Nunalerineq: Inuussutissarsiutinik siuarsaanermut paasissutissat saqqummiunneqarput

Nunalerinermik inuussutissarsiuteqarnermut inuussutissarsiutinik siuarsaanermut inatsit nutaaq, ukioq manna januaarip aallaqqaataanit atuutilersoq, upernaaq Inatsisartut akuersissutigaat. Aaqqissuussinerit paasiuminarnerullutillu nunalerinermik inuussutissarsiutilinnit atorluarsinnaaneqarnerunissaat siunertaavoq.

Nalunaarut assigiinngitsorpassuarnik imaqarpoq, numamillu pitsanngorsaanermik tapiissutit qularnanngitsumik soqutigineqartorujussuussapput, aningaasallu naleerukkiartorneranni tapiissutit appannginniassammata ukiut tamaasa atuisunut akit qaffakkiartornerinut naapertuuttumik taakku nalimmassarneqarput.

Tapiissutit nutaat

Tapiissutit ima isikkoqarput:

Inatsit inuussutissarsiutinik siuarsaanermi siunertanik nutaanik imaqarpoq. Nunalerinermik inuussutissarsiutillit piffissani ulappuffiusuni, soorlu savat erniornerini aammalu savanik katersuinermi sulisussanik pisariaqartinneqartunik pissarsisinnaaneq ajornannginnerulersinniarlugu illunik inissiisarfinnik pisariaqartitsisarput.

Ataavartumik nukissiuteqarneq

Ataavartumik nukissiutinut aningaasaliinikkut nunalerinermi ikummatissanut aningaasartuutinik annikillisitsiniartoqarpoq. Taamaattumik inuussutissarsiutinik siuarsaanermut taarsigassarsiat 50 %-iisa erniaqanngitsutut akilersugassaanngitsutullu taarsigassarsiarineqarsinnaanerannut periarfissiisoqarpoq, taakkulu atorlugit nukissiutinut ataavartunut aningaasaliisarnerit siuarsaaffigineqarnissaat Naalakkersuisut kissaatigaat.

Siunertat allat:

• Qinnuteqartitsisarnerit: Nalunaarummi Nunalerinermut Naalakkersuisoq inuussutissarsiutinik siuarsaanermut qinnuteqaatit qinnuteqartitsinikkut ingerlanneqartarnissaannik aalajangiinissamut periarfissinneqarpoq. Periarfissami tassani aningaasat qinnuteqaatit assigiinngitsut akornanni tulleriiaarneqarsinnaassapput.
• Nunalerisutut nutaatut nammineerluni akiligassat: Nunalerisutut nutaatut nammineerluni akiligassanut piumasaqaatit appartinneqarsinnaanerinut periarfissat erseqqissarneqarput, taamaalillunilu nutaatut nunalerisunngortoq, nunalerivimmi piginneqataalersoq periarfissamik tassannga atuisinnaalissaaq. Kisiannili appaaffigineqarnissamut pisinnaatitaaffeqarnermi piginneqataasoq minnerpaamik ingerlatap 33 %-ianik piginnittuussaaq.
• Akiitsunik isumakkeerinnittarneq: Aalajangersagaq nutaaq, akiitsut tamakkiisumik ilaannaasumilluunniit isumakkeerinniffigineqarsinnaanerinut tunngasoq atuutsinneqalissaaq. Aalajangersagaq taanna ingerlatamik piginnittut nikinnerinut atuuttussanngorlugu killilerneqassaaq. Akiitsunik isumakkeerinninneq taamaallaat taarsigassarsisoq, piffissap naammaginartup iluani akiitsuminik appartitsinissamut periarfissaqanngippat, aammalu taamaallaat akisussaassuseqanngitsumik niuernerup kingunerisaanik akiitsut pilersimappata atuutissaaq.
• Akiligassallit taarserneqartarnerat peerneqarpoq: Inuussutissarsiutinik siuarsaanermut taarsigassarsianut akiligassallit taarsersinnaanerinut periarfissaq peerneqarpoq. Siusinnerusukkut periarfissap taassuma kingunerisaanik taarsigassarsiat, pigisap nalinga sinnerlugu akiitsoqarfiusut piginnittumut nutaamut nuunneqartarsimapput, taamaalillutillu piginnittup aningaasaqarneranut artukkiisarsimallutik. Siunissami pigisap nalinga tunisisup pisisullu akornanni aalajangerneqartalissaaq, immaqa attuumassuteqanngitsumik naliliisitsinikkut, aammalu inuussutissarsiutinik siuarsaanermut taarsigassarsianik nutaanik pilersitsisoqartalissaaq. Tunisinerup kingorna akiitsut sinnerisinnaasaat tunisisumit akisussaaffigineqartalissapput.

Nalunaarut nutaaq pillugu tusarniaanissamut piffissaliussaq novembarip aallaqqaataajusoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik nalunaarpoq.

Nalunaarut tamaat uani atuarneqarsinnaavoq