Nutartigaq: Nuummi inuiattut ullorsiornermi assit takukkit
Pisarneq malillugu nunatsinni illoqarfinni nunaqarfinnilu arlalinni puiseqqaanniuttoqarpoq. Nalunaaqutaq 08.00 qamutilittarnermik puiseqqaanniunneq aallartissaaq.
Puiseqqaanniunnermit inernerit assillu nutaat allaaserisap nutarternerani ilaapput.
Ullaannguaq nillataartoq qasertorlu Inuiattut Ullorsiorneq nalliussiniarlugu Nuummiut 200-t 300-llu akornanniittut pisarneq malillugu tallimanngornermi juunip 21-anni katersuupput. Nuissat taartut aarlerisaaripput, siallernissaa ilimasaarutigineqarpoq soorlu sapaatip-akunnerini kingullerni illoqarfimmi kitaatalu sineriaata annersaani taamaattoq.
Nalunaaqutaq arfineq-pingasunut qamutilittartoqarpoq. Umiatsiaaqqat motoorii aallarput, umiatsiaaqqallu 25-t Nuutoqqamiit puisinniarlutik aallakaapput. Umiatsiaaraq siulleq angusimalluni utertoq unamminermi ajugaassaaq – ukioq mannalu ataqqinartuussalluni.
Umiatsiaaraq angoqqaartoq ajugaasuuvoq. Kommuneqarfik Sermersooq nittartakkamini allappoq ajugaasut pingasut ataqqinaataasumik akissarsisinneqarumaartut. Ilaatigut gummibådimik motoorimillu.
Ukioq manna ajugaasuuvoq Carlo Mølgaard, siullersaalluni puisimik tulaassisoq, kommuni Facebookimi allappoq. Ajugaasup tulliatut pingajuattullu inissipput Søren Davidsen aamma Benny Sandgreen.
Neqi utoqqaat illuannut tunissutigineqarpoq.
Pisussarpassuit pilersaarutaasut
Juulip 21-at kulturikkut aaqqissuussinernik kulturikkullu nersornaasiinernik malunnartinneqassaaq.
Naalakkersuisut kulturikkut nersornaasiuttagaat Katuami nalunaaqutaq aqqanermut tunniunneqassaaq.
Pisortatigoortumik nalliuttorsiornerup saniatigut kulturip illorsuani Katuami nalunaaqutaq 13.00-miit erinarsortoqassaaq, qilaatersortartoqassalluni uaaeertoqassallunilu.
Pisarneq malillugu illoqarfinni arlalinni ullup ingerlanerani qitinnerit, nipilersortut, nereqatigiinnerit, kaffillernerit kulturikkullu sammisassaqartitsinerit pissapput.
