnaallunilu tigusisariaqartoq Kuno Fencker naqissusiivoq.

– Maannali aaqqissuussaaneq, Nukissiorfiit politikkikkut toqqaannartumik aqunneqarluni suliffeqarfittut namminersortitatut ingerlanneqarnera, attatiinnassagutsigu unammillernartut takkuttussat aaqqiissuteqarfigisinnaanavianngilagut. Allatut eqqarsartoqartariaqalerpoq, naqissusiivoq.

Aaqqissuussaq ajornartorsiuteqarfiusoq

Namminersortitatut aaqqissuussaaneq Nukissiorfimmut arlaleriarluni ajornartorsiortitsisarpoq.

– Politikkikkut aqunneqarneq ilisimasalinnillu siulersuisoqannginneq atorluaannginnermik, siulittorneqarsinnaanngitsunik aalajangiinermik aningaasaqarnikkullu unammillernartoqarnermik kinguneqarnikuuvoq, Kuno Fencker oqarpoq nangillunilu:

– Taamatuttaaq nukissiuuteqarfik politikkikkut sunniuteqarfigineqarsinnaanermi suliffeqarfiullu aningaasaqarnikkut akisussaassuseqarnerani ersarissumik killeqanngilaq.

– Periuseq taanna Nukissiorfiup ineriartorneranut akornutaaginnanngilaq – aammali Kalaallit Nunaata siunissaq ungasinnerusoq eqqarsaatigalugu piujuartitsineranut pilersuisinnaaneranullu ulorianartorsiortitsivoq, Kuno Fencker naliliivoq.

NunaGreenip ilanngunneqarnera

NunaGreen, erngup nukinganik suliniutit annertuut mingutsitsinnginnerusumillu pilersuinissaq suliarisussanngorlugit pilersinneqartoq, pingaarutilittut suliniutaavoq, siunissarli ungasinnerusoq eqqarsaatigalugu aaqqiissutaanngilaq. Kalaallit Nunaat attaveqaatersuutit pingaarutillit isumagineqarnissaannut marlunnik immikkoortunik ingerlatsisoqarnissaminut akissaqanngilaq.

– Taamaammat NunaGreen Nukissiorfiit ataani ingerlatseqatigiiffittut piginneqataaffiusutut inissisimalertariaqarpoq, Kuno Fencker oqarpoq, isumaqarporlu taamatut aaqqiineq sunneeqatigiinnermik pilersitsillunilu pisuussutinik pitsanngorsaassasoq Kalaallillu Nunaanni nukissiuuteqarnermi ataqatigiinnerusumik periusissiueqataasinnaasoq.

– NunaGreen qaqumulluunniit piusussatit pilersinneqanngilaq, kisiannili ineriartornermik aallarnisaatitut – nukissanik katersisoqartariaqalerpoq, Kuno Fencker erseqqissaavoq.

Akiviusut inuiaqatigiinnilu akisussaaffeqarneq

Innaallagiaqarneq kiassarnerlu pillugit akinik aalajangersaanermut tunngatillugu akiviusunik atuutsitsilernissaq tunuarsimaarfigissanngikkipput Kuno Fencker isumaqarpoq.

– Aningaasaqarnikkut akisussaassuseqarnermut piujuartitsinermullu tunngatillugu pisariaqarpoq. Innuttaasulli sanngiinnerusut sumiginnarnavianngilagut. Nukissiorfiit aningaasaqarnerat ajortisanngikkaluarlugu tapiissuteqarnermut aaqqissuussinerit aalajangersimasut atorlugit ikiortariallit ikiorneqarnissaat qulakkeersinnaavarput, Kuno Fencker siunnersuuteqarpoq.