ANGUSEQQINNGITSOQ
Nunat tamalaat akornanni suli timmisartuussisoqarsinnaanngilaq
Nuummi mittarfik nutaaq Angallannermut Aqutsisoqarfiup piumasaqaataanut suli naapertuutinngilaq, taamaattumillu nunanut allanut timmisartuussinerit suli unitsikkallarneqaqqapput.
Nuummi mittarfissap isumannaallisaanerata qaffassarnissaanik Greenland Airports ilungersuuteqarpoq. Maannakkut nunanut allanut timmisartuussisoqarsinnaanngilaq.
Assiliisoq: Greenland Airports
Isumannaallisaanerup qulakkeeqqinnissaa siunertaralugu nunanilu tamalaani timmisartuussinerit aallarteqqinneqarsinnaanngortikkumallugit, sapaatip-akunnerani matumani Angallannermut Aqutsisoqarfik timmisartoqarfimmi misissueqqissaaqqissasoq Greenland Airports siusinnerusukkut ilisimatitsivoq.
Ajornartorsiut ilimagisamit annertunerujussuusimagunarpoq, tassami nunat tamalaat akornanni timmisartuussinerit unitsikkallarneqarnerat suli atuuttoq, oktobarimilu Angallannermut Aqutsisoqarfik misissueqqissaaqqikkumaartoq, Greenland Airports pingasunngormat Facebookikkut nalunaaruteqarpoq.
Greenland Airportsimi pisortap Jens Lauridsenip pissutsit ajuusaarutigai:
- Ajoraluartumik Angallannermut Aqutsisoqarfiup kukkunernut nassaarisimasaanut tunngatillugu sukumiisortai tamakkerlugit angummatsinnissaat iluatsinngilaq. Tamanna soorunami uggorisorujussuuarput. Kingulliit iluarsiniarlugit pisinnaasarput tamaat iliuuseqarpugut, security niveau 2-mullu sapinngisamik sukkanerpaamik uternissarput ukkataralugu, Greenland Airportsip Facebookimi quppernerani Jens Lauridsen oqarpoq.
Oktobarimi misissueqqissaartoqaqqissasoq
Angallannermut aqutsisoqarfik oktobarip aallartinnerani misissuiartorluni tikeraaqqissasoq, Greenland Airports nalunaarpoq:
- Nunanut tamalaanut timmisartuussinerit ingerlaqqilernissai ulapputigalugu aaqqitassat kingulliit aaqqinnissaat ukkatarivarput, tamatumalu sullitatsinnut ilaasunullu akornusiinernik malitseqarnera ajuusaarutigeqqipparput, Jens Lauridsen oqarpoq.
Tamatuma tungaanut Nuummit nunanut tamalaanut timmisartuussinissanut isumannaallisaavik aqqusaartinniarlugu, assersuutigalugu Kangerlussuarmut imaluunniit Kulusummut akunnilluni mittarnissaq pisariaqartoq, Greenland Airports ilisimatitsivoq.
Nunanut tamalaanut Nuummit timmisartuussisarnerup unitsikkallarneqarnera ilaatigut Air Greenlandimut eqquivoq, timmisartuussisarnerummi unitsikkallarneqarnerata mittarfik eqqormagu timmisartuutileqatigiiffik taanna Canadami Iqalunnut timmisartuussisarnermik ammaaqqammerpoq.
Angallannermut Aqutsisoqarfiup nakkutilliilluni misissuinermini isumannaallisaanermi kukkunerit maluginiarpai, soorlu matut parnaarneqanngitsut aamma sumiiffinnut immikkut ittunut akuersissuteqarnani isertoqarsinnaanera.
